சென்னை: வடகிழக்கு பருவமழை தொடங்கியுள்ள நிலையில், வங்கக்கடலில் அடுத்தடுத்து உருவாகும் புயல்கள் தென்னிந்திய மாநிலங்களுக்கு சவாலாக மாறியுள்ளன. ஏற்கெனவே அர்னாப் புயலின் தாக்கத்தில் இருந்து ஆந்திர மாநிலம் முழுமையாக மீளாத நிலையில், தற்போது முரசு என்ற பெயரில் உருவாகியுள்ள மற்றொரு புயல் அந்த மாநிலத்தை நோக்கி நகர்ந்து வருகிறது. ஒரே வாரத்தில் இரண்டாவது புயலை எதிர்கொள்ள வேண்டிய சூழல் ஆந்திராவுக்கு ஏற்பட்டுள்ளது.
தெற்கு அந்தமான் கடல் பகுதியில் கடந்த அக்டோபர் 29-ம் தேதி புதிய காற்றழுத்த தாழ்வுப் பகுதி உருவானது. இது மேற்கு - வடமேற்கு திசையில் நகர்ந்து அக்டோபர் 31-ம் தேதி காற்றழுத்த தாழ்வு மண்டலமாக வலுப்பெற்றது. தொடர்ந்து தீவிரமடைந்த இந்த வானிலை அமைப்பு புயலாக மாறியது. இதற்கு முரசு எனப் பெயரிடப்பட்டுள்ளது.
மணிக்கு 25 கி.மீ. வேகத்தில் நகரும் முரசு புயல்!
வங்கக்கடலில் நிலை கொண்டுள்ள முரசு புயல் கடந்த 6 மணி நேரத்தில் மணிக்கு சுமார் 25 கிலோமீட்டர் வேகத்தில் நகர்ந்து வருகிறது. வடமேற்கு திசையில் தொடர்ந்து நகரும் புயல், இன்று நள்ளிரவு முதல் நாளை அதிகாலை வரையிலான இடைப்பட்ட நேரத்தில் ஆந்திர மாநிலத்தின் நெல்லூர் - நரசாப்பூர் இடையே கரையைக் கடக்க வாய்ப்புள்ளது.
இதையும் படிங்க: முரசு புயல் எதிரொலி! முதல்வர் விஜய்க்கு போன் போட்ட சந்திரபாபு நாயுடு! தமிழகத்திடம் அவசர உதவி கேட்ட ஆந்திரா!
புயல் கரையைக் கடக்கும் பகுதிகளில் கனமழை பெய்யக்கூடும் என்பதால் ஆந்திராவின் கடலோர மாவட்டங்களில் முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன. பலத்த காற்று, கனமழை மற்றும் அதனால் ஏற்படக்கூடிய வெள்ளப் பாதிப்புகளை எதிர்கொள்ள மாநில அரசு தயாராகி வருகிறது.
ஆந்திராவுக்கு விரைந்த 90 தேசிய பேரிடர் மீட்புப் படையினர்!
முரசு புயலை எதிர்கொள்ளும் வகையில் மீட்பு மற்றும் நிவாரணப் பணிகளுக்கான ஏற்பாடுகள் முழுவீச்சில் நடைபெற்று வருகின்றன. இதன் ஒரு பகுதியாக அரக்கோணத்தில் இருந்து தேசிய பேரிடர் மீட்புப் படையைச் சேர்ந்த 3 குழுக்கள் ஆந்திர மாநிலத்திற்குப் புறப்பட்டுள்ளன.
ஒவ்வொரு குழுவிலும் 30 பேர் வீதம் மொத்தம் 90 மீட்புப் படையினர் ஆந்திராவுக்கு விரைந்துள்ளனர். புயல் கரையைக் கடக்கும் பகுதிகளில் மீட்புப் பணிகளை மேற்கொள்ளவும், பாதிக்கப்படும் மக்களைப் பாதுகாப்பான இடங்களுக்கு மாற்றவும் இந்தக் குழுக்கள் தயார் நிலையில் நிறுத்தப்பட உள்ளன.
அர்னாப் புயல் பாதிப்பே இன்னும் முடியவில்லை... மீண்டும் ஒரு புயல்!
கடந்த அக்டோபர் 28-ம் தேதி அர்னாப் புயல் ஆந்திராவில் கரையைக் கடந்தபோது, மாநிலத்தின் பல்வேறு பகுதிகளில் அதி கனமழை பெய்தது. இதனால் ஏற்பட்ட வெள்ளப்பெருக்கு மற்றும் பாதிப்புகளில் இருந்து மீள்வதற்கான சீரமைப்புப் பணிகள் இன்னும் தொடர்ந்து நடைபெற்று வருகின்றன.
மின் கட்டமைப்புகள், சாலைகள் உள்ளிட்ட பாதிக்கப்பட்ட உள்கட்டமைப்புகளைச் சீரமைக்கும் பணிகள் ஒருபுறம் நடைபெறும் நிலையில், தற்போது முரசு புயல் மற்றொரு சவாலாக உருவெடுத்துள்ளது.
ஒரே வார இடைவெளியில் அடுத்தடுத்து இரண்டு புயல்களை எதிர்கொள்ளும் நிலைக்கு ஆந்திரா தள்ளப்பட்டுள்ளது. முரசு புயல் கரையைக் கடக்கும் நேரத்தில் கனமழை மற்றும் பலத்த காற்றின் தாக்கம் அதிகரிக்கக்கூடும் என்பதால், கடலோரப் பகுதிகளில் மீட்பு மற்றும் நிவாரணப் பணிகளுக்கான முன்னேற்பாடுகள் தீவிரமாக நடைபெற்று வருகின்றன.
இதையும் படிங்க: முரசு புயல் எதிரொலி! முதல்வர் விஜய்க்கு போன் போட்ட சந்திரபாபு நாயுடு! தமிழகத்திடம் அவசர உதவி கேட்ட ஆந்திரா!