இந்தியாவுடனான எல்லை விவகாரம் தொடர்பாக நேபாள பிரதமர் பாலேந்திர ஷா தெரிவித்த கருத்துகள் அந்நாட்டில் கடும் அரசியல் சர்ச்சையை ஏற்படுத்தியுள்ளன. அவரது பேச்சுக்கு எதிராக எதிர்க்கட்சிகள், மாணவர் அமைப்புகள் மற்றும் பல்வேறு சமூக அமைப்புகள் போராட்டத்தில் ஈடுபட்டு வருவதால் நேபாள அரசியலில் பரபரப்பான சூழல் உருவாகியுள்ளது.

சமீபத்தில் நேபாள பார்லிமென்டில் உரையாற்றிய பிரதமர் பாலேந்திர ஷா, இந்தியா மற்றும் நேபாளம் இடையே நீண்டகாலமாக இருந்து வரும் எல்லை பிரச்னை குறித்து கருத்து தெரிவித்தார். அப்போது, நேபாளம் தனது பகுதிகள் எனக் கருதும் சில நிலப்பகுதிகள் தற்போது இந்தியாவின் கட்டுப்பாட்டில் உள்ளதாகவும், இந்த விவகாரத்திற்கு வரலாற்றுப் பின்னணி இருப்பதாகவும் கூறியதாக தகவல்கள் வெளியாகின.

மேலும், இந்தியா–நேபாள எல்லைகள் ஆங்கிலேயர் ஆட்சிக் காலத்தில் வரையறுக்கப்பட்டதால், இந்த பிரச்னைக்கு தீர்வு காணும் முயற்சியில் பிரிட்டனையும் இணைத்து ஆலோசனை நடத்தலாம் என அவர் தெரிவித்ததாக கூறப்படுகிறது. இந்த கருத்து இருநாட்டு உறவுகள் தொடர்பாக புதிய விவாதத்தை ஏற்படுத்தியுள்ளது.

இதையும் படிங்க: மொழி TO மாநில உரிமை வரை..! கலைஞர் கருணாநிதி பிறந்தநாள்... புகழாரம் சூட்டிய முதல்வர் விஜய்..!!

இதற்கு பதிலளித்த இந்திய அரசு, எல்லை தொடர்பான அனைத்து விவகாரங்களும் இந்தியா மற்றும் நேபாளம் ஆகிய இரு நாடுகளுக்கிடையேயான பேச்சுவார்த்தைகள் மூலமே தீர்க்கப்பட வேண்டும் என்றும், இதில் எந்த மூன்றாம் தரப்பிற்கும் இடமில்லை என்றும் தனது நிலைப்பாட்டை மீண்டும் தெளிவுபடுத்தியுள்ளது.

இதற்கிடையில், பிரதமரின் கருத்துக்கு எதிராக நேபாளத்தில் எதிர்ப்புக் குரல்கள் வலுத்துள்ளன. எதிர்க்கட்சிகள் பார்லிமென்டின் இரு அவைகளிலும் முழக்கமிட்டு அமர்வுகளை பாதித்ததாக தகவல்கள் தெரிவிக்கின்றன. அதேபோல், தலைநகர் காத்மண்டுவில் உள்ள மைதிகர் மண்டலா பகுதியில் மாணவர் அமைப்புகள் மற்றும் நேபாளி காங்கிரஸ் ஆதரவு அமைப்புகள் பெரும் ஆர்ப்பாட்டங்களை நடத்தி வருகின்றன.

பாலேந்திர ஷா பதவி விலக வேண்டும் என்ற கோரிக்கையும் போராட்டக்காரர்களால் முன்வைக்கப்பட்டு வருகிறது. சமீபத்தில் நடைபெற்ற அரசியல் மாற்றங்களுக்குப் பிறகு ஆட்சிப் பொறுப்பேற்ற அவருக்கு, குறுகிய காலத்திலேயே இத்தகைய எதிர்ப்புகள் உருவாகியுள்ளது குறிப்பிடத்தக்கது.

நேபாள அரசியலில் வேகமாக மாறிவரும் இந்த சூழ்நிலை, அந்நாட்டு அரசின் அடுத்தகட்ட நடவடிக்கைகள் மற்றும் இந்தியா–நேபாள உறவுகள் மீது என்ன தாக்கத்தை ஏற்படுத்தும் என்ற கேள்வியை எழுப்பியுள்ளது.

இதையும் படிங்க: #BREAKING: தவெக அரசின் அதிரடி மூவ்... தமிழகம் முழுவதும் பொறுப்பு அமைச்சர்கள் நியமனம்..!! முழு விவரம்..!!