காங்கிரஸ் கட்சியின் மூத்த தலைவர் சோனியா காந்திக்கு எதிராக இந்திய குடியுரிமை பெறுவதற்கு முன்பே வாக்காளர் அடையாள அட்டை பெற்றதாக கூறி, வழக்குப்பதிவு செய்யக் கோரி தாக்கல் செய்யப்பட்ட மனு, டெல்லி ரோஸ் அவென்யூ நீதிமன்றத்தால் இன்று தள்ளுபடி செய்யப்பட்டது. இந்த விவகாரம் அரசியல் வட்டாரங்களில் பெரும் பரபரப்பை ஏற்படுத்தியிருந்த நிலையில், நீதிமன்றத்தின் இந்த முடிவு கவனம் பெற்றுள்ளது.

மனுதாரர், காங்கிரஸ் மூத்த தலைவர் சோனியா காந்தி 1983-ம் ஆண்டு இந்திய குடியுரிமை பெற்றதாகவும், ஆனால் அதற்கு 3 ஆண்டுகளுக்கு முன்பே 1980-ம் ஆண்டில் டெல்லி தொகுதியின் வாக்காளராக அவரது பெயர் சேர்க்கப்பட்டதாகவும் அவர் கூறியிருந்தார். இதனால், முதல் தகவல் அறிக்கை (FIR) பதிவு செய்ய உத்தரவிட வேண்டும் என மனுவில் கோரப்பட்டது. 

இதையும் படிங்க: அந்த முதியவர் மேல தான் தப்பு! அவரை அமைதிப்படுத்தவே முயற்சித்தோம்... காவல்துறை விளக்கம்

இந்த மனு மாஜிஸ்திரேட் வைபவ் சவுரசியா முன்பு நேற்று மீண்டும் விசாரணைக்கு வந்தது. மனுதாரர் சார்பில் ஆஜரான மூத்த வழக்கறிஞர் பவன் நரங், ‘‘தேர்தல் கமிஷன், தவறை கண்டுபிடித்ததால்தான், கடந்த 1982-ம் ஆண்டு சோனியா காந்தி பெயரை நீக்கியது. 1983-ம் ஆண்டு இந்திய குடியுரிமை பெற்ற பிறகுதான் மீண்டும் அவரது பெயர் சேர்க்கப்பட்டது’’ என்று கூறினார்.

இந்நிலையில் இந்தக் கோரிக்கையை இன்று விசாரித்த நீதிபதி, மனுதாரரின் வாதங்களை ஏற்க மறுத்து, மனுவை தள்ளுபடி செய்து உத்தரவிட்டார். மேலும் சோனியா காந்திக்கு எதிராக எப்.ஐ.ஆர் பதிவு செய்ய உத்தரவிட நீதிபதி மறுப்பு தெரிவித்தார். இந்த முடிவு, காங்கிரஸ் கட்சிக்கு நிம்மதியை அளித்துள்ளது, அதேநேரம் எதிர்க்கட்சிகளுக்கு பின்னடைவாக அமைந்துள்ளது.

இந்த வழக்கு, சோனியா காந்தியின் குடியுரிமை மற்றும் வாக்காளர் பட்டியல் தொடர்பான சர்ச்சைகளை மீண்டும் விவாதப் பொருளாக்கியது. மனுதாரரின் குற்றச்சாட்டுகள், அரசியல் உள்நோக்கம் கொண்டவை என காங்கிரஸ் தரப்பு விமர்சித்தது. 

நீதிமன்றத்தின் தீர்ப்பு, இதுபோன்ற குற்றச்சாட்டுகளுக்கு உறுதியான ஆதாரங்கள் தேவை என்பதை வலியுறுத்துகிறது. இந்த விவகாரம், இந்திய அரசியலில் தொடர்ந்து விவாதங்களைத் தூண்டக்கூடும் என அரசியல் பார்வையாளர்கள் கருதுகின்றனர்.

மேலும், இதுபோன்ற வழக்குகள் அரசியல் தலைவர்களை குறிவைத்து தாக்கல் செய்யப்படுவது, நீதித்துறையின் நேரத்தை வீணடிப்பதாகவும், ஆதாரமற்ற குற்றச்சாட்டுகளை தவிர்க்க வேண்டும் எனவும் நீதிபதி கருத்து தெரிவித்ததாக தகவல்கள் வெளியாகியுள்ளன.
 

இதையும் படிங்க: கொடநாடு வழக்கு: பங்களாவை ஆய்வு செய்ய கோரிய மனு தள்ளுபடி..!!