இந்தியக் கடலோரக் காவல் படையின் சுற்றுச்சூழல் பாதுகாப்புத் திறனை அடுத்த கட்டத்திற்கு எடுத்துச் செல்லும் வகையில், உள்நாட்டிலேயே தயாரிக்கப்பட்ட முதலாவது மாசுக் கட்டுப்பாட்டுக் கப்பலான ‘சமுத்திரா பிரதாப்’ (Samudra Pratap) இன்று முறைப்படி தேசத்திற்கு அர்ப்பணிக்கப்பட உள்ளது.

மத்திய பாதுகாப்புத் துறை அமைச்சர் ராஜ்நாத் சிங் இன்று கோவாவில் நடைபெறும்  சிறப்பு வாய்ந்த நிகழ்ச்சியில் கலந்துகொண்டு, இந்தக் கப்பலை இந்தியக் கடலோரக் காவல் படையிடம் ஒப்படைக்கிறார். கடல் பரப்பில் திடீரென ஏற்படும் எண்ணெய் கசிவு மற்றும் இதர ரசாயன மாசுகளைக் கண்டறிந்து, அவற்றை உடனடியாக அகற்றும் அதிநவீனத் தொழில்நுட்பங்களுடன் இந்தக் கப்பல் வடிவமைக்கப்பட்டுள்ளது. கோவா கப்பல் கட்டும் தளத்தில் (Goa Shipyard Limited) மிக நேர்த்தியாக உருவாக்கப்பட்டுள்ள இந்தக் கப்பல், இந்தியக் கடல் எல்லையில் மாசுக் கட்டுப்பாட்டுப் பணிக்காகவே பிரத்யேகமாகத் தயாரிக்கப்பட்ட முதல் கப்பல் என்ற பெருமையைப் பெறுகிறது.

இந்தியக் கடற்பரப்பில் அதிகரித்து வரும் கப்பல் போக்குவரத்து மற்றும் சுற்றுச்சூழல் சவால்களைக் கையாளும் நோக்கில், ‘சமுத்திரா பிரதாப்’ கப்பல் இன்று முதல் தனது களப் பணிகளைத் தொடங்குகிறது. சுமார் 95.5 மீட்டர் நீளம் கொண்ட இந்தக் கப்பல், கடலில் கொட்டும் எண்ணெய் கழிவுகளை உறிஞ்சி அகற்றும் மிக நவீனக் கருவிகளைக் கொண்டுள்ளது. இன்று நடைபெறும் இந்த அர்ப்பணிப்பு விழாவிற்குப் பிறகு, இந்தக் கப்பல் உடனடியாகக் கடலோரக் காவல் படையின் ரோந்துப் பிரிவில் இணைக்கப்படும்.

இதையும் படிங்க: கனவு நனவாகிறது! இந்தியாவின் முதல் புல்லட் ரயில்! மத்திய அமைச்சர் அஸ்வினி வைஷ்ணவ்  அறிவிப்பு!

இந்தியப் பெருங்கடல் பகுதியில் சுற்றுச்சூழல் பாதுகாப்பை உறுதி செய்வதில் இந்தக் கப்பல் முக்கிய பங்கு வகிக்கும் என்று கூறப்படுகிறது. ஹெலிகாப்டர்களைத் தரையிறக்கும் வசதி மற்றும் மீட்புப் பணிகளுக்கான உபகரணங்கள் இதில் இடம்பெற்றுள்ளன. “பாதுகாப்புத் துறையில் இந்தியா தற்சார்பு அடைந்து வருவதன் அடையாளம் இது” எனத் துறை சார்ந்த அதிகாரிகள் பெருமிதத்துடன் தெரிவிக்கின்றனர். இன்று காலை கோவா வந்தடையும் அமைச்சர் ராஜ்நாத் சிங், இந்தக் கப்பலின் செயல்பாடுகளை நேரில் பார்வையிட்டு, பின்னர் முறைப்படி சேவையைத் தொடங்கி வைக்கிறார். உலக அரங்கில் இது இந்தியாவின் மற்றுமொரு சாதனையாக பார்க்கப்படுகிறது.
 

இதையும் படிங்க: “விண்ணைப் பிளந்த வாணவேடிக்கை!” - 2026 புத்தாண்டை உற்சாகத்துடன் வரவேற்ற தமிழக மக்கள்!