தமிழ்நாட்டில் இன்று (ஏப்ரல் 23, 2026) சட்டமன்றத் தேர்தலுக்கான வாக்குப்பதிவு காலை 7 மணி முதல் மாலை 6 மணி வரை நடைபெற்று வருகிறது. மார்ச் 15 அன்று தேர்தல் அறிவிக்கப்பட்டதில் இருந்து அரசியல் கட்சித் தலைவர்கள் தீவிர பிரசாரத்தில் ஈடுபட்டனர். இப்போது வாக்குப்பதிவு நாளில், பல தலைவர்களும் அவர்களது ஆதரவாளர்களும் களைப்பு தீர்க்க 'டூர் பிளான்' போடத் தொடங்கியுள்ளனர்.

முதல்வர் மு.க. ஸ்டாலின் மார்ச் 31 அன்று திருவாரூரில் இருந்து பிரசாரத்தைத் தொடங்கி, தொடர்ச்சியாக 22 நாட்கள் மாவட்டம் தோறும் சுற்றுப்பயணம் மேற்கொண்டார். அதற்கு முன்பே அரசின் நலத்திட்டங்களை செயல்படுத்தும் பணியாகவும் பல இடங்களுக்கு சென்றிருந்தார். அதேபோல், அ.தி.மு.க. பொதுச்செயலாளர் எடப்பாடி பழனிசாமி மார்ச் 25 அன்று சென்னை மயிலாப்பூரில் பிரசாரத்தைத் தொடங்கி, 27 நாட்கள் தொடர்ச்சியாக அனைத்து மாவட்டங்களுக்கும் சென்று வாக்கு கேட்டார்.

நாம் தமிழர் கட்சி ஒருங்கிணைப்பாளர் சீமான் தேர்தல் அறிவிப்புக்கு முன்பே 90 நாட்களுக்கு மேல் பிரசாரம் செய்து, 234 தொகுதிகளிலும் தீவிரமாக ஈடுபட்டார். துணை முதல்வர் உதயநிதி ஸ்டாலின், பா.ம.க. தலைவர் அன்புமணி ராமதாஸ், அ.ம.மு.க. பொதுச்செயலாளர் டி.டி.வி. தினகரன் உள்ளிட்ட தலைவர்களும் நீண்ட நாட்கள் பிரசாரப் பயணத்தில் ஈடுபட்டனர். கட்சி வேட்பாளர்கள், நிர்வாகிகள் என பலரும் தொகுதிகளை சுற்றி வந்து சோர்வடைந்துள்ளனர்.

இதையும் படிங்க: வாக்காளர் அட்டை இல்லையா? இந்த 12 ஆதாரங்கள் போதுமே?! இந்த ஆவணங்களை காட்டி ஓட்டு போடலாம்!!

இந்த நீண்ட பிரசார களைப்பில் இருந்து ஓய்வு பெற, வாக்குப்பதிவு முடிந்த உடனேயே பல தலைவர்கள் சுற்றுலா திட்டங்கள் தயாரித்துள்ளனர். முதல்வர் ஸ்டாலினும் எடப்பாடி பழனிசாமியும் ஊட்டி அல்லது கொடைக்கானல் செல்ல திட்டமிட்டுள்ளதாக தகவல்கள் வெளியாகியுள்ளன. உதயநிதி ஸ்டாலின் தன் குடும்பத்துடன் ஐரோப்பா நாடுகளுக்கு செல்ல உள்ளார். தமிழக வெற்றிக் கழகம் (தவெக) தலைவர் நடிகர் விஜய், இம்முறை பெரிய அளவில் பிரசாரப் பயணம் மேற்கொள்ளவில்லை என்றாலும், கோடை விடுமுறையை வழக்கமாக வெளிநாட்டில் செலவிடும் அவர், நண்பர்களுடன் நெதர்லாந்து அல்லது கனடா செல்ல திட்டமிட்டுள்ளார்.

பா.ஜ.க. முன்னாள் தலைவர் அண்ணாமலை தேர்தலில் வாக்களித்த உடனேயே அமெரிக்கா நோக்கி நீண்ட பயணம் மேற்கொள்ள உள்ளார். கட்சி நிர்வாகிகளும் தேர்தல் பணியின் களைப்பைப் போக்க குளிர் பிரதேசங்களை நோக்கி பயணம் திட்டமிட்டு வருகின்றனர்.

இதனால் அடுத்த 10 நாட்களுக்கு ஊட்டி, கொடைக்கானல், ஏற்காடு, ஏலகிரி போன்ற தமிழக குளிர் மலைப்பகுதிகளிலும், வட இந்திய குளிர் இடங்களிலும் தமிழக அரசியல் புள்ளிகள் நிறைந்திருக்கும் சூழல் உருவாகியுள்ளது. வாக்கு எண்ணிக்கை மே 4 அன்று நடைபெற உள்ள நிலையில், சிலர் ஓய்வுக்குப் பிறகு தொகுதிகளுக்குத் திரும்பவும் திட்டமிட்டுள்ளனர்.

தேர்தல் பிரசாரத்தின் தீவிரம் முடிந்து, இப்போது ஓய்வு மற்றும் புத்துணர்ச்சிக்கான நேரம் வந்துள்ளது. அரசியல் தலைவர்களின் இந்த 'டூர் பிளான்' தமிழக அரசியல் வட்டாரத்தில் பேசுபொருளாக மாறியுள்ளது.

இதையும் படிங்க: இந்தாங்க இனிப்பு எடுத்துக்குங்க! சாக்லெட் கொடுத்து வரவேற்பு! தமிழக தேர்தல் வாக்குப்பதிவில் அசத்தும் ரோபோ!!