''சவாலான காலத்திலும், வெற்றிகரமான நேரங்களிலும் பகவத் கீதையில் கிருஷ்ணரின் போதனைகள் எனக்கு பலத்தையும், வழிகாட்டுதலையும் அளித்தது'' என அமெரிக்க தேசிய புலனாய்வு இயக்குநர் துளசி கப்பார்ட்  தெரிவித்துள்ளார்.

இதுகுறித்து பேசிய துளசி கப்பார்ட், ''போர் மண்டலங்களில் தனது சேவை, தற்போதைய உலகளாவிய பிரச்சினைகள் உட்பட, குறிப்பாக முக்கியமான தருணங்களில், இந்து வேதத்தை நம்பி இருக்கிறேன். உலகின் பல்வேறு பகுதிகளில் உள்ள போர் மண்டலங்களில் பணியாற்றினாலும் சரி, இப்போது நாம் எதிர்கொள்ளும் சவால்களாக இருந்தாலும் சரி, சிறந்த காலங்களிலும் மோசமான காலங்களிலும் நான் பகவத் கீதையில் அர்ஜுனனுக்கு கிருஷ்ணர் கற்பித்த போதனைகளையே மையமாகக் கொண்டுள்ளேன்" என்று அவர் கூறினார்.

பல நாடுகள் சுற்றுப்பயணத்தின் ஒரு பகுதியாக கப்பார்ட் இந்தியாவிற்கு இரண்டரை நாள் பயணமாக வந்துள்ளார்.

ஞாயிற்றுக்கிழமை அதிகாலை டெல்லி வந்தடைந்த துளசி கப்பார்ட், உளவுத்துறை ஒத்துழைப்பு, சைபர் பாதுகாப்பு, பாதுகாப்பு உறவுகள் குறித்து இந்திய அதிகாரிகளுடன் கலந்துரையாடினார். பிப்ரவரியில் பிரதமர் நரேந்திர மோடி வாஷிங்டனுக்குப் பயணம் மேற்கொண்டதைத் தொடர்ந்து அவரது வருகை அமைந்துள்ளது. அமெரிக்கப் பயணத்தின் போது அங்கு துளசி கப்பார்டை சந்தித்தபோது அவரை இந்தியா-அமெரிக்க உறவுகளின் 'வலுவான வக்கீல்'' என்று பிரதமர் மோடி அழைத்தார்.

இதையும் படிங்க: காலிஸ்தானி சீக்கிய அமைப்பு மீது கடும் நடவடிக்கை: துளசி கப்பார்டிடம் ராஜ்நாத் சிங் வலியுறுத்தல்..!

தனது இந்தியப் பயணத்தின் போது, ​துளசி ​கப்பார்ட் இருதரப்பு பாதுகாப்பு ஒத்துழைப்பை வலுப்படுத்துவதை நோக்கமாகக் கொண்ட கூட்டங்கள், மாநாடுகளில் கலந்து கொண்டு வருகிறார். தேசிய பாதுகாப்பு ஆலோசகர் அஜித் தோவல் தலைமையில் நடைபெற்ற ஒரு மாநாட்டில் சுமார் 20 நாடுகளைச் சேர்ந்த உளவுத்துறை, பாதுகாப்பு அதிகாரிகளுடன் அவர் கலந்து கொண்டார். 

தேசிய பாதுகாப்பு கவுன்சில் செயலகத்தால் நடத்தப்படும் இந்த மாநாடு, 2022 முதல் ரெய்சினா உரையாடலின் ஒரு பகுதியாக நடைபெற்று வருகிறது. ஜெர்மனியில் நடந்த மியூனிக் பாதுகாப்பு மாநாட்டில் கலந்து கொண்டதைத் தொடர்ந்து, அமெரிக்க தேசிய புலனாய்வு இயக்குநராக பதவியேற்ற பிறகு துளசி கப்பார்ட் மேற்கொள்ளும் இரண்டாவது வெளிநாட்டுப் பயணம் இதுவாகும்.

இதையும் படிங்க: 41 நாடுகளுக்கு பயணத் தடை; விதிக்கப்போகும் டொனால்ட் டிரம்ப் - எந்தெந்த நாடுகள்.?