ரூ.2,000-க்கு மேல் மேற்கொள்ளப்படும் குறிப்பிட்ட வணிக ரீதியிலான UPI பரிவர்த்தனைகளுக்கு Merchant Discount Rate எனப்படும் MDR கட்டணம் வசூலிக்கும் புதிய நடைமுறைக்கு இடைக்காலத் தடை விதிக்க உச்சநீதிமன்றம் மறுத்துள்ளது. அதே நேரத்தில், இந்த விவகாரம் தொடர்பாக மத்திய அரசு, ரிசர்வ் வங்கி மற்றும் தேசிய பணப்பரிவர்த்தனை கழகம் ஆகியவை பதிலளிக்க நீதிமன்றம் நோட்டீஸ் அனுப்பியுள்ளது.
UPI மூலம் நடைபெறும் குறிப்பிட்ட Person-to-Merchant (P2M) பரிவர்த்தனைகளுக்கு புதிய கட்டண நடைமுறையை மத்திய அரசு அறிமுகப்படுத்தியுள்ளது. இதன்படி, ரூ.2,000-க்கு மேல் நடைபெறும் தகுதியான வணிக பரிவர்த்தனைகளுக்கு 0.4 சதவீத MDR வசூலிக்கப்பட உள்ளது. ரூ.75,000 மற்றும் அதற்கு மேற்பட்ட பரிவர்த்தனைகளுக்கு இந்த கட்டணம் அதிகபட்சமாக ரூ.300-ஆக நிர்ணயிக்கப்பட்டுள்ளது. புதிய நடைமுறை அக்டோபர் 15 முதல் அமலுக்கு வர உள்ளது.
இதில் முக்கியமாக, இந்த MDR கட்டணம் நேரடியாக UPI பயன்படுத்தும் பொதுமக்களிடம் வசூலிக்கப்படாது என்று மத்திய அரசு தரப்பில் உச்சநீதிமன்றத்தில் தெரிவிக்கப்பட்டது. மத்திய அரசின் சார்பில் ஆஜரான கூடுதல் சொலிசிட்டர் ஜெனரல் என்.வெங்கடராமன், கட்டணம் வணிகர்களிடம் இருந்து மட்டுமே வசூலிக்கப்படும் என்றும், பயனர்களுக்கு விலக்கு அளிக்கப்பட்டுள்ளதாகவும் தெரிவித்தார்.
இதையும் படிங்க: 100% கிடையாது..! UPI கட்டணம் மக்கள் மீது சுமத்தப்படாது... நிர்மலா சீதாராமன் திட்டவட்டம்..!!
இந்த கட்டண நடைமுறையை எதிர்த்து வழக்கறிஞர் அஞ்சன் தத்தா உச்சநீதிமன்றத்தில் பொதுநல மனு தாக்கல் செய்திருந்தார். இந்த மனு தலைமை நீதிபதி சூர்ய காந்த் தலைமையிலான நீதிபதிகள் ஜாய்மால்யா பாக்சி மற்றும் வி.மோகனா ஆகியோர் அடங்கிய அமர்வு முன்பு விசாரணைக்கு வந்தது.
வழக்கை விசாரித்த நீதிபதிகள், புதிய கட்டண நடைமுறைக்கு தற்போது இடைக்காலத் தடை விதிக்க மறுத்தனர். அதே நேரத்தில், இந்த விவகாரம் தொடர்பாக மத்திய அரசு, ரிசர்வ் வங்கி மற்றும் NPCI ஆகியவை நான்கு வாரங்களுக்குள் பதில் அளிக்க உத்தரவிட்டுள்ளனர்.
ரூ.2,000-க்கு குறைவான UPI பரிவர்த்தனைகளுக்கும், தனிநபரிடமிருந்து மற்றொரு தனிநபருக்கு அனுப்பப்படும் P2P பணப் பரிமாற்றங்களுக்கும் இந்த MDR பொருந்தாது. ரயில்வே, தொலைத்தொடர்பு, காப்பீடு, எரிபொருள் உள்ளிட்ட சில துறைகளுக்கு தனி கட்டண அமைப்பு நிர்ணயிக்கப்பட்டுள்ளது.
இதனால், அக்டோபர் 15 முதல் UPI பயன்பாட்டில் புதிய மாற்றம் ஏற்பட உள்ள நிலையில், அதன் சட்டப்பூர்வ தன்மை மற்றும் நடைமுறை தொடர்பான விவகாரம் உச்சநீதிமன்றத்தின் அடுத்தகட்ட விசாரணையில் கவனம் பெற உள்ளது.
இதையும் படிங்க: பெட்ரோல் பங்குகளில் UPI பணப்பரிவர்த்தனை நிறுத்தம்... ம. பி. அரசு அதிரடி..! மக்கள் தலையில் பேரிடி..!!