ரஷ்யாவிடம் இருந்து கச்சா எண்ணெய் வாங்கி வரும் இந்தியாவுக்கு புதிய சிக்கல் உருவாகியுள்ளது. ரஷ்யாவின் போர் நடவடிக்கைகளுக்கு மறைமுகமாக நிதியுதவி செய்கின்றன எனக் கருதப்படும் நாடுகளுக்கு அழுத்தம் கொடுக்கும் வகையில், அமெரிக்க செனட் முக்கியமான தடைகள் மசோதாவை 86-11 என்ற வாக்கு வித்தியாசத்தில் நிறைவேற்றியுள்ளது.

‘Lindsey O. Graham Sanctioning Russia and Iran Act of 2026’ என பெயரிடப்பட்டுள்ள இந்த மசோதா, சட்டமாக மாறினால் ரஷ்ய கச்சா எண்ணெய் மற்றும் எரிவாயுவை அதிக அளவில் வாங்கும் முதல் ஐந்து நாடுகளில் இருந்து அமெரிக்காவுக்கு வரும் பொருட்களுக்கு அதிகபட்சம் 100 சதவீதம் வரை வரி விதிக்கும் அதிகாரத்தை அதிபர் டொனால்ட் டிரம்புக்கு வழங்கும். இதில் இந்தியா மற்றும் சீனா போன்ற முக்கிய நாடுகள் பாதிக்கப்படக்கூடிய நிலையில் உள்ளன.

இதன் பொருள், இந்தியப் பொருட்களுக்கு உடனடியாக 100 சதவீத வரி அமலாகிவிட்டது என்பதல்ல. முதலில் அமெரிக்க பிரதிநிதிகள் சபையின் ஒப்புதல் தேவை. அதன் பின்னர் அதிபரின் கையெழுத்து கிடைத்தால்தான் இது சட்டமாகும். மேலும், சட்டம் அமலுக்கு வந்தாலும் 100 சதவீத வரியை கட்டாயமாக விதிக்க வேண்டும் என்பதல்ல; அந்த அளவு வரை வரி விதிக்கும் அதிகாரமே அதிபருக்கு வழங்கப்படுகிறது.

இதையும் படிங்க: திடீர் போன் கால்! மேற்காசியாவில் பரபரப்பு! பிரதமர் மோடியுடன் நெதன்யாகு நடத்திய முக்கிய ஆலோசனை!

இந்த நடவடிக்கையின் முக்கிய நோக்கம் ரஷ்யாவின் எரிசக்தி வருவாயை குறைப்பதாகும். உக்ரைன் போருக்கான ரஷ்யாவின் நிதி ஆதாரங்களை கட்டுப்படுத்தும் முயற்சியாக அமெரிக்கா இந்த கடுமையான அணுகுமுறையை எடுத்துள்ளது. ரஷ்ய அதிகாரிகள், பெரும் செல்வந்தர்கள், வங்கிகள், நிதி நிறுவனங்கள் மற்றும் ரஷ்யாவின் ‘Shadow Fleet’ எனப்படும் எண்ணெய் கப்பல் வலையமைப்புக்கும் மசோதாவில் தடைகள் இடம்பெற்றுள்ளன.

இந்த மசோதா இந்தியாவுக்கு முக்கியமான வர்த்தக எச்சரிக்கையாக பார்க்கப்படுகிறது. அமெரிக்கா இந்தியாவின் மிகப்பெரிய ஏற்றுமதி சந்தைகளில் ஒன்றாக இருப்பதால், கடுமையான வரி அமல்படுத்தப்பட்டால் இந்திய ஏற்றுமதியாளர்களின் போட்டித்திறன் பாதிக்கப்படலாம். குறிப்பாக அமெரிக்காவை நம்பியுள்ள தொழில்கள் மீது அழுத்தம் அதிகரிக்கும் அபாயம் உள்ளது.

அதே நேரத்தில், இந்தியா குறைந்த விலையில் ரஷ்ய எண்ணெயை வாங்குவதால் கிடைக்கும் எரிபொருள் செலவு நன்மையையும் கருத்தில் கொள்ள வேண்டியுள்ளது. எனவே, ரஷ்ய எண்ணெயைத் தொடர்ந்து வாங்குவதா அல்லது அமெரிக்க சந்தையில் ஏற்படக்கூடிய வர்த்தக பாதிப்பைத் தவிர்ப்பதா என்ற சிக்கலான சமநிலையை இந்தியா எதிர்கொள்ள வேண்டிய நிலை உருவாகியுள்ளது.

மசோதா தற்போது அடுத்த கட்டமாக அமெரிக்க பிரதிநிதிகள் சபைக்கு செல்ல உள்ளது. அங்கு ஒப்புதல் கிடைத்து, அதிபர் கையெழுத்திட்டால் மட்டுமே இந்தியாவுக்கு எதிரான இந்த அதிகபட்ச 100 சதவீத வரி அதிகாரம் நடைமுறைக்கு வரும்.

இதையும் படிங்க: Deepfake-க்கு செக்! இனி 36 மணி நேரம் இல்லை... வெறும் 3 மணி நேரம் மட்டும் தான்! ஏஐ போலி பதிவுகளுக்கு மரண அடி!