காத்மாண்டு: நேபாளத்தில் ஏற்பட்டுள்ள வரலாறு காணாத பெருவெள்ளத்தில் உயிரிழந்தோர் எண்ணிக்கை 1,000-ஐ கடந்துள்ளது. பேரழிவு ஏற்பட்டு ஒரு வாரம் நெருங்கியுள்ள நிலையில், 275 இந்தியர்கள் உள்பட 3,916-க்கும் மேற்பட்டோரின் நிலை என்ன என்பது இன்னும் தெரியவில்லை. அவர்களைத் தேடும் பணிகள் செவ்வாய்க்கிழமை 7-வது நாளாக தீவிரமாக நடைபெற்று வருகின்றன.

திபெத்–நேபாள எல்லைப் பகுதியில் கடந்த ஆகஸ்ட் 26-ம் தேதி ஏற்பட்ட மிகப்பெரிய பனிப்பாறைச் சரிவைத் தொடர்ந்து லெண்டே நதியில் திடீர் வெள்ளப்பெருக்கு ஏற்பட்டது. இந்த வெள்ளம் போடே கோஷி ஆற்றில் பெருக்கெடுத்து ஓடியதால், ஆற்றின் கரையோரங்களில் இருந்த கிராமங்கள் மற்றும் சிறிய நகரங்கள் கடுமையாக பாதிக்கப்பட்டன.

பல அடி உயரத்துக்கு சகதியுடன் பாய்ந்த வெள்ளத்தில் ஏராளமான வீடுகள், கட்டிடங்கள் மற்றும் வாகனங்கள் அடித்துச் செல்லப்பட்டன. பாலங்கள், சாலைகள் உள்ளிட்ட போக்குவரத்து கட்டமைப்புகளும் பெரும் சேதத்தை சந்தித்துள்ளன. நீர்மின் நிலையங்கள் உள்ளிட்ட முக்கிய உள்கட்டமைப்புகளும் வெள்ளத்தால் பாதிக்கப்பட்டதாக தெரிவிக்கப்பட்டுள்ளது.

இதையும் படிங்க: நேபாளத்தில் மீண்டும் பதற்றம்! ஆறுகள் கரைபுரளும் அபாயம்! 30 மாவட்ட மக்களுக்கு பறந்தது எச்சரிக்கை!

போடே கோஷி ஆற்றில் ஏற்பட்ட வெள்ளம் பின்னர் திரிசூலி மற்றும் நாராயணி உள்ளிட்ட ஆறுகளிலும் கலந்ததால் பாதிப்பு பல பகுதிகளுக்கு விரிவடைந்தது. குறிப்பாக ரசுவா, நுவாகோட், சித்வன், நவல்பராசி கிழக்கு, நவல்பராசி மேற்கு, கோர்கா மற்றும் தனாஹு மாவட்டங்கள் வெள்ளத்தால் கடுமையாக பாதிக்கப்பட்டுள்ளன.

தேசிய பேரிடர் அபாயக் குறைப்பு மற்றும் மேலாண்மை ஆணையத்தின் செவ்வாய்க்கிழமை தகவலின்படி, நேபாளத்தில் 987 பேரும், திபெத்தில் 16 பேரும் உயிரிழந்துள்ளனர். இதன் மூலம் மொத்த உயிரிழப்பு 1,003 ஆக உயர்ந்துள்ளது.

மீட்கப்பட்ட சடலங்களில் இதுவரை 51 உடல்கள் மட்டுமே அடையாளம் காணப்பட்டு குடும்பத்தினரிடம் ஒப்படைக்கப்பட்டுள்ளன. மேலும் 726 உடல்கள் அடையாளம் காணப்படாமல் இருப்பதாக அதிகாரிகள் தெரிவித்துள்ளனர். வெள்ளத்தில் சிக்கி சடலங்கள் கடுமையாக சேதமடைந்துள்ளதால், அடையாளம் காணும் பணியில் சிக்கல் ஏற்பட்டுள்ளது.

இதனால் மரபணு மாதிரிகள் சேகரிக்கப்பட்டு, சர்வதேச நடைமுறைகளுக்கு ஏற்ப அடையாளம் காணும் பணிகள் மேற்கொள்ளப்படுகின்றன. இதற்கிடையே அடையாளம் காண முடியாத சடலங்களை நேபாள அரசு உரிய நடைமுறைகளின்படி அடக்கம் செய்து வருகிறது.

நேபாளத்துக்கு சுற்றுலா மற்றும் கைலாஷ் யாத்திரை உள்ளிட்ட பயணங்களுக்காக சென்றிருந்த 30 நாடுகளைச் சேர்ந்த 583 பேரின் நிலையும் இதுவரை உறுதி செய்யப்படவில்லை. இவர்களில் கணிசமானோர் இந்தியர்கள் என தெரிவிக்கப்பட்டுள்ளது.

மொத்தம் 275 இந்தியக் குடிமக்களும், இந்திய வம்சாவளியைச் சேர்ந்த 128 பேரும் காணாமல் போயுள்ளதாக தகவல் வெளியாகியுள்ளது. இதனால் அவர்களின் குடும்பத்தினர் பெரும் கவலையில் உள்ளனர்.

பெருவெள்ளம் ஏற்பட்டு ஏழு நாட்கள் கடந்துள்ள நிலையில், மீட்புப் படையினர் தொடர்ந்து தேடுதல் பணியில் ஈடுபட்டு வருகின்றனர். சேதமடைந்த சாலைகள் மற்றும் பாலங்கள் காரணமாக சில பகுதிகளை சென்றடைவதே சவாலாக உள்ளதாக கூறப்படுகிறது. காணாமல் போனவர்களின் எண்ணிக்கை மற்றும் உயிரிழப்பு மேலும் அதிகரிக்குமா என்பது மீட்புப் பணிகள் முழுமையடைந்த பிறகே தெரியவரும்.

இதையும் படிங்க: நேபாளத்தை விழுங்கிய வெள்ளம் எப்படி உருவானது? சீனாவின் ட்ரோன் கேமராவில் சிக்கிய அதிர்ச்சி காட்சி!