தேசிய முற்போக்கு திராவிட கழகத்தின் (தேமுதிக) நிறுவனத் தலைவரும், தமிழ் திரையுலகின் முக்கிய நடிகருமான மறைந்த விஜயகாந்த், தமிழக அரசியலில் தனித்துவமான முத்திரை பதித்தவர். 1952 ஆகஸ்ட் 25இல் பிறந்த இவர், ‘கேப்டன்’ என்று ரசிகர்களால் அன்புடன் அழைக்கப்பட்டார். 2005இல் மதுரையில் தேமுதிகவை தொடங்கிய விஜயகாந்த், திமுக மற்றும் அதிமுகவுக்கு மாற்றாக மக்கள் நலன் சார்ந்த அரசியலை முன்னெடுத்தார். 

2006 சட்டமன்றத் தேர்தலில் தனித்து போட்டியிட்டு விருத்தாசலத்தில் வெற்றி பெற்றார். 2011இல் அதிமுக கூட்டணியில் 29 இடங்களை வென்று எதிர்க்கட்சித் தலைவராகப் பதவி வகித்தார், இது அவரது அரசியல் செல்வாக்கை உறுதிப்படுத்தியது. விஜயகாந்தின் எளிமையும், மக்களுடனான நேரடி தொடர்பும் அவரை மக்கள் மனதில் நிலைநிறுத்தின. 

இதையும் படிங்க: சூடுபிடிக்கும் அஜித்குமார் வழக்கு.. டிஜிபிக்கு பறந்த நோட்டீஸ்.. மாநில மனித உரிமை ஆணையம் அதிரடி..!

திரையுலகில் 150க்கும் மேற்பட்ட படங்களில் நடித்த இவர், புரட்சிகரமான கதாபாத்திரங்களால் புகழ் பெற்றார். இருப்பினும், உடல்நலக் குறைவால் பிந்தைய ஆண்டுகளில் பொது நிகழ்ச்சிகளில் கலந்து கொள்ள முடியவில்லை. 2023ம் ஆண்டு டிசம்பர் 28 அன்று சென்னை மியாட் மருத்துவமனையில் கொரோனா தொற்று மற்றும் நுரையீரல் பாதிப்பால் அவர் காலமானார். அவரது மறைவு தமிழக அரசியலில் பெரும் வெற்றிடத்தை ஏற்படுத்தியது. விஜயகாந்தின் மறைவை தொடர்ந்து, அவரது மனைவி பிரேமலதா விஜயகாந்த் தற்போது கட்சியை வழிநடத்தி வருகிறார். 

இந்நிலையில் தேமுதிக பொதுச்செயலாளர் பிரேமலதா விஜயகாந்த் தலைமையில், ‘கேப்டனின் ரத யாத்திரை’ என்ற பெயரில் தமிழ்நாடு முழுவதும் ஆகஸ்ட் 3ம் தேதி முதல் 23 வரை திறந்தவெளி வாகனத்தில் சுற்றுப்பயணம் மேற்கொள்ள திட்டமிடப்பட்டுள்ளது. இதற்கு அனுமதி கோரி, தேமுதிக பொருளாளர் எல்.கே.சுதீஷ் தமிழ்நாடு டிஜிபிக்கு கடிதம் அனுப்பியுள்ளார். இந்த யாத்திரை திருவள்ளூர் கிழக்கு சட்டமன்றத் தொகுதியில் ஆகஸ்ட் 3ஆம் தேதி தொடங்கவுள்ளது.

இந்த சுற்றுப்பயணம் 2026 சட்டமன்றத் தேர்தலுக்கு தேமுதிகவை தயார்படுத்துவதற்காகவும், கட்சியின் வலிமையை நிரூபிக்கவும் நடத்தப்படுகிறது. மறைந்த தேமுதிக நிறுவனர் கேப்டன் விஜயகாந்தின் நினைவைப் போற்றும் வகையில் இந்த யாத்திரை அமையும் என கட்சி நிர்வாகிகள் தெரிவித்துள்ளனர். பிரேமலதா விஜயகாந்த் மற்றும் இளைஞர் அணி செயலாளர் விஜய பிரபாகரன் ஆகியோர் தமிழ்நாடு முழுவதும் பல்வேறு நிகழ்ச்சிகளில் பங்கேற்று, தொண்டர்களை உற்சாகப்படுத்தி வருகின்றனர்.

கடந்த ஆண்டு விஜயகாந்தின் முதலாம் ஆண்டு நினைவு தின பேரணிக்கு காவல்துறை அனுமதி மறுத்ததால், தடையை மீறி பேரணி நடத்தப்பட்டது குறிப்பிடத்தக்கது. இந்த யாத்திரையும் கட்சியின் செல்வாக்கை வெளிப்படுத்துவதற்கு முக்கியமானதாக கருதப்படுகிறது. 2026ல் கூட்டணி நிலைப்பாடு குறித்து கடலூரில் நடைபெறவுள்ள மாநாட்டில் அறிவிக்கப்படும் என பிரேமலதா தெரிவித்துள்ளார். இந்த யாத்திரை மூலம் தேமுதிகவின் கொள்கைகளை மக்களிடம் கொண்டு சேர்க்கவும், கட்சி தொண்டர்களை ஒருங்கிணைக்கவும் தேமுதிக திட்டமிட்டுள்ளது. 
 

இதையும் படிங்க: இனி போலிசில் இது வேண்டவே வேண்டாம்! அஜித்குமார் மரணம் எதிரொலி.. ஆக்‌ஷனில் இறங்கிய டிஜிபி..!