பாட்டாளி மக்கள் கட்சியின் (பாமக) நிறுவனர் டாக்டர் ச. ராமதாஸ், கட்சியின் மாம்பழம் சின்னத்தை தனது மகன் அன்புமணி ராமதாஸ் பயன்படுத்த தடை விதிக்கக் கோரி சென்னை உயர்நீதிமன்றத்தில் தொடர்ந்த மேல்முறையீட்டு வழக்கை அவசரமாக விசாரிக்க நீதிமன்றம் மறுப்பு தெரிவித்துள்ளது. இந்த முடிவு பாமகவுக்குள் நீண்டகாலமாக நீடிக்கும் உட்கட்சி மோதலை மீண்டும் வெளிச்சத்துக்கு கொண்டு வந்துள்ளது.

பாமக பெயர், சின்னம் மற்றும் கொடியை அன்புமணி பயன்படுத்த தடை விதிக்க வேண்டும் என்றும், தானே கட்சியின் தலைவராக அறிவிக்க வேண்டும் என்றும் கோரி ராமதாஸ் தரப்பில் சென்னை உரிமையியல் நீதிமன்றத்தில் மனு தாக்கல் செய்யப்பட்டது. கடந்த மார்ச் 26-ம் தேதி அந்த நீதிமன்றம் மனுவை தள்ளுபடி செய்தது. சட்டப்படி தேர்தல் ஆணையத்தை அணுகலாம் என்று உத்தரவிட்டது.

இந்த உத்தரவுக்கு எதிராக உச்சநீதிமன்றத்தில் ராமதாஸ் தரப்பு மேல்முறையீடு செய்தது. உச்சநீதிமன்றம் சென்னை உயர்நீதிமன்றத்தை அணுக உத்தரவிட்டது. அதன்படி, சென்னை உயர்நீதிமன்றத்தில் தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் அடங்கிய அமர்வில் வழக்கு விசாரணைக்கு வந்தது. ராமதாஸ் தரப்பு உச்சநீதிமன்ற உத்தரவைச் சுட்டிக்காட்டி, சின்னம் தொடர்பான வழக்கை அவசர வழக்காக இன்று பிற்பகல் விசாரிக்க வேண்டும் எனக் கோரியது.

இதையும் படிங்க: பென்னாகரத்தில் மகனுக்கு போட்டியாக நீதான் களம் இறங்கணும்!! ஜி.கே.மணிக்கு அழுத்தம் தரும் பாமக ராமதாஸ்!!

ஆனால் நீதிபதிகள், “மனுவாக தாக்கல் செய்தால் வழக்கு பட்டியலிடப்பட்டு விசாரணைக்கு எடுத்துக்கொள்ளப்படும்” எனத் தெரிவித்தனர். ராமதாஸ் தரப்பு தொடர்ந்து அவசர விசாரணைக்கு வலியுறுத்தியபோதும், உயர்நீதிமன்றம் இன்று அவசர வழக்காக விசாரிக்க முடியாது என மறுப்பு தெரிவித்துவிட்டது. வழக்கு சாதாரண பட்டியலில் இடம் பெற்று பின்னர் விசாரிக்கப்படும் என்று நீதிமன்றம் தெரிவித்துள்ளது.

பாமகவில் ராமதாஸ் - அன்புமணி இடையேயான மோதல் கடந்த சில ஆண்டுகளாக தீவிரமடைந்துள்ளது. கட்சியின் தலைமை உரிமை, சின்ன ஒதுக்கீடு உள்ளிட்ட பல விவகாரங்களில் இரு தரப்பும் தேர்தல் ஆணையத்தையும் நீதிமன்றங்களையும் நாடி வருகின்றன. தமிழக சட்டப்பேரவைத் தேர்தல் நெருங்கும் நிலையில், மாம்பழம் சின்ன விவகாரம் இரு தரப்புக்கும் முக்கியமானதாக உள்ளது.

இந்த வழக்கின் முடிவு பாமகவின் எதிர்கால அரசியல் நகர்வுகளை பெரிதும் பாதிக்கும் என அரசியல் வட்டாரங்கள் கருதுகின்றன. ராமதாஸ் தரப்பு அடுத்த கட்ட நடவடிக்கைக்கு தயாராகி வருவதாகத் தெரிகிறது. சென்னை உயர்நீதிமன்றத்தின் இந்த முடிவு, பாமகவின் உட்கட்சி பிரச்னை இன்னும் சில காலம் நீடிக்கும் என்பதை சுட்டிக்காட்டுகிறது. தமிழக அரசியல் களத்தில் இந்த விவகாரம் தொடர்ந்து பேசுபொருளாக இருக்கும். 

இதையும் படிங்க: பாமக-வோட இந்த நிலைமைக்கு அன்புமணிதான் காரணம்! கொந்தளித்த ராமதாஸ்! 18 பக்க பதில் மனு தாக்கல்!