சிதம்பரம் அருகே புவனகிரியில் நடந்த தமிழக வெற்றிக் கழக ஆலோசனைக் கூட்டத்தில் கோஷ்டி பூசல் ஏற்பட்டது. வார்டு செயலாளருக்கு தெரியாமல் கூட்டம் நடத்துவதாக கேள்வி எழுப்பியதால் பரபரப்பு நிலவியது. உள்ளூர் வார்டு செயலாளருக்கு ஆதரவாக பொதுமக்கள் திரண்டனர். போலீசார் சம்பவ இடத்திற்கு வந்து அனைவரையும் கலைந்து போகச்செய்தனர்.

சிதம்பரத்தை அடுத்த புவனகிரி நகரில் உள்ள 14 வது வார்டு பகுதியில் தமிழக வெற்றிக் கழகத்தின் ஆலோசனைக் கூட்டம் இன்று இரவு நடந்தது. கடலூர் வடக்கு மாவட்ட செயலாளர் ஆனந்த், மற்றும் புவனகிரி சட்டமன்ற தொகுதி வேட்பாளராக போட்டியிட்ட மகாலிங்கம் உள்ளிட்ட பல்வேறு நிர்வாகிகள் கூட்டத்தில் கலந்து கொண்டனர். கூட்டம் நடைபெற்றுக் கொண்டிருந்தபோது அதே பகுதியைச் சேர்ந்த 14 வது வார்டு செயலாளரான ரவிச்சந்திரன் என்பவர் கூட்டத்திற்கு வந்துள்ளார்.

அப்போது எனது வார்டில் எனக்கு தகவல் தெரியாமல் எப்படி கூட்டம் நடத்தலாம் என்று மாவட்ட நிர்வாகிகளிடம் நியாயம் கேட்டுள்ளார். அப்போது இரு தரப்புக்கும் இடையே வாக்குவாதம் ஏற்பட்டதாக கூறப்படுகிறது. இந்நிலையில் வார்டு செயலாளருக்கு ஆதரவாக அந்த பகுதியைச் சேர்ந்த பொதுமக்கள் கூட்டம் நடைபெற்ற இடத்திற்கு அருகே திரண்டனர்.

இதையும் படிங்க: வீட்டுக் காவலில் மருத்துவ பணியாளர்கள்... "SOFA MODEL"..! விளாசிய உதயநிதி..!!

இதனால் பரபரப்பு ஏற்பட்டது. பின்னர் இதுகுறித்து புவனகிரி போலீசாருக்கு தகவல் தெரிவிக்கப்பட்டது. இதையடுத்து புவனகிரி போலீஸ் இன்ஸ்பெக்டர் தேவேந்திரன் தலைமையில் போலீசார் சம்பவ இடத்திற்கு வந்து இரு தரப்பையும் கலைந்து போகச் செய்தனர். இதனால் இந்த பகுதியில் சிறிது நேரம் பரபரப்பு ஏற்பட்டது.

இதையும் படிங்க: ஜெயலலிதா இருந்திருந்தால் இந்த நிலை வந்திருக்காது! அதிமுக, திமுக மீது விமர்சனம்! மரகதம் குமரவேல் விளாசல்!