தமிழக பள்ளிக்கல்வித் துறையின் உயர்மட்ட ஆய்வுக் கூட்டம் இன்று நடைபெற உள்ளது. கல்வித்துறையில் மேற்கொள்ளப்பட்டு வரும் பல்வேறு திட்டங்கள், நிர்வாக நடவடிக்கைகள் மற்றும் எதிர்கால செயல்திட்டங்கள் குறித்து முக்கிய ஆலோசனைகள் இடம்பெற உள்ளதால், இந்தக் கூட்டம் கல்வித்துறையினர், ஆசிரியர்கள் மற்றும் பெற்றோர்கள் மத்தியில் பெரும் எதிர்பார்ப்பை ஏற்படுத்தியுள்ளது.
தமிழக முதலமைச்சர் விஜய் தலைமையில் நடைபெறும் இந்த உயர்மட்ட ஆய்வுக் கூட்டத்தில், பள்ளிக்கல்வித் துறை மற்றும் ஒருங்கிணைந்த பள்ளிக்கல்வித் திட்டத்தின் செயல்பாடுகள் விரிவாக ஆய்வு செய்யப்பட உள்ளன. பள்ளிகளில் கற்றல் தரத்தை மேம்படுத்துதல், மாணவர் சேர்க்கையை அதிகரித்தல், இடைநிற்றலைக் குறைத்தல், அடிப்படை வசதிகளை மேம்படுத்துதல், ஆசிரியர் பணியிடங்கள் மற்றும் கல்வி நிர்வாகத்தில் வெளிப்படைத்தன்மையை உறுதி செய்வது உள்ளிட்ட பல்வேறு அம்சங்கள் குறித்து ஆலோசிக்கப்படலாம் என எதிர்பார்க்கப்படுகிறது.
அதேபோல், அரசுப் பள்ளிகளில் செயல்படுத்தப்பட்டு வரும் பல்வேறு நலத்திட்டங்களின் தற்போதைய நிலை, மாணவர்களின் கல்வித் திறன், பள்ளிகளின் உள்கட்டமைப்பு வசதிகள், காலியாக உள்ள பணியிடங்கள் மற்றும் அவற்றை நிரப்புவது தொடர்பான விவகாரங்களும் ஆய்வுக்கு எடுத்துக்கொள்ளப்படலாம் என கல்வித்துறை வட்டாரங்கள் தெரிவிக்கின்றன.
இதையும் படிங்க: எதையும் உருப்படியா உருவாக்க வக்கில்ல... விஜய் அரசே வெட்கமே இல்லையா? - விடிந்ததுமே வெடித்தெழுந்த திமுக...!
இந்தக் கூட்டத்தில் அதிக எதிர்பார்ப்பை ஏற்படுத்தியுள்ள முக்கிய அம்சமாக பகுதி நேர ஆசிரியர்களின் பணி நிரந்தர கோரிக்கை பார்க்கப்படுகிறது. தமிழக அரசுப் பள்ளிகளில் கடந்த 16 கல்வியாண்டுகளாக குறைந்த தொகுப்பூதியத்தில் தற்காலிக அடிப்படையில் பணியாற்றி வரும் 11,773 பகுதி நேர ஆசிரியர்களின் பணி நிரந்தரம் தொடர்பான கோப்பு குறித்து முக்கிய ஆலோசனை நடைபெறலாம் என்ற எதிர்பார்ப்பு நிலவுகிறது.
பல ஆண்டுகளாக பணியாற்றி வந்தாலும், நிரந்தர நியமனம் கிடைக்காததால் ஊதியம், பணிப் பாதுகாப்பு, ஓய்வூதியச் சலுகைகள் உள்ளிட்ட பல்வேறு நலன்களை பெற முடியாமல் இருப்பதாக பகுதி நேர ஆசிரியர்கள் தொடர்ந்து வலியுறுத்தி வருகின்றனர். இதனால், அவர்களின் நீண்டகால கோரிக்கைக்கு இந்தக் கூட்டத்தில் தீர்வு கிடைக்குமா என்ற எதிர்பார்ப்பு அதிகரித்துள்ளது.
இந்த நிலையில், 11,773 பகுதி நேர ஆசிரியர்களை பணி நிரந்தரம் செய்யும் கோப்பில் முதலமைச்சர் விஜய் உடனடியாக கையொப்பமிட்டு உத்தரவு பிறப்பிக்க வேண்டும் என்று தமிழ்நாடு பகுதிநேர ஆசிரியர்கள் கூட்டமைப்பு மீண்டும் வலியுறுத்தியுள்ளது.
இதனால், இன்று நடைபெறும் பள்ளிக்கல்வித் துறையின் உயர்மட்ட ஆய்வுக் கூட்டத்தில் எடுக்கப்படும் முடிவுகள் கல்வித்துறையில் முக்கிய தாக்கத்தை ஏற்படுத்தும் என எதிர்பார்க்கப்படுகிறது. குறிப்பாக, பகுதி நேர ஆசிரியர்களின் பணி நிரந்தரம் தொடர்பாக அரசின் நிலைப்பாடு என்ன என்பது குறித்து கல்வித்துறையினர் மட்டுமின்றி ஆயிரக்கணக்கான ஆசிரியர்களும் ஆவலுடன் காத்திருக்கின்றனர்.
இதையும் படிங்க: பட்டு வேட்டி, சட்டையில் மாஸ் காட்டிய முதல்வர் விஜய்..! அதிரும் அரசியல் களம்... பரபரக்கும் பனையூர்..!