ஆதரவை வாபஸ் பெறுவோம் – முதலமைச்சர் விஜய்யை எச்சரித்த மார்க்சிஸ்ட் கம்யூனிஸ்ட் கட்சி!

தமிழகத்தில் புதிய ஆட்சி மாற்றம் ஏற்பட்டுள்ள சூழலில், ஆளுங்கட்சியான தமிழக வெற்றிக் கழகத்திற்கு நிபந்தனையற்ற ஆதரவு வழங்கி வரும் மார்க்சிஸ்ட் கம்யூனிஸ்ட் கட்சி (CPIM), தற்போது தவெக அரசுக்கு மிகக் கடுமையான அரசியல் எச்சரிக்கை விடுத்துள்ளதால் கோட்டை வட்டாரத்தில் அசுரப் பரபரப்பு தொற்றிக் கொண்டுள்ளது.

அதிமுக பொதுச்செயலாளர் எடப்பாடி பழனிசாமி தவெக மீது குதிரை பேரக் குற்றச்சாட்டுகளை அடுக்கடுக்காக முன்வைத்த சில மணி நேரங்களிலேயே, சிபிஎம் மாநிலச் செயலாளர் திரு. சண்முகம் அவர்கள் தவெக தலைமைக்கு எதிராக இந்த அதிரடித் தாக்குதலைத் தொடுத்துள்ளார். இதுகுறித்து அவர் வெளியிட்டுள்ள காரசாரமான அறிக்கையில், "தமிழக சட்டமன்றத் தேர்தலில் மக்கள் கொடுத்த தீர்ப்பின் அடிப்படையில், தவெக அரசுக்கு நாங்கள் வழங்கி வரும் ஆதரவு என்பது கொள்கை சார்ந்தது. ஆனால், தற்போது நிலவி வரும் அரசியல் சூழலில், பிரதான எதிர்க்கட்சியான அதிமுகவின் எம்.எல்.ஏ-க்களின் ஆதரவைப் பெறத் தமிழக வெற்றிக் கழகம் ஏதேனும் திரைமறைவு வேலைகளில் ஈடுபட்டாலோ அல்லது அவர்களின் ஆதரவைப் பெற்றாலோ, தவெக அரசுக்கு மார்க்சிஸ்ட் கம்யூனிஸ்ட் கட்சி வழங்கி வரும் ஆதரவை உடனடியாக மறுபரிசீலனை செய்ய நேரிடும்" என்று மிக ஓப்பனாக ரெட் சிக்னல் காட்டியுள்ளார்.

ஐந்து கட்சிகளின் முட்டுக் கொடுப்பில் 108 இடங்களின் பலத்தோடு காலத்தைத் தள்ளிக் கொண்டிருக்கும் தவெக-வின் புதிய கூட்டணி அரசுக்கு, இடதுசாரிகளின் இந்தத் திடீர் போர்க்கொடி பெரும் தலைவலியாக மாறியுள்ளது. சட்டமன்றத் தேர்தலில் வென்ற கையோடு டெல்லி நாடாளுமன்ற மாநிலங்களவை இடத்தைக் கைப்பற்றவும், திருச்சி கிழக்கு தொகுதி இடைத்தேர்தலைச் சந்திக்கவும் முதலமைச்சர் விஜய் டாப் கியரில் வியூகம் அமைத்து வரும் வேளையில், கூட்டணியில் விரிசலை ஏற்படுத்தும் வகையில் சிபிஎம் விடுத்துள்ள இந்த பகிரங்க எச்சரிக்கை தமிழக அரசியல் அரங்கை அடியோடு உலுக்கியுள்ளது.

இதையும் படிங்க: சட்டப்பேரவையில் பதவியேற்காத சி.வி.சண்முகம்! சபாநாயகர் அறையில் ரகசிய பதவியேற்பு!

இதையும் படிங்க: அடேங்கப்பா..!! நம்ம தமிழக CM-க்கு மாசம் இவ்ளோ சம்பளமா..!! அப்போ அமைச்சர்கள், எம்.எல்.ஏ.க்களுக்கு..??