எஸ்ஐஆர் நடவடிக்கைக்கு எதிர்ப்புத் தெரிவித்தும், தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தியும், காங்கிரஸ் தலைமையிலான இந்தியா கூட்டணி சார்பில் இன்று பேரணி நடைபெற உள்ளது.
இந்தப் பேரணியானது ஜன்பத் பகுதியில் இருந்து தொடங்கி, உச்சநீதிமன்றத் தலைமை நீதிபதியை நேரில் சந்தித்து, இந்த விவகாரம் தொடர்பாக மனு அளித்து உரிய நடவடிக்கை எடுக்க வேண்டும் என்று கோரிக்கை விடுக்கும் வகையில் திட்டமிடப்பட்டிருந்தது.
இந்தப் பேரணியில் இந்தியா கூட்டணிக் கட்சிகளைச் சேர்ந்த நாடாளுமன்ற உறுப்பினர்கள் மட்டுமின்றி, கட்சி நிர்வாகிகள், மாணவர் அமைப்பினர், பொதுமக்கள் மற்றும் இளைஞர்களும் கலந்துகொள்ள வேண்டும் என்று ராகுல் காந்தி உள்ளிட்ட தலைவர்கள் அழைப்பு விடுத்துள்ளனர்.
இதையும் படிங்க: கைது செய்தாலும் பின்வாங்க மாட்டேன்! SIR நடவடிக்கைக்கு எதிராகப் போர்க்கொடி! அபிஜீத் தீப்கே பேச்சால் சர்ச்சை!
இதற்கு முன்பு இந்தியா கூட்டணி நடத்திய போராட்டங்களில் பெருமளவில் நாடாளுமன்ற உறுப்பினர்களும் கட்சித் தொண்டர்களுமே கலந்துகொண்டனர். ஆனால், இன்றைய பேரணியில் பொதுமக்களும் இளைஞர்களும் அதிக அளவில் பங்கேற்க வேண்டும் என்று ராகுல் காந்தி உள்ளிட்ட தலைவர்கள் அழைப்பு விடுத்துள்ளனர். இதனால், இன்று கணிசமான அளவில் மக்கள் கூட்டம் கூடும் என்று எதிர்பார்க்கப்படுகிறது.
இந்நிலையில், காங்கிரஸ் தலைவர்கள் தங்களைச் சந்திக்கக் கோரியதற்கு உச்சநீதிமன்றத் தலைமை நீதிபதி சூர்யகாந்த் நேற்று மறுப்புத் தெரிவித்ததாகத் தகவல் வெளியாகியுள்ளது. அரசியல் விவகாரங்களில் நீதிமன்றத்தை இழுப்பது சரியல்ல என்ற காரணத்தால், அவர்களைச் சந்திக்க முடியாது என்று தலைமை நீதிபதி தரப்பில் தெரிவிக்கப்பட்டதாகக் கூறப்படுகிறது.
இருப்பினும், திட்டமிட்டபடி பேரணி நடைபெறும் என்று இந்தியா கூட்டணி தரப்பில் அறிவிக்கப்பட்டுள்ளது.
இதன் காரணமாக, பேரணி செல்லும் பகுதிகளில் அமைந்துள்ள ஆறு மெட்ரோ ரயில் நிலையங்களில் பயணிகள் நுழைவதற்கும் வெளியேறுவதற்கும் தடை விதிக்கப்பட்டுள்ளது. குறிப்பாக, ஜன்பத், உச்சநீதிமன்றம், மண்டி ஹவுஸ் உள்ளிட்ட பகுதிகளில் அமைந்துள்ள ஆறு மெட்ரோ ரயில் நிலையங்களின் நுழைவு மற்றும் வெளியேறும் வாயில்கள் மூடப்பட்டுள்ளன.
பேரணியையொட்டி பாதுகாப்பு நடவடிக்கைகள் தீவிரப்படுத்தப்பட்டுள்ள நிலையில், குறிப்பிட்ட மெட்ரோ ரயில் நிலையங்களில் பயணிகளுக்கான கட்டுப்பாடுகளும் அமல்படுத்தப்பட்டுள்ளன.
இதையும் படிங்க: CJP நிறுவனர் அபிஜித் தீப்கே அதிரடி ARREST..! போராட்டம்.. பரபரப்பு..! டெல்லியில் போலீசார் குவிப்பு..!