சென்னை: சட்டசபை தேர்தலில் கூட்டணி கட்சிகளுக்கு ஒதுக்கப்பட்ட தொகுதிகளில் போட்டியிட விருப்ப மனு தாக்கல் செய்து பணம் கட்டிய தி.மு.க.,வினர், தங்கள் பணத்தை திரும்பத் தருமாறு கட்சி தலைமைக்கு கோரிக்கை விடுத்துள்ளனர். இது கட்சியினர் மத்தியில் பெரும் அதிருப்தியை ஏற்படுத்தியுள்ளது.

தேர்தல் அறிவிப்புக்கு முன்பாக தி.மு.க., 234 தொகுதிகள் மற்றும் புதுச்சேரியில் உள்ள 30 தொகுதிகளிலும் போட்டியிட விரும்புவோரிடம் இருந்து விருப்ப மனுக்களைப் பெற்றது. ஒவ்வொரு விண்ணப்பத்துக்கும் ₹1,000 படிவக் கட்டணத்துடன், பொதுத் தொகுதிகளுக்கு ₹25,000ம், மகளிர் மற்றும் தனித் தொகுதிகளுக்கு ₹15,000ம் கட்டணமாக நிர்ணயிக்கப்பட்டிருந்தது. இதன் மூலம் மொத்தம் ₹23 கோடிக்கு மேல் பணம் வசூலானதாகக் கூறப்படுகிறது.

கூட்டணி கட்சிகளுக்கு ஒதுக்கப்பட்ட தொகுதிகளில் விருப்ப மனு கொடுத்தவர்களுக்கு அந்தப் பணம் திரும்ப வழங்கப்படும் என்று தி.மு.க., தலைமை முன்பே அறிவித்திருந்தது. ஆனால் தேர்தல் முடிந்து ஒரு மாதம் ஆகியும் இதுவரை பணம் திருப்பித் தரப்படாத நிலையில், பாதிக்கப்பட்டவர்கள் கட்சித் தலைமைக்கு கடிதம் எழுதி, நேரடியாக சந்தித்து கோரிக்கை வைத்து வருகின்றனர்.

இதையும் படிங்க: Breaking News! விஜய்க்கு க்ரீன் சிக்னல் கொடுத்த திருமாவளவன்!! ஆதவ் கையில் ஆதரவு பத்திரம்?

“நாங்கள் நம்பிக்கையுடன் பணம் கட்டினோம். கூட்டணித் தொகுதி என்று தெரிந்திருந்தால் விண்ணப்பிக்கவே மாட்டோம். இப்போது பணம் திரும்பக் கேட்டால் கட்சிக்குள் பிரச்சினை வரும் என்கிறார்கள்” என்று பலரும் வருத்தம் தெரிவிக்கின்றனர். சிலர் தொகுதி மட்டுமல்ல, தங்கள் நேரமும் உழைப்பும் வீணாகிவிட்டதாகக் கூறுகின்றனர்.

தி.மு.க.,வினர் சிலர், “கட்சியின் நிதி நிலை கருதி சில காலம் அவகாசம் கொடுக்கலாம். ஆனால் முழுமையாக மறுப்பது சரியல்ல” என்றும், மற்றவர்கள் “உடனடியாக திருப்பித் தர வேண்டும்” என்றும் வலியுறுத்துகின்றனர். இந்த விவகாரம் கட்சியின் உள்ளாட்சி மற்றும் மாவட்ட அளவில் உள்ள நிர்வாகிகள் மத்தியில் பேச்சு பொருளாக மாறியுள்ளது.

தேர்தல் முடிவுகளுக்குப் பிறகு கட்சியில் பல்வேறு பிரச்சினைகள் எழுந்த நிலையில், விருப்ப மனு பணம் திரும்பக் கோரிக்கை மேலும் பதற்றத்தை அதிகரித்துள்ளது. இது தொடர்பாக தி.மு.க., தலைமை விரைவில் தீர்வு காண வேண்டும் என்ற எதிர்பார்ப்பு நிலவுகிறது.

இதையும் படிங்க: மூத்த நிர்வாகிகளுடன் மு.க.ஸ்டாலின் திடீர் ஆலோசனை! டி.ஆர்.பாலு., கே.என்.நேரு உள்ளிட்டோர் பங்கேற்பு!