அதிமுகவில் இருந்து விலகி தமிழக வெற்றிக் கழகத்தில் இணைந்தவர்களை மீண்டும் அதிமுகவுக்கு அழைத்து வர எடப்பாடி பழனிசாமி வியூகம் வகுத்துள்ளதாகக் கூறப்படுகிறது.

தமிழக வெற்றிக் கழகத்தில் புதிதாக இணைந்த, அதாவது அதிமுகவில் இருந்து விலகி தவெகவுக்குச் சென்ற பலர் தொடர்ந்து அதிருப்தியில் இருப்பதாகக் கூறப்படுகிறது. இதையடுத்து, அவர்களை அடையாளம் கண்டு மீண்டும் தாய்க் கழகத்தில் இணைப்பதற்காக அதிமுகவைச் சேர்ந்த சிலர் பேச்சுவார்த்தை நடத்தி வருவதாகத் தகவல் கிடைத்துள்ளது.

சமீபத்தில் நடைபெற்ற சட்டமன்றத் தேர்தலில் தமிழக வெற்றிக் கழகம் வெற்றி பெற்றது. அதேவேளையில், அதிமுக மூன்றாவது இடத்திற்குத் தள்ளப்பட்டது. இந்தச் சூழலில், பெரும்பான்மைக்குத் தேவையான இடங்கள் கிடைக்காத நிலையில், தவெகவுடன் கூட்டணி அமைத்திருந்தால் அதிமுக மேலும் வளர்ச்சி அடைந்திருக்கும் என்றும், கட்சியை உயிர்ப்புடன் வைத்திருக்க முடியும் என்றும் மூத்த நிர்வாகிகள் சிலர் ஆலோசனை வழங்கியதாகக் கூறப்படுகிறது.

ஆனால், எடப்பாடி பழனிசாமி அந்த ஆலோசனையை ஏற்காததால், பலர் அதிமுகவில் இருந்து விலகினர். தங்களது சட்டமன்ற உறுப்பினர் பதவி, மாவட்டச் செயலாளர் பதவி உள்ளிட்ட பல்வேறு பொறுப்புகளைத் துறந்துவிட்டு தமிழக வெற்றிக் கழகத்தில் இணைந்தனர். முன்னாள் அமைச்சர்கள், முன்னாள் சட்டமன்ற உறுப்பினர்கள், மாநிலப் பொறுப்புகளில் இருந்தவர்கள், மாவட்டச் செயலாளர்கள் எனப் பல்வேறு பொறுப்புகளை வகித்தவர்கள் தவெகவில் இணைந்தனர்.

அவ்வாறு தவெகவில் இணைந்தவர்களில் ஒரு சிலருக்கு மட்டுமே மீண்டும் பொறுப்புகள் வழங்கப்பட்டுள்ளன. துணைப் பொதுச்செயலாளர், மாவட்டச் செயலாளர் உள்ளிட்ட பொறுப்புகள் சுமார் 10 முதல் 12 பேருக்கு மட்டுமே வழங்கப்பட்டுள்ளதாகக் கூறப்படுகிறது.

ஆனால், முன்னாள் எம்.பி.க்களான பாலகங்கா, கே.என். ராமச்சந்திரன், திருவண்ணாமலை வனரோஜா, நெல்லை வசந்தி முருகேசன், திருச்சி இளவரசன் உள்ளிட்டோருக்கும், முன்னாள் சட்டமன்ற உறுப்பினர்களான அரக்கோணம் சூரவி, கலசப்பாக்கம் பன்னீர், ஆற்காடு சீனிவாசன், பூங்காநகர் சீனிவாசன், முன்னாள் டிஜிபி நடராஜன், தேனி தவசி, சேலம் செம்மலை உள்ளிட்ட பலருக்கும் இதுவரை எந்தப் பொறுப்பும் வழங்கப்படவில்லை எனக் கூறப்படுகிறது. இதனால் அவர்கள் கடும் அதிருப்தியில் இருப்பதாகத் தெரிகிறது.

இதுதவிர, மாவட்டச் செயலாளர்களாக இருந்த பலரும் அதிருப்தியில் இருப்பதாகக் கூறப்படுகிறது. கப்பச்சி வினோத், திருவண்ணாமலை ராஜன், சென்னை ராஜேஷ் உள்ளிட்ட பலர் அதிமுகவில் மாவட்டச் செயலாளர்களாகச் செயல்பட்டவர்கள். அவர்கள் கட்சியில் இருந்து விலகி தவெகவில் இணைந்தபோது, மீண்டும் அதே பொறுப்புகள் வழங்கப்படும் என உத்தரவாதம் அளிக்கப்பட்டதாகக் கூறப்படுகிறது. ஆனால், எதிர்பார்த்தபடி பொறுப்புகள் வழங்கப்படாததால் அவர்கள் அதிருப்தியில் இருப்பதாகத் தகவல் கிடைத்துள்ளது.

இந்த நிலையை அறிந்த எடப்பாடி பழனிசாமி, அதிமுகவில் இருந்து தவெகவுக்குச் சென்றவர்களை மீண்டும் கட்சிக்கு அழைத்து வருவதற்கான முயற்சிகளை மேற்கொண்டு வருவதாகக் கூறப்படுகிறது. முன்னாள் அமைச்சர்கள் மற்றும் முக்கிய நிர்வாகிகளுக்கு நெருக்கமானவர்களைப் பயன்படுத்தி, தவெகவில் இணைந்தவர்களிடம் பேச்சுவார்த்தை நடத்தத் திட்டமிட்டுள்ளதாகத் தெரிகிறது.

தவெகவில் தங்களுக்கு உரிய மரியாதையும் பொறுப்புகளும் கிடைக்கவில்லை என்பதால், மீண்டும் தாய்க் கழகத்திற்கே திரும்பி வருமாறும், அவர்கள் விரும்பும் பொறுப்புகளைப் பெற்றுத் தர நடவடிக்கை எடுக்கப்படும் என்றும் அதிருப்தியில் இருப்பவர்களிடம் தெரிவிக்கப்படுவதாகக் கூறப்படுகிறது.

தவெகவுக்குச் சென்றவர்கள் மீண்டும் அதிமுகவுக்குத் திரும்பினால், இனிமேல் அதிமுகவில் இருந்து யாரும் வெளியேற மாட்டார்கள் என்ற தோற்றத்தை உருவாக்க முடியும் என்பதும் இந்த முயற்சியின் பின்னணியில் உள்ள கணக்கீடாகக் கருதப்படுகிறது. அதேபோல், தவெகவின் செல்வாக்கு குறைந்துவிட்டதால்தான் அதிமுகவை நோக்கி நிர்வாகிகள் திரும்புகிறார்கள் என்ற அரசியல் பிம்பத்தையும் உருவாக்க முடியும் என அதிமுக தரப்பில் திட்டமிடப்படுவதாகக் கூறப்படுகிறது.

இதுதவிர, அதிமுகவின் அண்ணா தொழிற்சங்கத்தில் இருந்த தலைமைப் பொறுப்பாளர்கள், பொதுச்செயலாளர் மற்றும் செயலாளர் கமலக்கண்ணன் உள்ளிட்ட பலரும் விலகி தமிழக வெற்றிக் கழகத்தில் இணைந்துள்ளனர். தவெகவில் தொழிற்சங்கம் பதிவு செய்யப்பட்டிருந்தாலும், அது தொடர்பான அறிவிப்பு இன்னும் வெளியாகவில்லை எனக் கூறப்படுகிறது. இதன் காரணமாகவும் பலர் அதிருப்தியில் இருப்பதாகத் தெரிகிறது.

இவ்வாறு தமிழக வெற்றிக் கழகத்தில் அதிருப்தியில் இருப்பதாகக் கூறப்படும் முன்னாள் அதிமுக நிர்வாகிகளை மீண்டும் தாய்க் கழகத்திற்கு அழைத்து வருவதற்கான முயற்சிகளில் எடப்பாடி பழனிசாமி ஈடுபட்டுள்ளதாகச் செய்தியாளர் ராஜேஷ் தெரிவித்துள்ளார்.