இந்திய வம்சாவளியைச் சேர்ந்த நாசா விண்வெளி வீரர் டாக்டர் அனில் மேனன், ரஷ்யாவின் சோயுஸ் எம்.எஸ்.-29 விண்கலம் மூலம் சர்வதேச விண்வெளி நிலையத்தை பாதுகாப்பாக சென்றடைந்துள்ளார். தனது முதல் விண்வெளி பயணத்தை தொடங்கியுள்ள அவர், அடுத்த எட்டு மாதங்கள் விண்வெளியில் தங்கி பல்வேறு மருத்துவ மற்றும் தொழில்நுட்ப ஆய்வுகளில் ஈடுபட உள்ளார்.
அமெரிக்க விண்வெளி ஆய்வு நிறுவனமான நாசாவின் விண்வெளி வீரரான அனில் மேனன், ரஷ்ய விண்வெளி வீரர்களான பியோத்தர் துப்ரோவ் மற்றும் அன்னா கிகினாவுடன் கஜகஸ்தானில் உள்ள பைகோனூர் ஏவுதளத்தில் இருந்து சோயுஸ் எம்.எஸ்.-29 விண்கலத்தில் பயணத்தைத் தொடங்கினார். திட்டமிட்டபடி விண்கலம் சர்வதேச விண்வெளி நிலையத்தை வெற்றிகரமாக சென்றடைந்ததை நாசா உறுதிப்படுத்தியுள்ளது.
49 வயதான அனில் மேனனுக்கு இது முதல் விண்வெளி பயணம் என்றாலும், விண்வெளி மருத்துவம் தொடர்பாக ஏற்கனவே சிறப்பு அனுபவம் பெற்றவர். தற்போது நடைபெறும் இந்த நீண்டகால பயணத்தின் போது, விண்வெளியில் நீண்ட நாட்கள் தங்குவதால் மனித உடலில் ஏற்படும் மாற்றங்கள் குறித்து முக்கியமான ஆய்வுகளை அவர் மேற்கொள்ள உள்ளார்.
இதையும் படிங்க: 8 மாத கால விண்வெளி பயணம்! தயாராகிறார் அனில் மேனன்! இந்திய வம்சாவளியைச் சேர்ந்த நாசா விண்வெளி வீரர்!
குறிப்பாக, புவிஈர்ப்பு விசை இல்லாத சூழலில் மனித உடலின் ரத்த ஓட்டம், நரம்பு மண்டலம் மற்றும் உடலியல் செயல்பாடுகளில் ஏற்படும் மாற்றங்களை தனது உடலையே ஆய்வுக்கான மாதிரியாகக் கொண்டு அவர் ஆராயவுள்ளார். மேலும், எதிர்காலத்தில் நிலா மற்றும் செவ்வாய் போன்ற தொலைதூர விண்வெளி பயணங்களில் பூமியின் உதவியின்றி விண்வெளி வீரர்களே தங்களுக்குத் தேவையான மருத்துவ பரிசோதனைகளை மேற்கொள்ளும் தொழில்நுட்பங்களை உருவாக்கும் ஆய்வுகளிலும் அவர் பங்கேற்கிறார்.
இதனுடன், செயற்கை நுண்ணறிவு மற்றும் மேம்பட்ட மருத்துவ உபகரணங்களுக்கு தேவையான செமிகண்டக்டர்களை புவிஈர்ப்பு இல்லாத சூழலில் தயாரிக்கும் ஆய்வுகளும் இந்த பயணத்தின் முக்கிய அம்சமாகும். இந்த ஆய்வுகள் எதிர்கால விண்வெளி ஆராய்ச்சிகளுக்கும், பூமியில் மருத்துவத் தொழில்நுட்ப வளர்ச்சிக்கும் பயனளிக்கும் என நாசா தெரிவித்துள்ளது.
இந்திய வம்சாவளியைச் சேர்ந்த அனில் மேனனின் இந்த சாதனை, உலக விண்வெளி ஆராய்ச்சியில் இந்தியர்களின் பங்களிப்பை மேலும் வலுப்படுத்தும் முக்கிய நிகழ்வாகக் கருதப்படுகிறது.
இதையும் படிங்க: 8 மாத கால விண்வெளி பயணம்! தயாராகிறார் அனில் மேனன்! இந்திய வம்சாவளியைச் சேர்ந்த நாசா விண்வெளி வீரர்!