சென்னை: தமிழகத்தில் நடைபெற உள்ள மதுராந்தகம், தாராபுரம் சட்டமன்ற தொகுதி இடைத்தேர்தலில் திமுக போட்டியிடுமா என்பது குறித்து அக்கட்சியின் தலைவர் மு.க.ஸ்டாலின் இன்று கட்சி நிர்வாகிகளுடன் முக்கிய ஆலோசனை நடத்த உள்ளதாக தகவல் வெளியாகியுள்ளது. இதனால் இரு தொகுதிகளிலும் அரசியல் எதிர்பார்ப்பு அதிகரித்துள்ளது.

தமிழகத்தில் தற்போது 7 சட்டமன்ற தொகுதிகள் காலியாக உள்ள நிலையில், மதுராந்தகம் மற்றும் தாராபுரம் ஆகிய இரண்டு தொகுதிகளுக்கு மட்டும் தேர்தல் ஆணையம் இடைத்தேர்தலை அறிவித்துள்ளது. இதன்படி, அக்டோபர் 6-ம் தேதி இரு தொகுதிகளிலும் வாக்குப்பதிவு நடைபெற உள்ளது.

தேர்தல் அறிவிப்பு வெளியானதைத் தொடர்ந்து, அரசியல் கட்சிகள் தேர்தல் பணிகளை தீவிரப்படுத்தி வருகின்றன. குறிப்பாக, அதிமுக இந்த இரு தொகுதிகளிலும் போட்டியிடப்போவதாக ஏற்கனவே அறிவித்துள்ளது. மேலும், வேட்பாளர்களை தேர்வு செய்வதற்கான ஆரம்பகட்ட பணிகளையும் அக்கட்சி தொடங்கியுள்ளதாக கூறப்படுகிறது. இதன் ஒரு பகுதியாக விருப்ப மனுக்களும் விநியோகிக்கப்பட்டு வருகின்றன.

இதையும் படிங்க: மதுராந்தகம் இடைத்தேர்தல்: இன்று தொடங்கும் வேட்புமனு தாக்கல்! 9 பறக்கும் படைகள் தயார்! தேர்தல் நடத்தும் அலுவலர் நியமனம்!

இந்த சூழலில், திமுகவின் அடுத்தகட்ட நகர்வு என்ன என்பது அரசியல் வட்டாரத்தில் முக்கிய கேள்வியாகியுள்ளது. இதுகுறித்து கட்சியின் மாவட்ட செயலாளர்கள் மற்றும் முன்னணி நிர்வாகிகளுடன் ஸ்டாலின் இன்று ஆலோசனை நடத்த உள்ளதாக தெரிகிறது.

இந்த ஆலோசனையில் மதுராந்தகம், தாராபுரம் தொகுதிகளின் தற்போதைய களநிலை, கட்சியின் அமைப்பு பலம், உள்ளூர் அரசியல் சூழல் மற்றும் தொண்டர்களின் மனநிலை உள்ளிட்ட பல்வேறு அம்சங்கள் குறித்து கருத்துகள் கேட்கப்படலாம் என எதிர்பார்க்கப்படுகிறது.

மேலும், இடைத்தேர்தலில் திமுக நேரடியாக போட்டியிட வேண்டுமா, தேர்தலை எதிர்கொள்வதற்கான கட்சியின் தயார்நிலை எப்படி உள்ளது என்பது குறித்தும் ஆலோசனை நடைபெறலாம் என கூறப்படுகிறது.

குறிப்பாக, இரு தொகுதிகளிலும் அதிமுக போட்டியிடும் நிலையில், திமுகவின் முடிவு தேர்தல் களத்தில் முக்கிய தாக்கத்தை ஏற்படுத்தும் என அரசியல் பார்வையாளர்கள் கருதுகின்றனர்.

இன்றைய ஆலோசனைக்குப் பிறகு திமுகவின் நிலைப்பாடு குறித்த முக்கிய தகவல்கள் வெளியாகும் என எதிர்பார்க்கப்படுகிறது. இதனால் மதுராந்தகம் மற்றும் தாராபுரம் இடைத்தேர்தல் களம் அடுத்த கட்ட பரபரப்பை எட்டியுள்ளது.

இதையும் படிங்க: 15 நாட்களுக்குள் முடிக்க வேண்டும்! உதயநிதி, கனிமொழி, சபரீசன் கையில் முக்கிய தேர்வு! மு.க.ஸ்டாலின் கொடுத்த டாஸ்க்!