திருப்பூர் மாவட்டம் தாராபுரம் சட்டமன்ற இடைத்தேர்தல் பிரச்சாரக் களத்தில், ஆளும்கட்சியான தமிழக வெற்றிக் கழகத்தின் (தவெக) பெண் வேட்பாளர் திருமதி சத்யபாமா அவர்களைப் பற்றி மிகத் தரக்குறைவான வார்த்தைகளைப் பயன்படுத்திப் பேசியதோடு மட்டுமல்லாமல், அருவருக்கத்தக்க வகையில் அவரை உருவ கேலி (Body Shaming) செய்துள்ள திராவிட முன்னேற்றக் கழகத்தின் தலைவரும் முன்னாள் முதலமைச்சருமான திரு. மு.க. ஸ்டாலின் அவர்களின் பேச்சை வன்மையாகக் கண்டிப்பதாகவும், இந்த அநாகரிகப் பேச்சு முன்னாள் முதல்வரின் கடுமையான தோல்விப் பதற்றத்தையே வெளிச்சத்திற்குக் காட்டுகிறது என்றும் தவெக அமைச்சரும் முக்கியத் தலைவருமான அருண்ராஜ் அவர்கள் மிகக் காட்டமாகச் சாடியுள்ளார்.

தாராபுரம் தொகுதி இடைத்தேர்தலில் திமுக வேட்பாளரை ஆதரித்துப் பிரச்சாரம் மேற்கொண்ட திமுக தலைவர் மு.க. ஸ்டாலின், தவெக வேட்பாளர் சத்யபாமாவை விமர்சிக்கிறேன் என்ற பெயரில் எல்லை மீறிப் பேசியதாக ஆளும்கட்சியினர் மத்தியில் கடும் கொந்தளிப்பு ஏற்பட்டுள்ளது. இது தொடர்பாகத் தாராபுரத்தில் செய்தியாளர்களிடம் பேசிய அமைச்சர் அருண்ராஜ், "தாராபுரம் சட்டமன்றத் தொகுதியில் இன்று பிரச்சாரத்தில் ஈடுபட்ட திமுக தலைவரும், முன்னாள் முதலமைச்சருமான மு.க. ஸ்டாலின் , நமது வேட்பாளர் சகோதரி சத்யபாமா அவர்களைப் பற்றி மிகத் தரக்குறைவான, அநாகரிகமான வார்த்தைகளைப் பயன்படுத்தியதோடு, ஒரு பெண் என்றும் பாராமல் மிக மோசமாக உருவ கேலி செய்திருக்கிறார்; பொதுவாழ்வில் பல ஆண்டுகள் அனுபவம் வாய்ந்த ஒரு முன்னாள் முதலமைச்சரிடமிருந்து இத்தகைய தரம் தாழ்ந்த பேச்சு வெளிப்பட்டிருப்பது ஒட்டுமொத்த அரசியல் களத்திற்கே தலைகுனிவை ஏற்படுத்தியுள்ளது; இதனை நாங்கள் மிக வன்மையாகக் கண்டிக்கிறோம்" என்று ஆவேசமாகத் தெரிவித்தார்.

தொடர்ந்து, திமுகவின் தோல்வி பயத்தை விளாசிய அவர், "தாராபுரம் தொகுதியில் முதலமைச்சர் விஜய் அவர்களின் தலைமையில் மக்கள் மத்தியில் எழுந்துள்ள பேரலையைக் கண்டும், மகளிர் வாக்குகளை தவெக வேட்பாளர் அள்ளிக் குவிக்கப் போவதைப் பார்த்தும் திமுக தலைவர் நிலைதடுமாறிப் போயுள்ளார்; முன்னாள் முதலமைச்சர் எவ்வளவு பெரிய தோல்விப் பயத்திலும், நடுக்கத்திலும் இருக்கிறார் என்பதையே அவரது இந்த எல்லை மீறிய தரம் தாழ்ந்த வார்த்தைகள் அப்பட்டமாகக் காட்டுகின்றன.

இதையும் படிங்க: எங்கள் எம்.எல்.ஏ-க்களை தூக்கியபோதே உங்கள் ஆட்சி திருட்டு ஆட்சி: எடப்பாடி பழனிசாமி விளாசல்!

 அரசியலில் கொள்கை ரீதியாக மோத வக்கில்லாமல், தனிநபர் தாக்குதலிலும், உருவ கேலியிலும் ஈடுபடுவதுதான் திமுகவின் போலி 'திராவிட மாடல்' கலாச்சாரமா? தாராபுரம் தொகுதி மக்கள் மு.க. ஸ்டாலினின் இந்த ஆணவப் பேச்சைக் கவனித்துக் கொண்டுதான் இருக்கிறார்கள்; ஒரு பெண்ணை இழிவுபடுத்திய திமுகவிற்கு வரும் தேர்தலில் தாராபுரம் தாய்மார்களும் பொதுமக்களும் வாக்குச்சாவடியில் மறக்க முடியாத தகுந்த பாடத்தைப் புகட்டுவார்கள்" என்று அமைச்சர் அருண்ராஜ் எச்சரித்தார்.

இதையும் படிங்க: பாஜக-ன்னா அவ்ளோ பயமா சார்?: தாராபுரத்தில் முதலமைச்சர் விஜய்யை வெளுத்து வாங்கிய மு.க. ஸ்டாலின்!