திமுக பொதுச்செயலாளர் துரைமுருகன் எம்.ஜி.ஆரால் அடையாளம் காணப்பட்டு, மறைந்த முன்னாள் முதல்வர் கருணாநிதியால் அரசியல் ரீதியாக வளர்த்தெடுக்கப்பட்டவர் என்று முதல்வரும் திமுக தலைவருமான மு.க. ஸ்டாலின் தெரிவித்துள்ளார். துரைமுருகனின் இல்லத் திருமண விழாவில் பங்கேற்றுப் பேசிய அவர், துரைமுருகனின் அரசியல் பயணம், பேச்சாற்றல், சட்டப்பேரவை செயல்பாடுகள் உள்ளிட்ட பல்வேறு நிகழ்வுகளை நினைவுகூர்ந்தார்.
சட்டப்பேரவையில் எதிர்க்கட்சிகளுக்கு சிம்ம சொப்பனமாக விளங்கியவர்!
துரைமுருகன் பல அரசியல் தலைவர்களுடன் பழகியவர் என்றும், பல தேர்தல்களில் போட்டியிட்டு வெற்றி, தோல்விகளைச் சந்தித்தவர் என்றும் ஸ்டாலின் குறிப்பிட்டார். சட்டப்பேரவை விவாதங்களில் ஆணித்தரமாகப் பேசி எதிரணியினரையும் வியக்க வைத்தவர் துரைமுருகன் என்றார்.
நிர்வாகத் திறமை, உணர்ச்சிப்பூர்வமான பேச்சு, நகைச்சுவை உணர்வு ஆகியவற்றுடன் அறிவுப்பூர்வமான புள்ளிவிவரங்களையும் முன்வைத்து மக்களிடம் விழிப்புணர்வை ஏற்படுத்தியவர் என்றும் புகழாரம் சூட்டினார்.
இதையும் படிங்க: அன்பில் மகேஷ் கைது பழிவாங்கும் செயல்: திமுக பொதுச்செயலாளர் துரைமுருகன் பரபரப்பு பேட்டி!
ஒரு குறிப்பிட்ட விஷயம் குறித்து துரைமுருகனிடம் கேட்டால், அதோடு தொடர்புடைய வரலாறு, சம்பவம் நடைபெற்ற இடம், ஊர், தெரு, வீடு, அதில் பங்கேற்றவர்கள் என அனைத்தையும் விரிவாக எடுத்துரைக்கும் நினைவாற்றல் அவருக்கு இருப்பதாக ஸ்டாலின் தெரிவித்தார்.
எம்.ஜி.ஆர். ஆட்சியில் துரைமுருகனுக்கு விதிக்கப்பட்ட தண்டனை!
எம்.ஜி.ஆர். தலைமையில் அதிமுக ஆட்சி நடைபெற்ற காலத்தில், திமுக சார்பில் துரைமுருகன், க.சுப்பு, ரகுமான் கான் ஆகிய மூவரும் சட்டப்பேரவையில் ஆளுங்கட்சிக்கு கடும் சவாலாக விளங்கியதாக ஸ்டாலின் கூறினார். இதன் காரணமாக அன்றைய அதிமுக அரசு துரைமுருகன் மீது நடவடிக்கை எடுத்து, அவர் சட்டப்பேரவைக்கு வரக்கூடாது எனத் தண்டனை விதித்ததாகவும் குறிப்பிட்டார்.
அந்தத் தண்டனையையே அரசியல் பிரசாரத்துக்கான வாய்ப்பாக மாற்றியவர் கருணாநிதி. ‘இடி – மின்னல் – மழை’ என்ற தலைப்பில் மூவரையும் தமிழகம் முழுவதும் பிரசாரம் செய்ய அனுப்பினார். இதில் ‘மின்னல்’ என்ற தலைப்பில் துரைமுருகன் ஆற்றிய உரைகள் அன்றைய காலகட்டத்தில் பெரும் கவனம் பெற்றதாக ஸ்டாலின் நினைவுகூர்ந்தார்.
16 வயதில் கிளைக்கழகச் செயலாளர்!
துரைமுருகனின் சொந்த ஊரான காங்குப்பத்தில், அவரது அரசியல் பயணத்தின் தொடக்கத்தில் கருப்புச் சட்டையை அன்றைய காங்கிரஸ் கட்சியினர் எரித்ததாகவும், அதற்கு எதிராக அவர் போராடியதாகவும் ஸ்டாலின் தெரிவித்தார். அப்போது அன்னை சத்தியவாணி முத்துவை அழைத்து வந்து காங்குப்பத்தில் திமுக கிளைக்கழகத்தைத் தொடங்கிவைத்தார்.
தொடர்ந்து, தனது 16 வயதிலேயே கிளைக்கழகச் செயலாளராகப் பொறுப்பேற்ற துரைமுருகன், படிப்படியாக அரசியலில் உயர்ந்து இன்று திமுகவின் பொதுச்செயலாளர் என்ற முக்கியப் பொறுப்பை வகித்து வருவதாகக் குறிப்பிட்டார். 1965-ஆம் ஆண்டு இந்தி ஆதிக்க எதிர்ப்புப் போராட்டத்தின்போது தளபதியாக உருவெடுத்தவர் என்றும் பாராட்டினார்.
துரைமுருகனின் கல்விக்கு உதவிய எம்.ஜி.ஆர்.!
துரைமுருகனின் அரசியல் வாழ்க்கையில் எம்.ஜி.ஆருக்கும் முக்கியப் பங்கு இருந்ததாக ஸ்டாலின் தெரிவித்தார். 1963-ஆம் ஆண்டு சென்னை பச்சையப்பன் கல்லூரியில் நடைபெற்ற விழாவில் துரைமுருகன் சிறப்புரையாற்றியுள்ளார். அந்த விழாவில் பங்கேற்ற எம்.ஜி.ஆர்., அவரது பேச்சாற்றலைக் கண்டு வியந்து பாராட்டியதுடன், அவரது கல்விக்கும் உதவியதாக ஸ்டாலின் கூறினார்.
பின்னர் திருவண்ணாமலை இடைத்தேர்தலின்போது கே.வி.குப்பத்தில் நடைபெற்ற கூட்டத்தில் எம்.ஜி.ஆர்தான் துரைமுருகனை கருணாநிதியிடம் அறிமுகப்படுத்தி வைத்ததாகவும் அவர் தெரிவித்தார்.
எம்.ஜி.ஆர். அழைத்தும் கட்சி மாற மறுத்த துரைமுருகன்!
திமுகவிலிருந்து பிரிந்து எம்.ஜி.ஆர். தனிக்கட்சி தொடங்கியபோது, துரைமுருகனையும் தனது கட்சியில் சேருமாறு அழைத்ததாக ஸ்டாலின் கூறினார். அப்போது எம்.ஜி.ஆரின் அன்பையும், தனது கல்விக்கு அவர் செய்த உதவியையும் மதித்த துரைமுருகன், கொள்கை என்று வரும்போது தனது தலைவர் கலைஞர்தான் என்றும், அவருடனேயே தொடர்ந்து இருப்பேன் என்றும் பதிலளித்ததாக ஸ்டாலின் தெரிவித்தார்.
அந்த முடிவில் உறுதியாக இருந்து, இன்று வரை கருணாநிதி வளர்த்தெடுத்த திமுகவிலேயே தொடர்ந்து பணியாற்றி வருபவர் துரைமுருகன் என்றும் குறிப்பிட்டார். பொதுவாழ்வில் ஒருவர் எவ்வாறு இருக்க வேண்டும் என்பதற்கு துரைமுருகன் சிறந்த எடுத்துக்காட்டு என்றும் ஸ்டாலின் தனது உரையில் புகழ்ந்தார்.
இதையும் படிங்க: அக்டோபர் 17-ல் திமுக எம்.பி.க்கள் கூட்டம்: பொதுச்செயலாளர் துரைமுருகன் அறிவிப்பு!