தமிழகச் சட்டமன்றத் தேர்தல் நெருங்கி வரும் வேளையில், தேசிய முற்போக்கு திராவிடக் கழகத்தில் (தேமுதிக) பெரும் பரபரப்பு ஏற்பட்டுள்ளது. அக்கட்சியின் மூத்த நிர்வாகியும், மறைந்த கேப்டன் விஜயகாந்தின் நம்பிக்கைக்குரிய தளபதிகளில் ஒருவருமான 'மீசை' ராஜேந்திரன், தேமுதிகவிலிருந்து விலகுவதாக அதிரடியாக அறிவித்துள்ளார்.

தேமுதிகவின் பொதுச்செயலாளர் பிரேமலதா விஜயகாந்த் அவர்களுக்கு மீசை ராஜேந்திரன் தனது விலகல் கடிதத்தை அனுப்பியுள்ளார். அதில், தன்னை கட்சியின் அனைத்துப் பொறுப்புகளில் இருந்தும், அடிப்படை உறுப்பினர் தகுதியிலிருந்தும் விடுவிக்குமாறு அவர் கேட்டுக் கொண்டுள்ளார்.

மறைந்த கேப்டன் விஜயகாந்த் இருந்த காலம் வரை கட்சியில் மிகவும் செல்வாக்கு மிக்க நபராக வலம் வந்தவர் மீசை ராஜேந்திரன். கடந்த சில காலமாகவே கட்சியின் தலைமை எடுக்கும் முடிவுகளில் அவருக்கு உடன்பாடு இல்லை என்று கூறப்படுகிறது. குறிப்பாக, தற்போது தேர்தல் கூட்டணி மற்றும் வேட்பாளர் தேர்வில் மூத்த நிர்வாகிகளின் கருத்துகளுக்கு முக்கியத்துவம் அளிக்கப்படவில்லை என்ற அதிருப்தியில் அவர் இந்த முடிவை எடுத்துள்ளதாக அரசியல் வட்டாரங்கள் தெரிவிக்கின்றன.

இதையும் படிங்க: அண்ணாமலைக்கு டெல்லி மேலிடம் அவசர அழைப்பு! தனி விமானத்தில் பறந்ததால் தமிழக பாஜகவில் பரபரப்பு!

தேர்தல் களம் சூடுபிடித்துள்ள நிலையில், கட்சியின் முக்கிய முகம் மற்றும் நட்சத்திரப் பேச்சாளராக இருந்த மீசை ராஜேந்திரனின் விலகல், தேமுதிக தொண்டர்களிடையே பெரும் அதிர்ச்சியை ஏற்படுத்தியுள்ளது. இது கட்சியின் தேர்தல் களப்பணியில் தொய்வை ஏற்படுத்தலாம் எனக் கருதப்படுகிறது.

மீசை ராஜேந்திரன் தனது அடுத்தகட்ட அரசியல் நகர்வு குறித்து இன்னும் அதிகாரப்பூர்வமாக எவ்வித அறிவிப்பையும் வெளியிடவில்லை. இருப்பினும், அவர் வேறு ஏதேனும் முக்கியக் கட்சியில் இணைய வாய்ப்புள்ளதா அல்லது சுயேச்சையாகச் செயல்படுவாரா என்ற எதிர்பார்ப்பு எழுந்துள்ளது.

கேப்டன் விஜயகாந்தின் மறைவிற்குப் பிறகு தேமுதிகவை வழிநடத்தி வரும் பிரேமலதாவிற்கு, மூத்த நிர்வாகிகளின் இந்தத் தொடர் விலகல்கள் ஒரு பெரும் சவாலாகவே பார்க்கப்படுகிறது.

இதையும் படிங்க: 9 ஆண்டுகளுக்கு பிறகு இரட்டை இலைக்கு வாக்கு கேட்பது மகிழ்ச்சி! ராமபுரத்தில் டிடிவி தினகரன் நெகிழ்ச்சி!