தமிழக வெற்றிக் கழகத் தலைவரும் நடிகருமான விஜய் நடித்த கடைசி படமான 'ஜனநாயகன்' பொங்கல் வெளியீட்டுக்கு தயாராக இருந்த நிலையில், தற்போது நீதிமன்ற சிக்கலில் சிக்கித் தவிக்கிறது.

இந்தப் படத்துக்கு மத்திய திரைப்பட சான்றிதழ் வாரியம் (சிபிஎஃப்சி) சான்றிதழ் வழங்குவதில் தாமதம் ஏற்பட்டதால், தயாரிப்பாளர்கள் சென்னை உயர் நீதிமன்றத்தில் வழக்கு தொடர்ந்தனர். ஜனவரி 9-ஆம் தேதி காலை, தனி நீதிபதி பி.டி. ஆஷா உத்தரவுப்படி, உடனடியாக யு/ஏ 16+ சான்றிதழ் வழங்க வேண்டும் என்று சிபிஎஃப்சிக்கு உத்தரவிடப்பட்டது. 

ஆனால், அதே நாள் மாலை, சிபிஎஃப்சி தாக்கல் செய்த மேல்முறையீட்டு மனுவை விசாரித்த தலைமை நீதிபதி அமர்வு இந்த உத்தரவுக்கு இடைக்காலத் தடை விதித்தது. வழக்கு வரும் ஜனவரி 21-ஆம் தேதிக்கு ஒத்திவைக்கப்பட்டுள்ளது.

இதையும் படிங்க: #BREAKING: ஜனநாயகன் சென்சார் பிரச்சனை... சுப்ரீம் கோர்ட்டை நாடிய தயாரிப்பு நிறுவனம்..!

இதனால், பொங்கல் திருநாளுக்கு 'ஜனநாயகன்' திரைப்படம் வெளியாகாத நிலை ஏற்பட்டுள்ளது. இது தொடர்பாக பெரும் அரசியல் சர்ச்சை எழுந்துள்ளது.

காங்கிரஸ் கட்சி உள்ளிட்ட எதிர்க்கட்சிகள், "பா.ஜ.க தான் இந்த தடைக்கு காரணம்" என்று குற்றஞ்சாட்டி வருகின்றன. உள்துறை அமைச்சர் அமித் ஷாவின் உத்தரவுப்படி, மத்திய அரசு சிபிஎஃப்சியைப் பயன்படுத்தி படத்தை தடுப்பதாக காங்கிரஸ் எம்.பி.க்கள் மாணிக்கம் தாகூர், ஜோதிமணி உள்ளிட்டோர் பகிரங்கமாகக் கூறியுள்ளனர்.

ஆனால், அரசியல் விமர்சகர்கள் வேறு கோணத்தில் பார்க்கின்றனர். "எந்தப் படத்துக்கும் தடை விதிக்கப்பட்டால், பிறகு வெளியானால் அது மிகப்பெரிய வெற்றி பெறும். இதைத்தான் பா.ஜ.க விரும்புகிறது" என்று சிலர் கூறுகின்றனர்.

தடைக்குப் பிறகு படம் வெளியானால், இளைஞர்கள் மற்றும் பெண்கள் விஜய் பக்கம் ஒன்றிணைய வாய்ப்பு உள்ளது. இது 2026 சட்டமன்றத் தேர்தலில் தவெ.க.வுக்கு பெரும் பலமாக அமையும் என்றும் கூறப்படுகிறது.

மூன்று அணிகள் (திமுக, அதிமுக-பாஜக, தவெ.க) போட்டியிட்டால் திமுக தோல்வியடையும் என்பதால், இந்த தடை தவெ.க-காங்கிரஸ் கூட்டணியை உருவாக்கும் முயற்சியா என்ற கேள்வியும் எழுந்துள்ளது. ஆனால், காங்கிரஸ் மூத்த தலைவர்கள் சிலர் "காங்கிரஸ் கூப்பாடு போட்டாலும், தவெ.க-காங்கிரஸ் கூட்டணி வராது. கடைசியில் விஜய் அதிமுக-பாஜக கூட்டணியில் சேர்ந்து விடுவார்" என்று தனியாகக் கூறுகின்றனர்.

அரசியலில் எதுவும் சாத்தியம் என்று அவர்கள் சுட்டிக்காட்டுவது, முன்பு பாஜகவை 'சாமியார்கள் கட்சி' என்று கிண்டல் செய்த திமுக பின்னர் அதே பாஜகவுடன் கூட்டணி அமைத்து மத்தியில் அமைச்சர்களாக இருந்ததை உதாரணமாகக் காட்டுகின்றனர்.

இந்த சம்பவம் தமிழக அரசியலில் பெரும் அதிர்வலைகளை ஏற்படுத்தி வருகிறது. ஜனவரி 21-ஆம் தேதி நீதிமன்றத் தீர்ப்பு என்னவாக இருக்கும் என்பதை எதிர்பார்த்து அனைவரும் காத்திருக்கின்றனர்.

இதையும் படிங்க: சென்சருக்கு காலக்கெடு நிர்ணயம் தேவை... ஜனநாயகனுக்கு கமல்ஹாசன் MP ஆதரவு...!