தமிழக அரசியலில் இன்று ஒரு முக்கியமான திருப்பம் நிகழ்ந்துள்ளது. முன்னாள் முதலமைச்சரும், அதிமுகவில் இருந்து நீக்கப்பட்டவருமான ஓ. பன்னீர்செல்வம், சென்னை அண்ணா அறிவாலயத்தில் திமுக தலைவரும் முதலமைச்சருமான மு.க. ஸ்டாலினை சந்தித்து, திராவிட முன்னேற்றக் கழகத்தில் இணைந்தார். இந்த நிகழ்வு தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது, காரணம் 2026 சட்டமன்றத் தேர்தல் நெருங்கி வரும் நிலையில் இது ஒரு பெரிய மாற்றத்தை குறிக்கிறது.

ஓ. பன்னீர்செல்வம் அதிமுகவில் ஜெயலலிதாவின் நம்பிக்கைக்குரியவராக இருந்தவர். அவரது மறைவுக்குப் பிறகு கட்சியில் ஏற்பட்ட உள் மோதல்களால், எடப்பாடி பழனிசாமியுடன் ஏற்பட்ட கருத்து வேறுபாடுகளால் அவர் கட்சியிலிருந்து நீக்கப்பட்டார். அதன் பிறகு தனியாக செயல்பட்டு வந்த அவர், சமீப காலமாக திமுக அரசின் நல்லாட்சியை பாராட்டி வந்தார். குறிப்பாக, திமுக அரசின் திட்டங்கள் மக்களுக்கு பயனளிப்பதாகவும், திராவிட இயக்கத்தின் கொள்கைகளை காப்பாற்றுவதில் ஸ்டாலின் முன்னிலை வகிப்பதாகவும் அவர் பலமுறை குறிப்பிட்டிருந்தார்.

இன்று காலை, அவர் அண்ணா அறிவாலயத்துக்கு சென்றபோது, முதலமைச்சர் ஸ்டாலின் அவரை ஆரத்தழுவி வரவேற்றார். துணை முதலமைச்சர் உதயநிதி ஸ்டாலின் உள்ளிட்ட கட்சியின் மூத்த தலைவர்கள் பலரும் அங்கு இருந்தனர். ஸ்டாலின், ஓ. பன்னீர்செல்வத்துக்கு திமுக கொடியை அணிவித்து, உறுப்பினர் படிவத்தில் கையெழுத்திட வைத்து உற்சாகமாக வரவேற்றார். இது ஒரு சாதாரண அரசியல் இணைப்பு அல்ல; இரு தரப்பினரும் பெரும் மகிழ்ச்சியுடன் இதை கொண்டாடினர்.

இதையும் படிங்க: "தளபதி ஸ்டாலின்" … மீண்டும் திமுக ஆட்சிதான்… OPS நம்பிக்கை..!!!

ஓ. பன்னீர்செல்வம் அன்பானவர், பண்பானவர், அடக்கமானவர் என்று முதல்வர் ஸ்டாலின் புகழ்ந்தார். அவரை வருக வருக என வரவேற்பதாகவும், திராவிட இயக்கத்தின் கொள்கைகளை காப்பாற்றுவதில் அவரது வரவு நல்வரவாக அமையும் என்றும் தெரிவித்தார். 2026 சட்டமன்றத் தேர்தல் என்பது தமிழ்நாட்டுக்கும் பாசிச பா.ஜ.க.வுக்கும் இடையிலான ஜனநாயகப் போர் என்றும் இதனை உணர்ந்துதான் பல்வேறு ஜனநாயக சக்திகளும் கழகக் கூட்டணியில் இணைந்து வருகிறார்கள் என்று தெரிவித்தார். 

இதையும் படிங்க: #BREAKING: அறிவாலயத்தில் அம்மா விசுவாசி..! முதலமைச்சர் முன்னிலையில் OPS திமுகவில் ஐக்கியம்..!!