சென்னை: தமிழக சட்டமன்றத் தேர்தலில் பாஜகவுக்கு அதிமுக கூட்டணியில் ஒதுக்கப்பட்ட 27 தொகுதிகளில் சென்னையில் வெறும் ஒரு தொகுதியான மயிலாப்பூர் மட்டுமே கிடைத்துள்ளது. இந்த ஒரே தொகுதியிலாவது வெற்றி பெற வேண்டும் என்ற கட்டாயம் பாஜகவுக்கு ஏற்பட்டுள்ளதால், வேட்பாளர் தேர்வில் தீவிர ஆலோசனை நடைபெற்று வருகிறது. இதனால் பாஜகவின் முழு வேட்பாளர் பட்டியல் வெளியிடுவதில் தாமதம் ஏற்பட்டுள்ளது.

பாஜக வட்டாரங்கள் தெரிவித்தபடி, சென்னையில் தி.நகர், வேளச்சேரி, விருகம்பாக்கம், மயிலாப்பூர் ஆகிய நான்கு தொகுதிகளை கேட்டிருந்தாலும் மயிலாப்பூர் மட்டுமே ஒதுக்கப்பட்டது. முன்னாள் கவர்னர் தமிழிசை சௌந்தரராஜன் விருகம்பாக்கம் தொகுதியில் போட்டியிட விருப்பம் தெரிவித்திருந்தார். அந்த தொகுதி கிடைக்காததால், அவர் இப்போது மயிலாப்பூரில் காய் நகர்த்தி வருகிறார் என்று கூறப்படுகிறது.

மத்திய உள்துறை அமைச்சர் அமித் ஷா, தமிழகத்தில் பாஜக குறைந்தபட்சம் 10 தொகுதிகளில் வெற்றி பெற வேண்டும் என்று உறுதியாக உள்ளார். இதனால் ஏற்கனவே தயாரிக்கப்பட்ட வேட்பாளர் பட்டியலில் மாற்றம் செய்யப்பட்டு, அனைத்து தரப்பினரும் ஏற்றுக்கொள்ளும் வேட்பாளர்களை தேர்வு செய்யும் பணி நடைபெற்று வருகிறது. இந்த காரணத்தால்தான் வேட்பாளர் பட்டியல் வெளியிடுவது தாமதமாகி வருகிறது.

இதையும் படிங்க: கோவை வடக்கா? மொடக்குறிச்சியா? அண்ணாமலை களமிறங்குவது எங்கே? பாஜக வட்டாரங்களில் கசிந்த தகவல்!

குறிப்பாக மயிலாப்பூர் தொகுதியில் வெற்றி பெறுவது பாஜகவுக்கு மிக முக்கியமான இலக்காக உள்ளது. எனவே அங்கு யாரை நிறுத்தலாம் என்பது குறித்து கட்சி மேலிடம் தீவிரமாக ஆலோசித்து வருகிறது. முன்னாள் கவர்னர் தமிழிசையை மயிலாப்பூரில் நிறுத்தலாமா அல்லது செங்கல்பட்டு தொகுதியில் நிறுத்த திட்டமிடப்பட்டிருந்த பாஜக நிர்வாகி கே.டி.ராகவனை மயிலாப்பூருக்கு மாற்றலாமா என இரு தரப்பு ஆலோசனைகளும் நடைபெற்று வருவதாக தெரிகிறது.

தமிழிசை சௌந்தரராஜன் மயிலாப்பூரில் போட்டியிட்டால் அது பெரும் பரபரப்பை ஏற்படுத்தும் என எதிர்பார்க்கப்படுகிறது. அதேசமயம் கே.டி.ராகவன் உள்ளூர் பாஜக நிர்வாகிகளிடம் நல்ல செல்வாக்கு கொண்டவர் என்பதும் குறிப்பிடத்தக்கது. இரு பெயர்களும் மேலிடத்தின் இறுதி முடிவுக்காக காத்திருக்கின்றன.

தேர்தல் நெருங்கும் நிலையில் பாஜகவின் வேட்பாளர் அறிவிப்பு தாமதமாவது கட்சி வட்டாரத்தில் சலசலப்பை ஏற்படுத்தியுள்ளது. மயிலாப்பூரில் யார் போட்டியிடப் போகிறார் என்பது விரைவில் தெரியவரும் என எதிர்பார்க்கப்படுகிறது. இந்த முடிவு பாஜகவின் தமிழக தேர்தல் உத்தியில் முக்கிய திருப்புமுனையாக அமையும் என்று அரசியல் பார்வையாளர்கள் கருத்து தெரிவிக்கின்றனர்.

இதையும் படிங்க: இன்று பாஜ வேட்பாளர் பட்டியல் வெளியீடு!! வீடியோ கான்பரன்ஸில் கலந்து கொள்ளும் மோடி! அமித் ஷா!!