துரோக பட்டம் சூட்டுகிறார்கள்! துரோகி என்கிறார்கள்! திமுகவை விட்டு விலகியது ஏன்? திருமாவளவன் காட்டம்!

திருச்சி விமான நிலையத்தில் விடுதலை சிறுத்தைகள் கட்சித் தலைவர் தொல். திருமாவளவன் எம்.பி. செய்தியாளர்களைச் சந்தித்து பல்வேறு அரசியல் மற்றும் மக்கள் பிரச்சினைகள் குறித்து பேசினார். அப்போது, திமுக கூட்டணியில் இருந்து விசிக விலகியது தொடர்பாக தன் மீது முன்வைக்கப்படும் விமர்சனங்களுக்கு அவர் அளித்த பதில் அரசியல் வட்டாரத்தில் கவனம் பெற்றுள்ளது.

விடுதலை சிறுத்தைகள் கட்சி நீண்ட காலமாக திமுக கூட்டணியில் பயணித்ததாக குறிப்பிட்ட திருமாவளவன், தற்போது அந்த கூட்டணியில் இல்லாத நிலையில், பதவிக்காகவே திமுக கூட்டணியில் இருந்து வெளியேறியதாக சிலர் தவறான தோற்றத்தை உருவாக்கி வருவதாக குற்றம்சாட்டினார். இது தனது தலைமைத்துவத்தின் மீது நடத்தப்படும் தாக்குதலாகவே தான் பார்ப்பதாகவும் அவர் தெரிவித்தார்.

திமுகவுக்கு ஆதரவாக பேசுகிறோம் என்ற பெயரில் சிலர் தங்கள் கட்சி மீது தேவையற்ற அவதூறுகளை பரப்புவதாகவும், துரோகி என்ற பட்டத்தை சூட்டுவதாகவும் திருமாவளவன் கூறினார். கடந்த நான்கு மாதங்களாக இந்த விவகாரம் குறித்து தொடர்ந்து பேசி வருவதாகவும், திமுக தன்னை சுய விமர்சனம் செய்து கொள்ள வேண்டும் என்ற தேவையின் அடிப்படையிலேயே சில கருத்துகளை முன்வைத்ததாகவும் அவர் விளக்கம் அளித்தார்.

இதையும் படிங்க: மதுராந்தகம் மக்கள் மீண்டும் அந்தத் தவறை செய்ய மாட்டார்கள்! திருமாவளவனின் கணிப்புக்கு திமுக வேட்பாளர் பதில்!

முன்னாள் முதலமைச்சர் மு.க.ஸ்டாலின் காய்ச்சலால் பாதிக்கப்பட்டுள்ள நிலையில், அவர் விரைவில் குணமடைய வேண்டும் என திருமாவளவன் வாழ்த்து தெரிவித்தார். சென்னை திரும்பியதும் மருத்துவமனைக்கு சென்று ஸ்டாலினை நேரில் சந்தித்து நலம் விசாரிக்க உள்ளதாகவும் கூறினார்.

ஆர்ப்பாட்ட மேடைகளில் ஆ.ராசா மற்றும் சேகர்பாபு ஆகியோர் அரசியல் விமர்சனங்களைத் தாண்டி தனிநபர் மற்றும் பிறப்பு தொடர்பாக விமர்சித்திருப்பது அதிர்ச்சி அளிப்பதாகவும் திருமாவளவன் தெரிவித்தார். அரசியல் விமர்சனங்கள் நாகரிகமான முறையில் இருக்க வேண்டும் என்றும் அவர் வலியுறுத்தினார்.

குறுவை சாகுபடி, விவசாயிகளின் பயிர்க்கடன் தள்ளுபடி, பத்திரப்பதிவுத் துறை பணியாளர்களின் சம்பள நிலுவை, தமிழகத்தில் நிலவும் மின்வெட்டு உள்ளிட்ட பிரச்சினைகள் குறித்தும் அவர் கருத்து தெரிவித்தார். இடைத்தேர்தல்களில் பணத்தை கொடுத்து வாக்குகளை பெறும் நடைமுறையை தடுக்க தேர்தல் ஆணையம் தீவிர நடவடிக்கை எடுக்க வேண்டும் என்றும் வலியுறுத்தினார்.

அரசு பேருந்துகளில் தவெக கட்சி வர்ணம் பூசப்பட்டிருப்பது குறித்த கேள்விக்கு, அது ஏற்புடையதல்ல என திருமாவளவன் தெரிவித்தார். தற்போது விசிக தவெக கூட்டணியில் உள்ள அரசியல் சூழலில், திமுகவுடனான முந்தைய கூட்டணி குறித்து அவர் அளித்துள்ள இந்த விளக்கம் முக்கியத்துவம் பெற்றுள்ளது.

இதையும் படிங்க: மக்கள் உணர்வுகளுக்கு மதிப்பளிக்கணும்..! புதிய தலைமைச் செயலகம்… திருமா. கோரிக்கை..!!