தமிழக சட்டமன்றத் தேர்தல் 2026 நெருங்கி வரும் நிலையில், நடிகர் விஜய் தலைமையிலான தமிழக வெற்றிக் கழகம் (தவெக) மக்கள் மத்தியில் பெரும் எதிர்பார்ப்பை ஏற்படுத்தி வருகிறது. ரசிகர்கள் மத்தியில் உருவாகியுள்ள ஆதரவு அலை, சமூக வலைதளங்களில் பரவும் உற்சாகம் ஆகியவை கட்சியை ஒரு வலுவான அரசியல் சக்தியாகக் காட்டினாலும், தவெக நடத்திய ரகசியக் கணக்கெடுப்பு (சர்வே) முடிவுகள் கசிந்து வந்துள்ளன. இந்த ஆய்வில் மாநில அளவில் தவெக-வுக்கு 18 சதவீத வாக்கு வங்கி இருப்பதாகத் தெரிய வந்துள்ளது.

ஆனால் இந்த 18 சதவீத ஆதரவு குறித்து அரசியல் விமர்சகர்கள் மத்தியில் பெரும் சந்தேகம் எழுந்துள்ளது. காரணம், இந்த வாக்குகள் மாநிலம் முழுவதும் சீராகப் பரவியுள்ளன. அதாவது, சில தொகுதிகளில் மட்டும் குவிந்து இருக்காமல், அனைத்து தொகுதிகளிலும் பரவலாக உள்ளன. 

ஒரு தொகுதியில் வெற்றி பெற குறைந்தபட்சம் 35 முதல் 40 சதவீத வாக்குகள் தேவை என்பதால், 18 சதவீத வாக்குகள் எல்லா இடங்களிலும் கிடைத்தாலும், அது வெற்றியாக மாறுவதற்கு வாய்ப்பு மிகக் குறைவு என்று கணக்கிடப்பட்டுள்ளது.

இதையும் படிங்க: பிப்., 3-ல் கூட்டணி அறிவிப்பு!! மௌனம் கலைத்தார் பிரேமலதா? திமுக - அதிமுக - தவெக காத்திருப்பு!

இந்த சர்வே அறிக்கையின்படி, தவெக-வின் தற்போதைய வாக்கு வங்கி மற்ற கட்சிகளின் வெற்றி வாய்ப்பைப் பாதிக்கும் "வாக்குப் பிரிப்பாளர்" (Vote Splitter) நிலையிலேயே உள்ளது.

அதாவது, 18 சதவீத வாக்குகளைப் பெற்றாலும், சட்டமன்றத்தில் 1 அல்லது 2 இடங்களை மட்டுமே வெல்ல முடியும் என்று எச்சரிக்கப்பட்டுள்ளது. "ஒவ்வொரு தொகுதியிலும் 18 சதவீத வாக்குகளைப் பெறுவது என்பது தேர்தலில் தோல்வி அடையவே வழிவகுக்கும்" என்று அரசியல் ஆலோசகர்கள் கூறுகின்றனர்.

திமுக மற்றும் அதிமுக போன்ற கட்சிகளுக்கு குறிப்பிட்ட மண்டலங்களில் (கொங்கு மண்டலம், தென் தமிழகம் போன்றவை) வலுவான வாக்கு வங்கி உள்ளது. ஆனால் விஜய்யின் ஆதரவு ஒரு குறிப்பிட்ட பகுதிக்குள் அடங்காமல் மாநிலம் முழுவதும் சிதறிக் கிடப்பதால், அது கணித ரீதியாக வெற்றிக்கு உதவாது என்று கூறப்படுகிறது. இந்தத் தகவல் தவெக நிர்வாகிகள் மற்றும் தொண்டர்களிடையே ஒருவித கலக்கத்தை ஏற்படுத்தியுள்ளது.

இந்த சர்வே முடிவுகள் வெளியான பிறகு, தவெக தலைமைக்கு அரசியல் ஆலோசகர்கள் பல முக்கிய ஆலோசனைகளை வழங்கியுள்ளனர். முதலில், கூட்டணி அவசியம் என்று வலியுறுத்துகின்றனர். ஒரு குறிப்பிட்ட வாக்கு வங்கியை வைத்திருக்கும் மற்ற கட்சிகளுடன் கூட்டணி அமைத்தால் மட்டுமே இந்த 18 சதவீதத்தை 35 சதவீதமாக உயர்த்தி வெற்றி பெற முடியும். ஆனால் தற்போது கூட்டணி இல்லை என்ற நிலை உருவாகியுள்ளது.

அடுத்ததாக, 234 தொகுதிகளிலும் முழு கவனம் செலுத்தாமல், வெற்றி வாய்ப்பு அதிகம் உள்ள 40-50 தொகுதிகளைத் தேர்ந்தெடுத்து அங்கு மட்டும் அதீத கவனம் செலுத்த வேண்டும் என்ற ஆலோசனையும் வழங்கப்பட்டுள்ளது. அடுத்த மாதம் தொடங்கவுள்ள தேர்தல் பிரச்சாரங்களின் போது இந்தப் பரவலான ரசிகர் மன்ற பலத்தை ஒருமுகப்படுத்தப்பட்ட அரசியல் சக்தியாக விஜய் எப்படி மாற்றப் போகிறார் என்பதே அவரது அரசியல் எதிர்காலத்தைத் தீர்மானிக்கும் முக்கிய கேள்வியாக உள்ளது.

இதையும் படிங்க: இன்னும் ஒரு வாரம் தான்!! தேமுதிக - பாமக கூட்டணிக்கு டைம் குறித்த நயினார்! பலமாகும் NDA கூட்டணி!