வாஷிங்டனில் அமெரிக்கா மற்றும் கனடா இடையே மூன்று நாட்களாக நடைபெற்ற அவசர வர்த்தகப் பேச்சுவார்த்தை எந்தவித உடன்பாடும் எட்டப்படாமல் முடிவுக்கு வந்துள்ளது. இதையடுத்து, கனடாவில் இருந்து இறக்குமதி செய்யப்படும் சுமார் 20 பில்லியன் டாலர் மதிப்பிலான பொருட்களுக்கு அமெரிக்கா கூடுதலாக 50 சதவீத வரியை அமல்படுத்தியுள்ளதாக தெரிவிக்கப்பட்டுள்ளது.

அமெரிக்க அதிபர் டொனால்டு டிரம்ப் நிர்ணயித்திருந்த காலக்கெடு முடிவடைந்த நிலையில், இந்த புதிய வரி நடவடிக்கை அமலுக்கு வந்துள்ளது. இதனால் இரு நாடுகளுக்கும் இடையேயான வர்த்தக உறவில் மீண்டும் பதற்றம் அதிகரித்துள்ளது.

வாஷிங்டனில் அமெரிக்க வர்த்தக பிரதிநிதி ஜேமிசன் க்ரீர் மற்றும் கனடா வர்த்தக அமைச்சர் டொமினிக் லெப்லாங்க் தலைமையில் பேச்சுவார்த்தை நடைபெற்றது. எஃகு, அலுமினியம், ஆட்டோமொபைல் மற்றும் மரம் உள்ளிட்ட முக்கிய துறைகளில் கனடாவுக்கு குறிப்பிடத்தக்க வரிச்சலுகைகளை வழங்க அமெரிக்கா தயாராக இருந்ததாக கூறப்படுகிறது.

இதையும் படிங்க: டிரம்புக்கு எதிராக களமிறங்கிய 25 அமெரிக்க மாகாணங்கள்! சுங்க வரி விவகாரத்தில் வெடித்த சட்டப் போர்

ஆனால், பேச்சுவார்த்தையின் இறுதிக்கட்டத்தில் கனடா புதிய நிபந்தனைகளை முன்வைத்து, ஏற்கனவே ஏற்பட்ட புரிதல்களில் இருந்து பின்வாங்கியதாக அமெரிக்கா குற்றம்சாட்டியுள்ளது. இதனால் உடன்பாடு ஏற்படாமல் பேச்சுவார்த்தை முறிந்ததாக அமெரிக்க தரப்பு தெரிவித்துள்ளது.

அமெரிக்காவின் புதிய வரி நடவடிக்கைக்கு கனடா பிரதமர் மார்க் கார்னி கடும் எதிர்ப்பு தெரிவித்துள்ளார். அமெரிக்கா கடைசி நேரத்தில் முன்வைத்த புதிய நிபந்தனைகள் நியாயமற்றவை என்றும், கனடாவுக்கு பொருளாதார ரீதியாக ஏற்றுக்கொள்ள முடியாதவை என்றும் அவர் விமர்சித்துள்ளார்.

மேலும், கனடாவின் தொழிலாளர்கள் மற்றும் நிறுவனங்களை பாதுகாக்கும் வகையில், அமெரிக்கா விதிக்கும் வரிக்கு இணையான “டாலருக்கு டாலர்” பதிலடி வரி விதிக்கப்படும் என கார்னி எச்சரித்துள்ளார். வர்த்தகப் போரால் பாதிக்கப்படும் உள்நாட்டு தொழில்களுக்கு கூடுதல் நிதியுதவி மற்றும் ஆதரவு நடவடிக்கைகள் அறிவிக்கப்படும் என்றும் தெரிவித்துள்ளார்.

அமெரிக்காவின் புதிய வரி பல்வேறு கனடிய ஏற்றுமதிப் பொருட்களை பாதிக்கும் என கூறப்படுகிறது. ஹாக்கி மட்டைகள் முதல் மருத்துவ உபகரணங்கள் வரை பல பொருட்களின் விலைகளில் இதன் தாக்கம் இருக்கலாம்.

கடந்த ஆண்டில் அமெரிக்கா–கனடா இடையே சுமார் 880 பில்லியன் டாலர் மதிப்பிலான வர்த்தகம் நடைபெற்ற நிலையில், இரு நாடுகளுக்கும் இடையேயான வர்த்தக மோதல் மேலும் தீவிரமடைந்தால், வட அமெரிக்க பொருளாதாரத்தில் அதன் தாக்கம் கணிசமாக இருக்கும் என நிபுணர்கள் எச்சரிக்கின்றனர்.

இதையும் படிங்க: கடன் சுமையில் அமெரிக்கா! வரலாறு காணாத அளவுக்கு உயர்ந்த பொதுக்கடன்… டிரம்புக்கு புதிய சிக்கல்!