அதிமுகவில் இருந்து முன்னாள் எம்.எல்.ஏ.க்கள், எம்.பி.க்கள், மாவட்ட செயலாளர்கள் உள்ளிட்டோர் அடுத்தடுத்து விலகி வருகின்றனர். அதிமுக பொதுச்செயலாளராக எடப்பாடி பழனிசாமி பதவியேற்றதில் இருந்தே அடுத்தடுத்து தேர்தல்களில் கட்சி தோல்வியடைந்து வருவதை சுட்டிக்காட்டி, முன்னாள் அமைச்சர்கள் முதல் ஒன்றிய செயலாளர்கள் வரை விலகி வருகின்றனர். 

எம்.ஆர்.விஜயபாஸ்கர், சி.விஜயபாஸ்கர், உடுமலை ராதாகிருஷ்ணன், M.C.சம்பத், கடம்பூர் ராஜு, N.R.சிவதி உள்ளிட்ட முன்னாள் அமைச்சர்கள் உட்பட பலரும் அதிமுகவில் இருந்து விலகி தவெகவில் இணைந்துள்ளனர். தற்போது அதிமுகவின் முக்கிய நிர்வாகிகளில் ஒருவரான அப்சரா தனது பதவியை ராஜினாமா செய்வதாக அறிவித்துள்ளார். 

இதுகுறித்து அவர் வெளியிட்டுள்ள செய்தி அறிக்கையில், மிகுந்த கனத்த இதயத்துடன், அனைத்திந்திய அண்ணா திராவிட முன்னேற்றக் கழகத்திலிருந்து எனது ராஜினாமாவை சமர்ப்பிக்கிறேன்.

இதையும் படிங்க: அதிமுகவுக்கு குட்பை... தவெகவில் ஐக்கியம்! முதல்வர் விஜய் முன்னிலையில் இணைந்தார் சிங்கை ராமச்சந்திரன்!

அதிமுகவுடனான எனது தொடர்பு ஒருபோதும் வெறும் அரசியல் சார்ந்ததாக இருந்ததில்லை. புரட்சித் தலைவி அம்மா அவர்கள் மீது நான் கொண்டிருந்த ஆழ்ந்த மரியாதை, அன்பு மற்றும் அசைக்க முடியாத நம்பிக்கையின் அடிப்படையிலேயே அது அமைந்திருந்தது. அவரையே நான் எப்போதும் எனது அரசியல் உத்வேகமாகவும் தலைவராகவும் கருதி வந்துள்ளேன்.

மக்களை மையமாகக் கொண்ட, அவர்களின் கண்ணியம், உள்ளடக்கம் மற்றும் சேவையை அடிப்படையாகக் கொண்ட அம்மாவின் அரசியல் பார்வையில் நான் எப்போதும் நம்பிக்கை கொண்டிருந்தேன். என்னைப் பொறுத்தவரை, அரசியல் என்பது உடைப்பதை விட கட்டமைப்பதாகவும், ஒதுக்குவதை விட அனைவரையும் உள்ளடக்குவதாகவும், மக்களிடையே பிளவுகளை உருவாக்குவதை விட அவர்களை ஒன்றிணைப்பதாகவும் இருக்க வேண்டும்.

மேலும், கட்சியுடனான எனது பயணத்தின் முழுவதும் நீங்கள் எனக்கு வழங்கிய கண்ணியம், அன்பு, நம்பிக்கை மற்றும் மரியாதைக்காக எனது மனமார்ந்த நன்றியைப் பதிவு செய்கிறேன். உங்கள் மீதான எனது தனிப்பட்ட மரியாதையும் அன்பும் எப்போதும் மாறாது.

இந்த முடிவு கசப்புணர்வினாலோ அல்லது அவமரியாதையினாலோ எடுக்கப்பட்டதல்ல. எனது கொள்கைகளுக்கும், எனது பொது வாழ்க்கையை வழிநடத்தி வந்த அடிப்படைக் கொள்கைகளுக்கும் உண்மையாக இருக்க வேண்டும் என்ற ஆழ்ந்த சிந்தனையுடனும் உணர்வுப்பூர்வமாகவும் எடுக்கப்பட்ட முடிவாகும்.

எனது வாழ்க்கையின் முக்கியமான அத்தியாயத்தை வடிவமைத்த வாய்ப்புகள், பொறுப்புகள், நட்புகள் மற்றும் அனுபவங்களை வழங்கியதற்காக கட்சிக்கு நன்றியுடன் விடைபெறுகிறேன். அதிமுகவுடனான எனது தொடர்பையும், அந்த அமைப்பின் மூலம் மக்களுக்கு சேவை செய்யும் வாய்ப்பையும் நான் எப்போதும் மதிப்புடன் நினைவுகூர்வேன்.

எனது அரசியல் பயணம் இனி வேறு ஒரு திசையில் செல்லக்கூடும். ஆனால் மக்களுக்குச் சேவை செய்வதற்கான எனது அர்ப்பணிப்பு மாறாது. அம்மாவின் அடிச்சுவடுகளைப் பின்பற்றி, மக்களுடன் நிற்பதும், குரல் கொடுக்க வேண்டியவர்களின் குரலை வலுப்படுத்துவதும், பாலங்களை உருவாக்குவதும், துணிவு, இரக்கம் மற்றும் கண்ணியத்துடன் சேவை செய்வதும் தொடரும்.

இந்த அரசியல் முடிவைத் தாண்டியும் நமக்கிடையேயான தனிப்பட்ட அன்பும் மரியாதையும் தொடர்ந்து நிலைத்திருக்க வேண்டும் என மனதார விரும்புகிறேன்.

ஆழ்ந்த மரியாதை, நன்றியுணர்வு மற்றும் அன்புடன்,

அப்சரா

அதிமுக துணைப் பிரச்சாரச் செயலாளர் மற்றும் அதிகாரப்பூர்வ செய்தித் தொடர்பாளர்
புரட்சித் தலைவி அம்மாவால் நியமிக்கப்பட்ட அதிகாரப்பூர்வ செய்தித் தொடர்பாளர் என குறிப்பிட்டுள்ளார். 

இதையும் படிங்க: ”இரண்டு கட்சியும் ஒண்ணு சேருறீங்களா?”.... வார்த்தையை விட்ட சபாநாயகர்... திமுக, அதிமுகவினர் கொந்தளிப்பு...!