2026-ஆம் ஆண்டு நடைபெற உள்ள தமிழகச் சட்டமன்றத் தேர்தலுக்கான ஆயத்தப் பணிகளை அதிமுக இப்போதே அதிரடியாகத் தொடங்கியுள்ளது. இதன் ஒரு பகுதியாக, கட்சியின் மாவட்டச் செயலாளர்களின் முக்கிய ஆலோசனைக் கூட்டத்திற்கு அதிமுக தலைமை அழைப்பு விடுத்துள்ளது.
அதிமுக பொதுச்செயலாளர் எடப்பாடி கே. பழனிசாமி தலைமையில் நடைபெறும் இக்கூட்டத்தில், விருப்பமனு விநியோகம், பூத் கமிட்டி அமைத்தல் மற்றும் வரும் தேர்தலில் மேற்கொள்ள வேண்டிய அரசியல் நகர்வுகள் குறித்து விரிவாக விவாதிக்கப்பட உள்ளதாகத் தெரிகிறது.
தமிழக அரசியல் களம் 2026 சட்டமன்றத் தேர்தலை நோக்கி நகர்ந்து வரும் சூழலில், பிரதான எதிர்க்கட்சியான அதிமுக தனது தேர்தல் பணிகளைத் துரிதப்படுத்தியுள்ளது. வரும் டிசம்பர் 31-ஆம் தேதி புதன்கிழமை அன்று, அதிமுக மாவட்டச் செயலாளர்களின் முக்கிய ஆலோசனைக் கூட்டம் நடைபெற உள்ளதாக அக்கட்சியின் தலைமை அதிகாரப்பூர்வமாக அறிவித்துள்ளது.
இதையும் படிங்க: ராயப்பேட்டையில் அலைமோதும் கூட்டம்! அதிமுக வேட்பாளர் விருப்பமனு நீட்டிப்பு - எடப்பாடியார் அதிரடி!
சென்னை ராயப்பேட்டையில் உள்ள அதிமுக தலைமை அலுவலகமான ‘புரட்சித் தலைவர் எம்.ஜி.ஆர் மாளிகையில்’ நடைபெற உள்ள இக்கூட்டத்திற்கு, அக்கட்சியின் பொதுச்செயலாளர் எடப்பாடி கே. பழனிசாமி தலைமை தாங்குகிறார். இந்த ஆண்டின் கடைசி நாளில் நடைபெற உள்ள இக்கூட்டம், அரசியல் ரீதியாக மிகுந்த முக்கியத்துவம் வாய்ந்ததாகக் கருதப்படுகிறது. தற்போது நடைபெற்று வரும் வேட்பாளர் விருப்பமனு விநியோகம், தொகுதி வாரியான கள நிலவரங்கள் மற்றும் ஆளுங்கட்சிக்கு எதிரான போராட்டங்களை முன்னெடுப்பது குறித்து மாவட்டச் செயலாளர்களுக்கு இபிஎஸ் முக்கிய அறிவுறுத்தல்களை வழங்குவார் என எதிர்பார்க்கப்படுகிறது.
மேலும், 2026 தேர்தலுக்கான கூட்டணி வியூகங்கள் மற்றும் பூத் கமிட்டிகளைப் பலப்படுத்துவது குறித்தும் இக்கூட்டத்தில் ஆலோசிக்கப்பட வாய்ப்புள்ளது. புத்தாண்டு பிறப்பதற்கு முன்பாக கட்சியின் அனைத்து மாவட்டச் செயலாளர்களையும் அழைத்து இபிஎஸ் ஆலோசனை நடத்துவது, தொண்டர்களிடையே ஒரு புத்துணர்ச்சியை ஏற்படுத்தியுள்ளது. இந்தக் கூட்டத்தில் நிறைவேற்றப்படும் தீர்மானங்கள் மற்றும் எடுக்கப்படும் முடிவுகள் தமிழக அரசியலில் அடுத்தகட்ட நகர்வுகளைத் தீர்மானிக்கும் என அரசியல் ஆர்வலர்கள் கருத்து தெரிவித்து வருகின்றனர்.
இதையும் படிங்க: "நீக்கினா தவெக-தான்!" - இபிஎஸ்-ஸை கடுப்பேற்றிய மாஜி எம்.எல்.ஏ! செங்கோட்டையன் ஆசியுடன் விஜய் கட்சிக்கு தாவல்?