முன்னாள் அமைச்சர் கீதா ஜீவன், செவிலியர்களுக்கு எதிரான அண்மை நடவடிக்கைகளைக் கடுமையாகக் கண்டித்துள்ளார். சம வேலைக்கு சம ஊதியம் உள்ளிட்ட 15 அம்சக் கோரிக்கைகளை வலியுறுத்தி ஆர்ப்பாட்டம் செய்த ஆயிரத்துக்கும் மேற்பட்ட செவிலியர்களைக் கொடூரமாகத் தாக்கி கைது செய்திருப்பது கடும் கண்டனத்துக்குரியது என அவர் தெரிவித்துள்ளார்.

தமிழக வெற்றிக் கழகம் ஆட்சிக்கு வந்த முதல் நாளிலேயே இடைகாலப் பணியாளர்கள் பொறுப்பில் இருக்கும் செவிலியர்களைப் பணி நிரந்தரம் செய்வோம் என்று வாக்குறுதி அளித்திருந்தது. ஆட்சிக்கு வந்து ஐந்து மாதங்கள் ஆன நிலையில், சென்னை ராஜரத்தினம் மைதானத்தில் பணி நிரந்தரம் உள்ளிட்ட கோரிக்கைகளை நிறைவேற்றக் கோரி அறவழியில் ஆர்ப்பாட்டம் நடத்தியிருக்கிறார்கள் செவிலியர்கள்.

இப்பிரச்சினையை அரசுத் தரப்பில் பேச்சுவார்த்தை நடத்தி சுமூகமாகத் தீர்த்திருக்க வேண்டிய ஆட்சியாளர்கள், காவல்துறையை ஏவிவிட்டுத் தாக்குதல் நடத்தி கொலை மிரட்டல் விடுத்திருக்கிறது தமிழக வெற்றிக் கழக அரசு. அதில் செவிலியர் ஒருவரின் குழந்தை காவல்துறையினரால் தாக்கப்பட்டிருப்பது கொடூரத்தின் உச்சம் என்று கீதா ஜீவன் சுட்டிக்காட்டியுள்ளார்.தன்னைத் தாய்மாமன், அண்ணன் எனத் தம்பட்டம் அடித்துக்கொள்ளும் முதல்வர் விஜய், பெண்களையும் குழந்தைகளையும் நடத்தும் முறை இதுதானா எனக் கேள்வி எழுப்பியுள்ளார்.

இதையும் படிங்க: ஜெம் வீரமணி விவகாரம்... ரூ.1 கோடி மான நஷ்ட ஈடு வழக்கு... அமைச்சர்கள் மேல்முறையீடு..!!

திட்டங்களுக்கெல்லாம் ‘சீர்... சீர்’ எனப் பெயர் வைத்துக்கொண்டு ஜனநாயக உரிமைகளைச் சீரழிப்பதுதான் நீங்கள் சொன்ன மாற்றமா முதல்வரே என அவர் வினவியுள்ளார். அண்ணனாக, தம்பியாக இருப்பதெல்லாம் இருக்கட்டும், முதலில் மனிதத்தன்மையுடன் ஆட்சி நடத்தக் கற்றுக்கொள்ளுங்கள் என அறிவுறுத்தியுள்ளார்.தமிழக அரசை எதிர்த்துப் போராடினால் இதுதான் கதி எனப் பகிரங்கமாக மிரட்டல் விடுக்கும் தமிழக வெற்றிக் கழக அரசின் பாசிசப் போக்குக்குக் கடும் கண்டனங்களைத் தெரிவித்துள்ளார் கீதா ஜீவன். கைதான செவிலியர்களை உடனடியாக விடுவித்து, அவர்களது கோரிக்கைகளை நிறைவேற்ற வேண்டும் என அவர் வலியுறுத்தியுள்ளார்.

இதையும் படிங்க: தாய்மாமன் தடியடி திட்டமா முதல்வர் விஜய்? செவிலியர்கள் மீதான தாக்குதலுக்கு திமுக கடும் கண்டனம்!