தஞ்சாவூர்: தமிழகத்தில் காலியாக உள்ள சுமார் 9,000 உதவிப் பேராசிரியர் பணியிடங்களை அடுத்த இரண்டு ஆண்டுகளுக்குள் ஆசிரியர் தேர்வு வாரியம் (TRB) மூலம் நிரப்ப நடவடிக்கை எடுக்கப்பட்டு வருவதாக உயர்கல்வித்துறை அமைச்சர் பி. விஸ்வநாதன் தெரிவித்துள்ளார். தஞ்சாவூர் குந்தவை நாச்சியார் மகளிர் கல்லூரியில் நடைபெற்ற நிகழ்ச்சியில் பங்கேற்ற அவர், பின்னர் செய்தியாளர்களிடம் இதனைத் தெரிவித்தார்.

தமிழக அரசு கலை மற்றும் அறிவியல் கல்லூரிகளில் உள்ள பேராசிரியர் காலியிடங்களை கட்டம் கட்டமாக நிரப்பும் பணிகள் நடைபெற்று வருவதாக அமைச்சர் கூறினார். முதல் கட்டமாக நடத்தப்பட்ட தேர்வு மூலம் 2,708 உதவிப் பேராசிரியர்கள் நியமிக்கப்பட உள்ளதாகவும், இதற்காக சுமார் 42 ஆயிரம் பேர் விண்ணப்பித்த நிலையில், 27 ஆயிரம் பேர் தேர்ச்சி பெற்றுள்ளதாகவும் அவர் தெரிவித்தார்.

அடுத்ததாக மேலும் இரண்டு கட்டங்களாக TRB தேர்வுகள் நடத்தப்பட உள்ளதாகவும், ஒவ்வொரு கட்டத்திலும் சுமார் 3,000 பேர் தேர்வு செய்யப்படுவார்கள் என்றும் அமைச்சர் கூறினார். இதன் மூலம் மொத்தம் 9,000 காலியிடங்களையும் இரண்டு ஆண்டுகளுக்குள் நிரப்புவதே அரசின் நோக்கம் என அவர் தெரிவித்தார். அரசு கல்லூரிகளில் பணியாற்றி வரும் கௌரவ விரிவுரையாளர்களும் இந்தத் தேர்வு நடைமுறையில் பங்கேற்க உள்ளதாகவும் அமைச்சர் குறிப்பிட்டார்.

இதையும் படிங்க: மதுரை மாணவன் மரணம்! 16 நாட்களுக்கு பின் உறவினர்களிடம் உடல் ஒப்படைப்பு! போராட்டத்தை கைவிடாத குடும்பத்தினர்!

இதற்கிடையே தமிழக பல்கலைக்கழகங்களில் துணைவேந்தர் நியமனம் தொடர்பான விவகாரம் குறித்தும் அமைச்சர் பேசினார். சில நியமனங்கள் தொடர்பான வழக்குகள் உயர்நீதிமன்றம் மற்றும் உச்சநீதிமன்றத்தில் நிலுவையில் இருப்பதால், விவகாரம் குறித்து விரிவாக பேச முடியாது என அவர் தெரிவித்தார். அதே நேரத்தில் பல்கலைக்கழகங்களுக்கு துணைவேந்தர்கள் நியமிக்கப்பட வேண்டியது அவசியம் என்றும் கூறினார்.

துணைவேந்தர் நியமனம் தொடர்பாக முதலமைச்சர் மற்றும் ஆளுநர் இடையே பேச்சுவார்த்தைகள் நடைபெற்று வருவதாக அமைச்சர் தெரிவித்தார். முந்தைய காலங்களில் காணப்பட்ட மோதல் சூழலைப் போல இல்லாமல், தற்போதைய அரசு பிரச்சினைக்கு தீர்வு காணும் நோக்கில் சுமுகமான பேச்சுவார்த்தையை முன்னெடுத்து வருவதாக அவர் கூறினார்.

நியமனங்களில் மேலும் தாமதம் ஏற்பட்டால், பல்கலைக்கழகங்களின் நிர்வாகத்தை மேற்கொள்ள மூத்த பேராசிரியர்களை பொறுப்பு துணைவேந்தர்களாக நியமிக்கும் நடவடிக்கையும் எடுக்கப்பட்டுள்ளதாக அமைச்சர் தெரிவித்தார். இதனால் உயர்கல்வித் துறையில் நீண்டகாலமாக நிலவி வரும் பேராசிரியர் மற்றும் துணைவேந்தர் காலியிடங்களுக்கு அடுத்த இரண்டு ஆண்டுகளில் தீர்வு காணும் நடவடிக்கைகள் தீவிரப்படுத்தப்பட்டுள்ளன.

இதையும் படிங்க: தவெக ஆட்சி சொன்ன வெளிப்படைத்தன்மை எங்கே? கோவை மாநகராட்சியில் மீண்டும் சர்ச்சை!