ஈரான் மீது அமெரிக்கா திட்டமிட்டிருந்த ராணுவத் தாக்குதல் தற்காலிகமாக ஒத்திவைக்கப்பட்டுள்ளதாக அமெரிக்க அதிபர் Donald Trump அறிவித்திருப்பது உலக அரசியலில் பெரும் பரபரப்பை ஏற்படுத்தியுள்ளது. மத்திய கிழக்கு நாடுகளின் வேண்டுகோளையும், நடைபெற்று வரும் தீவிர பேச்சுவார்த்தைகளையும் கருத்தில் கொண்டு இந்த முடிவு எடுக்கப்பட்டுள்ளதாக அவர் தெரிவித்துள்ளார்.

நிருபர்களிடம் பேசிய டிரம்ப், “ஈரான் அணு ஆயுதம் பெறுவதை அமெரிக்கா ஒருபோதும் அனுமதிக்காது. ஆனால் தற்போதைய சூழலில் பல நாடுகள் அமைதியான தீர்வை நோக்கி முயற்சி செய்து வருகின்றன. சவூதி அரேபியா, கத்தார் மற்றும் ஐக்கிய அரபு அமீரகம் உள்ளிட்ட நாடுகள் நேரடியாக என்னைத் தொடர்புகொண்டு தாக்குதலை சில நாட்களுக்கு ஒத்திவைக்குமாறு கேட்டுக்கொண்டன. ஈரானை குண்டுவீசி தாக்காமல் ஒரு நல்ல முடிவை எட்ட முடிந்தால் அதுவே சிறந்தது” என்று கூறினார்.

மேலும், “ஈரானுடன் மிக விரிவான பேச்சுவார்த்தைகள் நடந்து வருகின்றன. இது சாதகமான முன்னேற்றமாகத் தெரிகிறது. இருப்பினும் இறுதியில் ஒப்பந்தம் உருவாகுமா என்பதை பொறுத்திருந்து பார்க்க வேண்டும்” என்றும் டிரம்ப் தெரிவித்தார்.

இதையும் படிங்க: ஈரானுக்கு ரெண்டே வழிதான் இருக்கு!! பேச்சுவார்த்தையா? போரா? முடிவுபண்ணிக்குங்க! ட்ரம்ப் மிரட்டல்

இதற்கு முன்பு சமூக வலைதளத்தில் வெளியிட்ட பதிவிலும் அவர் இதே கருத்தை வலியுறுத்தியிருந்தார். கத்தார் அமீர் ஷேக் தமீம் பின் ஹமாத் அல் தானி, சவுதி அரேபிய பட்டத்து இளவரசர் முகமது பின் சல்மான் மற்றும் ஐக்கிய அரபு அமீரக அதிபர் முகமது பின் சயத் அல் நஹ்யான் ஆகியோர் நேரடியாகத் தொடர்புகொண்டு தாக்குதலை நிறுத்துமாறு கேட்டதாக டிரம்ப் குறிப்பிட்டுள்ளார்.

அவர்களின் வேண்டுகோளையும், மத்திய கிழக்கில் அமைதி நிலவ வேண்டிய அவசியத்தையும் கருத்தில் கொண்டு, திட்டமிடப்பட்ட தாக்குதலை தற்காலிகமாக நிறுத்த உத்தரவிட்டதாக அவர் தெரிவித்தார். அதேசமயம், பேச்சுவார்த்தைகள் தோல்வியடைந்தால் எந்த நேரத்திலும் ஈரான் மீது பெரிய அளவிலான தாக்குதலை நடத்த அமெரிக்க ராணுவம் தயார் நிலையில் இருக்க வேண்டும் என்றும் அவர் எச்சரித்துள்ளார்.

இந்த அறிவிப்பு வெளியானதும் உலக சந்தைகள் மற்றும் மத்திய கிழக்கு அரசியல் வட்டாரங்களில் பரபரப்பு ஏற்பட்டுள்ளது. அமெரிக்கா-ஈரான் உறவில் அடுத்த சில நாட்கள் மிகவும் முக்கியமானதாக பார்க்கப்படுகிறது.

இதையும் படிங்க: ஈரானின் பொருளாதாரம் வீழ்ச்சி அடைந்து வருகிறது! கச்சா எண்ணெய்யில் வருமானம் இல்லை!! ட்ரம்ப் சூசகம்!