மதுரை மாவட்டம் சமயநல்லூரில் சரித்திரப் பதிவேடு குற்றவாளி சூர்யா படுகொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது. நேற்று இரவு 11.30 மணியளவில் நடந்த இந்தச் சம்பவம் தொடர்பாக மதுரை மாவட்ட எஸ்.பி. தேவநாதன் இன்று காலை சமயநல்லூர் காவல் நிலையத்திற்கு வருகை தந்து செய்தியாளர்களிடம் விளக்கினார்.சூர்யா மீது ஏற்கனவே பத்துக்கும் மேற்பட்ட அடிதடி மற்றும் கொலை வழக்குகள் பதிவு செய்யப்பட்டிருந்த நிலையில், அவர் காவல்துறையின் தொடர் கண்காணிப்பில் இருந்து வந்தார்.

கடந்த 26ஆம் தேதி நீதிமன்றத்தில் ஆஜர்படுத்தப்பட்டபோது பிணையில் விடப்பட்ட அவர், அதற்குப் பிறகு இந்தச் சம்பவத்தில் உயிரிழந்துள்ளார். ஆரம்பத்தில் அடையாளம் தெரியாத நபர்களால் கொலை செய்யப்பட்டதாகக் கூறப்பட்ட நிலையில், உடலை உடற்கூறு ஆய்வுக்கு அனுப்பிய பிறகு முதல் கட்ட விசாரணையில் புதிய தகவல்கள் வெளியாகியுள்ளன.சூர்யா தனது நண்பர்களுடன் நேற்று இரவு சமயநல்லூர் பகுதியில் மது அருந்திக்கொண்டிருந்தபோது வாய்ச்சண்டை ஏற்பட்டுள்ளது.

அதைத் தொடர்ந்து கம்பு மற்றும் கட்டைகளைக் கொண்டு அவரது நண்பர்களே அவரைத் தாக்கி இறந்திருக்கலாம் என விசாரணையில் தெரியவந்துள்ளது. கொலைக்கு முன்விரோதம் எதுவும் இல்லாததாகவும் காவல்துறை தெரிவித்துள்ளது. இந்தச் சம்பவம் குறித்து மேலும் விசாரணை தீவிரமாக நடைபெற்று வருகிறது.கொலையாளிகளைப் பிடிக்க மூன்று தனிப்படைகள் அமைக்கப்பட்டுள்ளன. காவல்துறையினர் தீவிரத் தேடுதல் வேட்டையில் ஈடுபட்டு வருகின்றனர். கொலை செய்யப்பட்ட சூர்யா தொடர்பான விவரங்கள் சேகரிக்கப்பட்டு விசாரணை மேற்கொள்ளப்பட்டு வருவதாக எஸ்.பி. தேவநாதன் தெரிவித்தார். விரைவில் கொலையாளிகள் கைது செய்யப்படுவார்கள் என்றும் அவர் உறுதியளித்தார்.

இதையும் படிங்க: புழல் சிறையிலிருந்து போக்சோ கைதி எஸ்கேப்.! அடுத்தடுத்து திடுக்கிடும் சம்பவங்கள்..! பரபரப்பு..!

இந்தச் சம்பவம் தொடர்பாகப் பொதுமக்களிடையே மது மற்றும் கஞ்சா போன்ற போதைப் பொருட்களே பல்வேறு குற்றங்களுக்குக் காரணமாக அமைவதாகக் கருத்துகள் எழுந்துள்ளன. இதுகுறித்துக் கேள்வி எழுப்பப்பட்டபோது, விரைவில் மது மற்றும் கஞ்சா போன்ற போதைப் பொருட்களைக் கட்டுப்படுத்தி குற்றங்களைக் குறைப்பதற்கான நடவடிக்கைகள் எடுக்கப்படும் என்று எஸ்.பி. தேவநாதன் கூறினார்.சமயநல்லூர் பகுதியில் நடந்த இந்தப் படுகொலை சம்பவம் உள்ளூர் மக்களிடையே பதற்றத்தை ஏற்படுத்தியுள்ளது. காவல்துறை தொடர்ந்து விசாரணையை மேற்கொண்டு வரும் நிலையில், விரைவில் உண்மை நிலை வெளிவரும் என எதிர்பார்க்கப்படுகிறது.

இதையும் படிங்க: அடியாத்தி..!! காரை விட ஆட்டோ பயணமே காஸ்ட்லி! தமிழகத்தில் தாறுமாறாக உயர்ந்த ஆட்டோ கட்டணம்!!