முதல்வர் ஸ்டாலினின் மகன் மட்டும்தான் முதல்வராக வர முடியுமா? யார் வேண்டுமானாலும் அந்தப் பதவியை அடைய முடியும் என்று பாஜக முன்னாள் மாநில தலைவர் தமிழிசை சவுந்தரராஜன் தெரிவித்தார்.

கோவையில் தமிழிசை செய்தியாளர்களைச் சந்தித்தார். அப்போது அவர் கூறுகையில், "ராணுவ வீரர்களின் துணிச்சலான நடவடிக்கைக்கு பாராட்டுகளைத் தெரிவித்துக் கொள்கிறேன். தீவிரவாதத்துக்கு எதிராக நடவடிக்கை மேற்கொண்ட பிரதமர் மோடிக்கு நாடே துணை நிற்கிறது. காஷ்மீரில் தீவிரவாதம் ஒழிக்கப்பட்டு விரைவில் அமைதி நிலவும். முன்பு ரத்தத்தால் சிவந்த ரோஜாக்கள் தற்போது வெள்ளை ரோஜாக்களாக மலரும்.

தமிழகத்தில் பாதுகாப்பு நடவடிக்கையை விமர்சிப்பது மிகவும் வேதனை அளிக்கிறது. சட்ட விரோதமாக தங்கி உள்ள பாகிஸ்தானியர்களை வெளியேற்ற வேண்டும் எனக் கூறியதற்கு, மதக் கலவரத்தை தூண்டுவதாக தமிழக அமைச்சர்களும் முதல்வரும் பேசுவது மிகவும் கண்டிக்கத்தக்கது. பிற மாநில முதல்வர்கள் பிரதமருக்கும் ராணுவத்துக்கும் பாராட்டு தெரிவிக்கும் நிலையில், தமிழக முதல்வர் பாராமுகமாக இருப்பது வருத்தம் அளிக்கிறது.

திமுக அரசின் நான்கு ஆண்டு கால ஆட்சியில் செவிலியர்கள், ஆசிரியர்கள், அங்கன்வாடி ஊழியர்கள், மருத்துவர்கள் என பலரும் போராட்டத்தில் ஈடுபட்டு வருகின்றனர். சட்டம் - ஒழுங்கு சீர்குலைந்துவிட்டது. கொலை, கொள்ளை சம்பவங்கள் அதிகரித்து விட்டன. வேங்கைவயல் பிரச்சினைக்கு இரண்டு ஆண்டுகள் ஆகியும் தீர்வு காணப்படவில்லை. திமுகவினர் நான்கு ஆண்டுகள் நிறைவைக் கொண்டாடும்போது மக்கள் திண்டாடிக் கொண்டிருக்கிறார்கள்.

அரசியலுக்கு புதிதாக வருபவர்கள் எல்லாம் முதல்வர் கனவில் இருப்பதாக ஸ்டாலின் விமர்சனம் செய்துள்ளார். அவருடைய மகன் மட்டும்தான் முதல்வராக வர முடியுமா? யார் வேண்டுமானாலும் அந்தப் பதவியை அடைய முடியும். 2026ஆம் ஆண்டில் நடைபெற உள்ள தேர்தலில் திமுகவின் சந்தர்ப்பவாத ஆட்சி வீட்டுக்கு அனுப்பப்படும்.
பாகிஸ்தானுக்கு எதிரான தாக்குதலில் பெண்கள் முன்னிறுத்தப்பட்டது பிரதமர் பெண்களுக்கு அளிக்கும் முக்கியத்துவத்தை எடுத்துக் காட்டுகிறது. தீவிரவாத தாக்குதல் எந்த ரூபத்தில் வந்தாலும் எதிர்கொள்ள இந்தியா தயாராக உள்ளது. ஊழல் குற்றச்சாட்டுகளில் சிக்கும் அமைச்சர்கள் மீது நடவடிக்கை எடுக்க தமிழக அரசுக்கு நேரமில்லை. இதற்கெல்லாம் 2026 தேர்தலில் மக்கள் பதில் அளிப்பார்கள்" என்று தமிழிசை தெரிவித்தார்.

இதையும் படிங்க: செம்ம அடி.. ஆடிப்போன சுப்பிரமணியன் சுவாமி..! இப்போ மோடிக்கு ஜால்ரா..!

இதையும் படிங்க: மோடி பற்றி சர்ச்சையை கிளப்பிய மல்லிகார்ஜுன கார்கே... கடுமையாக விமர்சித்த பாஜக!!