சென்னையில் பிறந்து சில நாட்களே ஆன பச்சிளம் பெண் குழந்தை உயிரிழந்த நிலையில் மீட்கப்பட்ட சம்பவம் அதிர்ச்சியை ஏற்படுத்தியுள்ளது.

சென்னை கொண்டித்தோப்பு சுப்புராயன் தெருவில் உள்ள பாழடைந்த கட்டடம் அருகே, துணியால் சுற்றப்பட்டிருந்த பார்சல் ஒன்றை நாய்கள் கவ்விக் கொண்டிருந்துள்ளன. இதைப் பார்த்த அப்பகுதி மக்கள் நாய்களை விரட்டிவிட்டு, அருகில் சென்று பார்த்தபோது, அந்த துணிக்குள் பச்சிளம் பெண் குழந்தையின் சடலம் இருப்பது தெரியவந்தது.

இதையடுத்து ஏழுகிணறு காவல் நிலையத்துக்கு தகவல் தெரிவிக்கப்பட்டது. சம்பவ இடத்துக்கு விரைந்து வந்த போலீசார், குழந்தையின் உடலை மீட்டு பிரேதப் பரிசோதனைக்காக சென்னை ஸ்டான்லி அரசு மருத்துவமனைக்கு அனுப்பி வைத்தனர்.

இதையும் படிங்க: ராகுல் வருகை... ரூ.60 லட்சம் செலவு!! கல்லா கட்டும் காங்கிரஸ்? எம்.பி., எம்.எல்.ஏ.க்களிடம் வசூல்?

போலீசாரின் முதற்கட்ட விசாரணையில், மீட்கப்பட்ட குழந்தைக்கு சுமார் 10 நாட்களே வயது இருக்கலாம் என தெரியவந்துள்ளது. குப்பைத் தொட்டிக்குள் கிடந்த பச்சிளம் குழந்தையின் சடலத்தை இருந்து கை, கால்களை தெருநாய்கள் கடித்து தின்ற அவலத்தை பார்த்து அங்கு வந்த காவலர்கள் உட்பட அனைவருமே திடுக்கிட்டு போயினர். 

குழந்தையை யார் இங்கு கொண்டு வந்து வீசிச் சென்றார்கள் என்பது குறித்து போலீசார் விசாரணை நடத்தி வருகின்றனர்.  குறிப்பாக, சமீபத்தில் சென்னை மற்றும் சுற்றுவட்டாரப் பகுதிகளில் பிறந்த குழந்தைகள் தொடர்பான மருத்துவமனைப் பதிவுகளையும் போலீசார் ஆய்வு செய்து வருகின்றனர். அப்பகுதியில் உள்ள கண்காணிப்பு கேமரா காட்சிகளையும் சேகரித்து, குழந்தையை விட்டுச் சென்ற நபரை அடையாளம் காணும் பணியில் போலீசார் ஈடுபட்டுள்ளனர்.

சென்னையில் தொடரும் அவலம்: 

பச்சிளம் குழந்தைகள் குப்பைத்தொட்டி, சாலையோரம் உள்ளிட்ட இடங்களில் கைவிடப்படும் சம்பவங்கள் அவ்வப்போது சென்னையில் அதிர்ச்சியை ஏற்படுத்தி வருகின்றன.

கடந்த ஜூலை மாதம் சென்னை கீழ்ப்பாக்கம் தியாகப்பா தெருவில் உள்ள குப்பைத்தொட்டியில், பிறந்து சில மணி நேரமே ஆன ஆண் குழந்தையின் சடலம் சாக்குப் பையில் சுற்றப்பட்ட நிலையில் மீட்கப்பட்டது. அந்த வழக்கில் குழந்தையின் தாய் கைது செய்யப்பட்டதாக செய்தி வெளியானது.

அதேபோல், 2024-ஆம் ஆண்டு சென்னை நந்தனம் சிஐடி நகர் பகுதியில் உள்ள குப்பைத்தொட்டியில் பிறந்து சில நாட்களே ஆன பெண் குழந்தை உயிருடன் மீட்கப்பட்ட சம்பவமும் நடந்தது. குழந்தையின் அழுகுரலைக் கேட்டு அப்பகுதியைச் சேர்ந்த ஒருவர் குழந்தையை மீட்டு போலீசாருக்கு தகவல் தெரிவித்தார்.

குழந்தையை வளர்க்க முடியாத சூழ்நிலை ஏற்பட்டாலும், குழந்தையை ஆபத்தான முறையில் கைவிடுவதற்குப் பதிலாக அரசு மற்றும் குழந்தைகள் பாதுகாப்பு அமைப்புகளை அணுகுவதற்கான வழிகள் உள்ளன. குழந்தையின் உயிருக்கு ஆபத்து ஏற்படும் வகையில் கைவிடப்படும் ஒவ்வொரு சம்பவமும் சமூகத்தில் குழந்தைகள் பாதுகாப்பு தொடர்பான மிகப்பெரிய கேள்வியை எழுப்புகிறது.

கொண்டித்தோப்பில் தற்போது பச்சிளம் பெண் சிசு சடலமாக மீட்கப்பட்டுள்ள நிலையில், குழந்தையை அங்கு விட்டுச் சென்றது யார், குழந்தை எங்கு பிறந்தது, குழந்தையின் உயிரிழப்புக்கான காரணம் என்ன என்பது உள்ளிட்ட பல்வேறு கோணங்களில் ஏழுகிணறு போலீசார் விசாரணை நடத்தி வருகின்றனர்.

இதையும் படிங்க: 2 ஆம் கட்ட மெட்ரோ..! புதிய மைல்கல்..! சுரங்கம் தோண்டும் பணி வெற்றிகரமாக நிறைவு.!