தமிழக அரசியல் களத்தில் அரங்கேறிய புதிய கூட்டணி மாற்றங்களுக்குப் பிந்தைய முதல் தேர்தல் வெற்றியாக, மாநிலங்களவை (Rajya Sabha) இடைத்தேர்தலில் தவெக-காங்கிரஸ் கூட்டணி சார்பில் களம் இறங்கிய பிரவீண் சக்கரவர்த்தி போட்டியின்றித் தேர்வாகிறார். இந்த இடத்திற்கான வேட்புமனு தாக்கல் இன்றுடன் நிறைவடைந்த நிலையில், எதிர்க்கட்சிகள் தரப்பில் யாரும் மனுத்தாக்கல் செய்யாததால் அவரது வெற்றி அதிகாரப்பூர்வமாக உறுதியாகியுள்ளது.

அதிமுகவின் முக்கியத் தலைவர்களில் ஒருவரான சி.வி. சண்முகம், அண்மையில் நடைபெற்ற சட்டமன்றத் தேர்தலில் போட்டியிட்டு வெற்றி பெற்றதைத் தொடர்ந்து, தனது மாநிலங்களவை எம்பி (MP) பதவியை முறைப்படி ராஜினாமா செய்தார். இதனால் காலியான அந்த ஒரு இடத்திற்கான இடைத்தேர்தல் அறிவிப்பைத் தேர்தல் ஆணையம் வெளியிட்டிருந்தது. தமிழகத்தில் தவெக மற்றும் விசிக உள்ளிட்ட கட்சிகள் இணைந்து புதிய கூட்டணி ஆட்சியை அமைத்துள்ள சூழலில், இந்த இடைத்தேர்தலில் தவெக-வின் ஆதரவோடு காங்கிரஸ் கட்சியின் முக்கியப் புள்ளியான பிரவீண் சக்கரவர்த்தி வேட்பாளராக நிறுத்தப்பட்டு, கடந்த சில தினங்களுக்கு முன்பு தனது வேட்புமனுவைத் தாக்கல் செய்திருந்தார்.

இந்நிலையில், வேட்புமனு தாக்கல் செய்வதற்கான இறுதிக்கூடான இன்று மாலை வரை, பிரதான எதிர்க்கட்சிகளான அதிமுக அல்லது திமுக தரப்பிலிருந்து யாரும் மாற்று வேட்புமனுவைத் தாக்கல் செய்யவில்லை. சட்டமன்ற உறுப்பினர்களின் பலத்தின் அடிப்படையில் தவெக கூட்டணிக்குத் தெளிவான பெரும்பான்மை இருப்பதால், தேவையில்லாத போட்டித் தவிர்ப்பு மற்றும் அரசியல் நகர்வுகளின் காரணமாக எதிர்க்கட்சிகள் இந்தத் தேர்தலில் களம் காணாமல் பின்வாங்கியதாகத் தெரிகிறது. இதன் மூலம், எவ்விதப் போட்டியும் இன்றி காங்கிரஸின் பிரவீண் சக்கரவர்த்தி புதிய மாநிலங்களவை உறுப்பினராகத் தேர்ந்தெடுக்கப்படுவது உறுதியாகியுள்ளது. இதற்கான அதிகாரப்பூர்வ அறிவிப்பைத் தேர்தல் நடத்தும் அதிகாரி விரைவில் வெளியிடவுள்ளார். புதிய அரசியல் சூழலில் தவெக கூட்டணியின் இந்த முதல் நாடாளுமன்றப் பிரதிநிதித்துவம் தேசிய அளவிலும் உற்றுநோக்கப்படுகிறது.

இதையும் படிங்க: காங்கிரஸ் இன்று நம்மை கைவிட்டுவிட்டது..!! டெல்லியில் ராகுலுக்கு எதிராக பரபரப்பு போஸ்டர்..!!

இதையும் படிங்க: ராஜ்யசபா தேர்தல்: 7 தொகுதிகளுக்கு காங்கிரஸ் அறிவித்த வேட்பாளர்கள்..!! யார் யார்..??