தமிழக அரசின் தலைமைச் செயலாளர் எம். சாய்குமாரை உடனடியாகப் பதவியிலிருந்து நீக்க வேண்டும் என்ற கோரிக்கையை முன்வைத்து மார்க்சிஸ்ட் கம்யூனிஸ்ட் கட்சி தமிழ்நாடு முழுவதும் ஆகஸ்ட் 22 ஆம் தேதி கண்டன ஆர்ப்பாட்டங்களை நடத்தியது. இந்த ஆர்ப்பாட்டம் மாநிலத்தின் அனைத்து மாவட்டங்களிலும் ஒரே நேரத்தில் நடைபெற்றது. கட்சியின் மாநிலச் செயலாளர் பெ. சண்முகம் தலைமையில் சென்னை உள்ளிட்ட பல்வேறு நகரங்களில் கட்சிப் பணியாளர்களும் ஆதரவாளர்களும் திரண்டு கோஷங்களை எழுப்பினர்.

இந்தப் போராட்டத்திற்கான பின்னணி சில நாட்களுக்கு முன்பு வெளிவந்த ஒரு சுற்றறிக்கையை மையமாகக் கொண்டது. கல்லூரிகளுக்கும் பல்கலைக்கழகங்களுக்கும் அனுப்பப்பட்ட அந்த சுற்றறிக்கை, இடதுசாரிக் கட்சிகள் மற்றும் காக்ரோச் ஜனதா கட்சி நடத்தும் ஆர்ப்பாட்டங்களில் மாணவர்கள் பங்கேற்காமல் இருக்க வேண்டும் என்று அறிவுறுத்தியது. இந்த உத்தரவு சட்டம் ஒழுங்கு ஆய்வுக் கூட்டத்தில் எடுக்கப்பட்ட முடிவின் அடிப்படையில் வந்ததாகவும், அந்தக் கூட்டத்திற்குத் தலைமைச் செயலாளர் தலைமை தாங்கியதாகவும் குற்றஞ்சாட்டப்பட்டது.

கல்லூரிக் கல்வி இயக்ககம் பின்னர் அந்தச் சுற்றறிக்கையைத் திரும்பப் பெற்றாலும், சிறப்புச் செயலாளர் அனுப்பிய கடிதமும் பிற தொடர்புடைய அறிவுறுத்தல்களும் தொடர்ந்து நடைமுறையில் இருப்பதாக மார்க்சிஸ்ட் கம்யூனிஸ்ட் கட்சி சுட்டிக்காட்டியது. மாநிலச் செயலாளர் சண்முகம் இந்த நடவடிக்கையை இடதுசாரி மாணவர் இயக்கங்களைக் குறிவைத்த சித்தாந்த சாய்வு என்று விமர்சித்தார். அரசு எந்திரத்தை தனிப்பட்ட நோக்கத்திற்காகத் தவறாகப் பயன்படுத்தும் நிலைக்குத் தலைமைச் செயலாளர் சென்றுவிட்டதாகவும், அதனால் நியாயமான நிர்வாகத்தை இனி அவரிடமிருந்து எதிர்பார்க்க முடியாது என்றும் அவர் தெரிவித்தார். 

இதையும் படிங்க: "அர்ப்பணிப்புக்குப் பெரும் அங்கீகாரம்"..! தேசிய நல்லாசிரியர் விருது..! தமிழக ஆசிரியர்களுக்கு முதல்வர் விஜய் வாழ்த்து..!!

குஜிலியம்பாறை வட்டாட்சியர் மீதும் முறையான நடவடிக்கை எடுக்கப்பட வேண்டும் என்ற கோரிக்கையும் முன்வைக்கப்பட்டது. இந்த ஆர்ப்பாட்டம் தவெக அரசுக்கு வெளியிலிருந்து ஆதரவு அளித்து வரும் மார்க்சிஸ்ட் கம்யூனிஸ்ட் கட்சி அரசின் செயல்பாடுகளுக்கு எதிராகப் பகிரங்கமாகக் குரல் கொடுத்த முக்கிய நிகழ்வாக அமைந்தது. ஜனநாயக உரிமைகள் பாதுகாக்கப்பட வேண்டும் என்றும், மாணவர்களின் போராட்ட உரிமை மறுக்கப்படக் கூடாது என்றும் வலியுறுத்தப்பட்டது. 

இதையும் படிங்க: "வஞ்சக வார்த்தை... முதல்வருக்கு பலவீனம்"..! மேகதாது பிரச்சனையில் தலையிட்ட அப்பாவு..!