அதிமுக பொதுச் செயலாளர் எடப்பாடி பழனிசாமி கோவை மத்திய சிறையில் இருந்து ராகவன் என்ற விசாரணைக் கைதி தப்பி ஓடிய சம்பவம் குறித்து கடுமையாகக் கண்டித்துள்ளார். இந்தச் சம்பவம் அதிர்ச்சியளிப்பதாகக் குறிப்பிட்ட அவர், தற்போதைய ஆட்சியில் சிறைக் கைதிகள் தப்பிச் செல்வது இதுவரை கேள்விப்படாத கொடுமையாக மாறிவிட்டதாகவும், அது சின்னத்திரை சீரியல் போலத் தொடர்கதையாக ஆகியுள்ளதாகவும் தெரிவித்தார்.

வெற்றி ஆட்சி சாதனை மலரில் சட்டம் ஒழுங்கு சீர்கேடு, போதைப்பொருள் கடத்தல், விலைவாசி உயர்வு, மின்வெட்டு, கடன்கள் ஆகியவற்றுடன் இதுவும் முக்கியத் தலைப்பாகச் சேர்க்கப்படலாம் என்று அவர் கூறினார். தேனி, புழல், சேலம் என ஒவ்வொரு முறையும் சிறைக் கைதிகள் தப்பி ஓடும்போது சிறைத்துறை பாதுகாப்பைப் பலப்படுத்துவதாகவும், கண்காணிப்புக் கோபுரங்களில் ஆயுதம் ஏந்திய காவலர்களை நிறுத்துவதாகவும் அறிவிப்புகள் வெளியாவதாக அவர் சுட்டிக்காட்டினார்.

இன்று கூட சிறை அதிகாரிகள் விழிப்புடன் செயல்பட வேண்டும், இல்லையெனில் கடுமையான நடவடிக்கை எடுக்கப்படும் என்று தமிழக அரசு செய்தி வெளியிட்ட சில மணி நேரங்களிலேயே கோவை சிறையில் கைதி தப்பி ஓடிய கேவலம் அரங்கேறியுள்ளதாக அவர் விமர்சித்தார்.இந்த ஆட்சியின் கோமாளித்தனங்களைக் குறிப்பிட வேண்டுமானால், வாய் மட்டும்தான் வேலை செய்கிறது, மற்றவை எல்லாம் அப்படியே இருக்கிறது என்ற விஜய் நடித்த போக்கிரி படத்தின் நகைச்சுவை வசனமே பொருத்தமாக இருக்கும் என்று எடப்பாடி பழனிசாமி கூறினார். கைதிகளால் சிறையில் இருந்து இவ்வளவு எளிதாகத் தப்பிக்க முடிவது எப்படி என்று கேள்வி எழுப்பிய அவர், இதுபோன்ற கடுங்குற்றவாளிகள் தப்பிச் சென்று மேலும் என்னென்ன குற்றங்களைச் செய்வார்கள் என்று நினைத்தாலே பதற்றமாக இருப்பதாகத் தெரிவித்தார்.

இதையும் படிங்க: தனுஷின் அரசியல் வருகைக்குப் பின்னால் பாஜக? எடப்பாடி கட்டுப்பாட்டில் இல்லாத அதிமுக! மாணிக்கம் தாகூர் பரபரப்பு பேட்டி!!

சிறைச்சாலையையே பாதுகாப்பாக வைக்க முடியாத நிலையில் இந்த ஆட்சி மக்களை எப்படிப் பாதுகாக்கும் என்ற நம்பிக்கை எவ்வாறு ஏற்படும் என்று அவர் கேள்வி எழுப்பினார். அதிகாரிகள் முழுக் கவனத்துடனும் விழிப்புணர்வுடனும் தங்களது பொறுப்புகளை மேற்கொள்ள வேண்டும், பணியில் மெத்தனமாகவோ கவனக்குறைவாகவோ செயல்படக்கூடாது என்று அறிக்கை மூலம் அறிவுறுத்தும் தவெக கூட்டணி அரசின் முதல்வர் ஜோசப் விஜய் எப்போது தனது அறிக்கையில் கூறியவாறு முதல்வர் பணிகளை மேற்கொள்ளப் போகிறார் என்றும் அவர் கேள்வி எழுப்பினார்.

தொடர்ந்து நிகழும் இந்தச் சிறைத் தப்பியோட்டச் சம்பவங்கள் ஆட்சியின் நிர்வாகத் திறனற்ற தன்மையை வெளிப்படுத்துவதாக அதிமுக தலைவர் வலியுறுத்தியுள்ளார். சட்டம் ஒழுங்கு நிலைமை மோசமடைந்து வருவதாகவும், மக்களின் பாதுகாப்பு உணர்வு பாதிக்கப்பட்டுள்ளதாகவும் அவர் குற்றம்சாட்டியுள்ளார்.

இதையும் படிங்க: "BLACK TICKET"..! பழக்க தோஷத்துல வித்துடாதீங்க..! ஆவின் பொருட்கள் விலை உயர்வு.. EPS விளாசல் .!!