தமிழ்நாட்டில் எல் நினோ காலநிலை மாற்றத்தால் ஏற்படக்கூடிய பாதிப்புகளை முன்கூட்டியே ஆய்வு செய்து தகுந்த முன்னெச்சரிக்கை நடவடிக்கைகளை மேற்கொள்ள ஏழு பேர் கொண்ட நிபுணர் ஆலோசனைக் குழுவை அமைத்து தமிழக அரசு உத்தரவிட்டுள்ளது. முதலமைச்சர் சி.ஜோசப் விஜய்யின் உத்தரவின்படி இந்தக் குழு உருவாக்கப்பட்டுள்ளது. தமிழ்நாடு பேரிடர் அபாயக் குறைப்பு முகமையின் கீழ் இந்த நிபுணர் குழு செயல்படும்.பசிபிக் பெருங்கடலின் மத்திய மற்றும் கிழக்குப் பகுதிகளில் கடல் மேற்பரப்பு வெப்பநிலை இயல்பை விட அதிகரிப்பதால் எல் நினோ நிகழ்வு உருவாகிறது.

இது உலகளாவிய காலநிலை மாற்றங்களை ஏற்படுத்தி மழைப்பொழிவு குறைவு, வறட்சி, வெப்ப அலைகள் மற்றும் திடீர் வெள்ளப் பெருக்கு போன்ற தீவிர வானிலை நிகழ்வுகளுக்கு வழிவகுக்கிறது. 2026 ஆம் ஆண்டில் வலுவான எல் நினோ உருவாகும் வாய்ப்பு அதிகம் உள்ளதாக வானிலை ஆய்வுகள் சுட்டிக்காட்டிய நிலையில், தமிழக அரசு முன்னெச்சரிக்கை நடவடிக்கைகளை மேற்கொள்ள முடிவு செய்தது.வருவாய் மற்றும் பேரிடர் மேலாண்மைத் துறை ஜூலை 28, 2026 அன்று அரசாணை வெளியிட்டு இந்தக் குழுவை அமைத்தது.

கூடுதல் தலைமைச் செயலாளர் மற்றும் வருவாய் நிர்வாக ஆணையர் இந்தக் குழுவின் தலைவராகச் செயல்படுவார். அண்ணா பல்கலைக்கழக காலநிலை மாற்றம் மற்றும் பேரிடர் மேலாண்மை மையத் தலைவர் பேராசிரியர் கண்மணி, சென்னை ஐஐடி நீரியல் மற்றும் நீர்வள பொறியியல் ஆய்வகப் பேராசிரியர் பாலாஜி நரசிம்மன், உலக வளங்கள் நிறுவனத்தின் காலநிலை மீள்திறன் பிரிவு இயக்குநர் அறிவுடைநம்பி அப்பாதுரை, தமிழ்நாடு பசுமை காலநிலை நிறுவன ஆலோசகர் ரமேஷ் ராமச்சந்திரன், மாநில சுற்றுச்சூழல் தாக்க மதிப்பீட்டுக் குழு உறுப்பினர் வெங்கடேசன், சுகந்தி தேவதாசன் கடல்சார் ஆராய்ச்சி நிறுவன இயக்குநர் பேட்டர்சன் எட்வர்ட் மற்றும் தமிழ்நாடு வெதர்மேன் என அழைக்கப்படும் பிரதீப் ஜான் ஆகியோர் இந்தக் குழுவில் உறுப்பினர்களாக இடம்பெற்றுள்ளனர்.

இதையும் படிங்க: அக். 15-க்கு பின் வெப்பம் படிப்படியாக குறையும்! சென்னை வானிலை மையம் முக்கிய தகவல்!

இந்தக் குழு மாநிலத்தில் மழைப்பொழிவு மற்றும் வறட்சி நிலவரங்களைத் தொடர்ந்து கண்காணித்து, பாதிப்புக்குள்ளாகக்கூடிய பகுதிகளை அடையாளம் காணும். முன்னெச்சரிக்கை அமைப்புகளை வலுப்படுத்துதல், வறட்சி மற்றும் வெள்ள அபாயங்களைக் குறைப்பதற்கான அறிவியல் அடிப்படையிலான பரிந்துரைகளை வழங்குதல் ஆகியவை அதன் முக்கியப் பணிகளாகும். தென்மேற்கு பருவமழையில் மழை குறைவாகப் பெய்தால் காவிரி நீர்வரத்து பாதிக்கப்படலாம் எனவும், வடகிழக்கு பருவமழையில் அதிக மழை மற்றும் வெள்ள அபாயம் ஏற்படலாம் எனவும் கருதப்படுகிறது.

இதையும் படிங்க: அதீத வெப்பம்..! எல் நினோவால் 4.5 லட்சம் பேர் உயிரிழக்கலாம்... புதிய ஆய்வில் எச்சரிக்கை..!