சிறையில் போலீசாரை தாக்கிவிட்டு தப்ப முயலும் கைதிகளை சுட்டுப்பிடிக்க சிறைத்துறை உத்தரவு புழல், தேனி சிறைகளில் இருந்து கைதிகள் தப்பிய நிகழ்வை அடுத்து டிஜிபி ரத்தோர் அதிரடி ஆணை.

தமிழகத்தில் சென்னை புழல் மத்திய சிறை மற்றும் தேனி மாவட்டம் தேக்கம்பட்டி சிறை ஆகியவற்றிலிருந்து அடுத்தடுத்து கைதிகள் தப்பிய சம்பவங்கள் பெரும் பரபரப்பை ஏற்படுத்தியுள்ளன. புழல் சிறையிலிருந்து தப்பிய இரு கைதிகளும் மீண்டும் கைது செய்யப்பட்டுள்ள நிலையில், தேனி சிறையிலிருந்து தப்பிய 17 கைதிகளில் 13 பேர் பிடிபட்டுள்ளனர். எஞ்சிய நான்கு பேரைப் பிடிக்கக் காவல்துறையினர் தீவிர தேடுதல் வேட்டையில் ஈடுபட்டு வருகின்றனர்.

சென்னை புழல் மத்திய சிறையில் இருந்து கடந்த அக்டோபர் 20 மற்றும் 21ஆம் தேதிகளில் அடுத்தடுத்து இரு கைதிகள் தப்பிச் சென்றனர். நேபாளத்தைச் சேர்ந்த சுதீப் போகதி, திருட்டு வழக்கில் விசாரணைக் கைதியாகச் சிறையில் அடைக்கப்பட்டிருந்தார். இவர் சிறையின் சுற்றுச்சுவரில் இருந்த கேபிள்களைப் பயன்படுத்தி ஏறித் தப்பியதாகத் தகவல் வெளியானது. மற்றொரு கைதியான சுரேஷ், சிறை வளாகத்திற்கு அருகிலுள்ள சிறை அங்காடியில் பணியாற்றியபோது அங்கிருந்து தப்பிச் சென்றதாகக் கூறப்படுகிறது.

இருவரையும் தேடும் பணியில் தனிப்படைக் காவல்துறையினர் ஈடுபட்ட நிலையில், சுதீப் போகதி சென்னை அண்ணாநகர் பகுதியிலும், சுரேஷ் குன்றத்தூர் பகுதியிலும் கைது செய்யப்பட்டனர். இந்தச் சம்பவத்தைத் தொடர்ந்து, பாதுகாப்புப் பணியில் அலட்சியமாகச் செயல்பட்டதாகக் கூறி ஏழு சிறை ஊழியர்கள் பணியிடை நீக்கம் செய்யப்பட்டனர். மேலும், தமிழகச் சிறைகளில் பாதுகாப்பு ஏற்பாடுகளை ஆய்வு செய்யவும் உத்தரவிடப்பட்டது.

இதற்கிடையே, தேனி மாவட்டம் ஆண்டிபட்டி அருகே உள்ள தேக்கம்பட்டி மாவட்டச் சிறையிலிருந்து அக்டோபர் 26ஆம் தேதி இரவு 17 விசாரணைக் கைதிகள் தப்பிச் சென்ற சம்பவம் அதிர்ச்சியை ஏற்படுத்தியது.

சிறையில் உள்ள கைதி ஒருவருக்கு வலிப்பு ஏற்பட்டதாகக் கூறி காவலரை அறைக்குள் வரவழைத்த கைதிகள், அவரைத் தாக்கிவிட்டு சாவியைப் பறித்து, சிறையின் பிரதான நுழைவாயில் வழியாகத் தப்பிச் சென்றதாகக் கூறப்படுகிறது. இந்தச் சம்பவத்தில் காயமடைந்த சிறைக் காவலர்கள் மருத்துவமனையில் அனுமதிக்கப்பட்டனர். இதையடுத்து, தேனி மற்றும் அண்டை மாவட்டங்களில் வாகனச் சோதனைகள் தீவிரப்படுத்தப்பட்டு, 17 தனிப்படைகள் அமைக்கப்பட்டன.

தப்பிச் சென்ற கைதிகளைப் பிடிக்க மேற்கொள்ளப்பட்ட நடவடிக்கைகளில், சிலர் மலைப்பகுதிகளில் பதுங்கியிருந்தது ட்ரோன் கேமராக்கள் மூலம் கண்டறியப்பட்டது. இதையடுத்து, பல்வேறு இடங்களில் நடத்தப்பட்ட தேடுதல் வேட்டையில் 13 கைதிகள் மீண்டும் கைது செய்யப்பட்டனர்.

எஞ்சியுள்ள மீனாட்சிசுந்தரம், திருப்பதி, நிஷாத் மற்றும் ரெஜின் ஆகிய நான்கு கைதிகளைப் பிடிப்பதற்காக, சிறைச்சாலையின் பின்புறம் உள்ள மலை மற்றும் வனப்பகுதிகளில் துப்பாக்கி ஏந்திய காவல்துறையினர் தொடர்ந்து தேடுதல் வேட்டையில் ஈடுபட்டு வருகின்றனர். இந்தச் சம்பவம் தொடர்பாகச் சிறைத்துறை உயர் அதிகாரிகள் நேரில் ஆய்வு மேற்கொண்டதுடன், பணியில் கவனக்குறைவாக இருந்ததாகக் கூறி ஒன்பது சிறை ஊழியர்கள் பணியிடை நீக்கம் செய்யப்பட்டுள்ளனர்.

ஒரு வாரத்திற்குள் புழல் மற்றும் தேனி சிறைகளில் கைதிகள் தப்பிய சம்பவங்கள் அடுத்தடுத்து நிகழ்ந்துள்ளதால், சிறைகளின் பாதுகாப்பு ஏற்பாடுகள், கண்காணிப்பு நடைமுறைகள் மற்றும் பணியாளர் பற்றாக்குறை தொடர்பாகக் கேள்விகள் எழுந்துள்ளன.

இதனிடையே, சிறையில் போலீசாரை தாக்கிவிட்டு தப்ப முயலும் கைதிகலை சுட்டுப்பிடிக்க சிறைத்துறை உத்தரவிட்டுள்ளது. சிறைகளில் உயர் கோபுர கண்கானிப்பில் துப்பாக்கி ஏந்திய காவலர்கள் இருக்க வேண்டும் என்றும், சிறையில் ஏதேனும் அசம்பாவிதம் ஏற்பட்டால் துப்பாக்கியை பயன்படுத்தவும் போலீசாருக்கு சிறைத்துறை டிஜிபி சந்தீப்ராய் ரத்தோர் அதிரடி உத்தரவு பிறப்பித்துள்ளார்.