தமிழகக் கடலோரப் பகுதிகளில் நிலவும் கீழ்மட்ட வளிமண்டலக் காற்றழுத்தத் தாழ்வுப் பாதை காரணமாக, நீலகிரி மற்றும் கோயம்புத்தூர் மாவட்டங்களில் பலத்த காற்று மற்றும் இடி மின்னலுடன் கூடிய மிகக் கனமழை பெய்ய வாய்ப்புள்ளதாகவும், சென்னை, செங்கல்பட்டு, மதுரை உள்ளிட்ட 19 மாவட்டங்களில் மிதமான மழை பெய்யக்கூடும் என்றும் சென்னை மண்டல வானிலை ஆய்வு மையம் எச்சரித்துள்ளது.
வானிலை மையம் வெளியிட்டுள்ள அவசர எச்சரிக்கை அறிக்கையின்படி, இன்று மாலை 7 மணி வரை அரியலூர், கடலூர், ஈரோடு, மயிலாடுதுறை, நாகப்பட்டினம், நாமக்கல், பெரம்பலூர், புதுக்கோட்டை, ராமநாதபுரம், சேலம், சிவகங்கை, தஞ்சாவூர், தேனி, நீலகிரி, திருவாரூர், திருச்சிராப்பள்ளி, திண்டுக்கல், தென்காசி, திருநெல்வேலி, விருதுநகர் ஆகிய மாவட்டங்களின் சமவெளி மற்றும் மேற்குத் தொடர்ச்சி மலைப்பகுதிகளிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய மிதமான மழைக்கு வாய்ப்புள்ளது. இதன் காரணமாக நகர்ப்புறங்களில் தாழ்வான பகுதிகளில் மழைநீர் தேங்கவும், சாலைகள் வழுக்கும் தன்மை அடைந்து போக்குவரத்து நெரிசல் ஏற்படவும் வாய்ப்புள்ளது.
அதேபோல் சென்னை, திருவள்ளூர், செங்கல்பட்டு, காஞ்சிபுரம், ராணிப்பேட்டை, வேலூர், திருப்பத்தூர், திருவண்ணாமலை, விழுப்புரம், கள்ளக்குறிச்சி, தருமபுரி, கிருஷ்ணகிரி உள்ளிட்ட மாவட்டங்களிலும் இடைவிடாது மிதமான மழை பெய்யக்கூடும் என்பதால் பொதுமக்கள் மற்றும் வாகன ஓட்டிகள் எச்சரிக்கையுடன் இருக்குமாறு கேட்டுக்கொள்ளப்பட்டுள்ளனர்.
இதையும் படிங்க: சென்னை உட்பட 14 மாவட்டங்களில் மிதமான மழைக்கு வாய்ப்பு: வானிலை ஆய்வு மையம் தகவல்!
இடி மின்னல் தீவிரமாக இருக்கும் சமயங்களில் பொதுமக்கள் தங்களைப் பாதுகாத்துக் கொள்ள தேசியப் பேரிடர் மேலாண்மை ஆணையம் (NDMA) பல்வேறு முக்கிய வழிகாட்டு நெறிமுறைகளை வெளியிட்டுள்ளது. இடி மின்னல் வெட்டும்போது திறந்தவெளிகளிலோ அல்லது மரங்களின் அடியிலோ ஒதுங்குவதைத் தவிர்க்க வேண்டும் எனவும், தொலைக்காட்சி மற்றும் மின்சாதனப் பொருட்களின் இணைப்புகளை உடனடியாகத் துண்டிக்க வேண்டும் எனவும் அறிவுறுத்தப்பட்டுள்ளது.
மேலும் பயணம் செய்வோர் இருசக்கர வாகனங்கள் மற்றும் உழவு இயந்திரங்களை உடனடியாக விட்டுவிட்டுப் பாதுகாப்பான கான்கிரீட் கட்டடங்களில் தஞ்சம் அடைய வேண்டும் என்றும், நீர்நிலைகள் மற்றும் உலோகக் கம்பிகளுக்கு அருகில் செல்வதைத் தவிர்க்க வேண்டும் என்றும் அதிகாரிகள் எச்சரித்துள்ளனர்.
இதையும் படிங்க: மழை அப்டேட்! இன்று 21 மாவட்டங்களில் வெளுத்து வாங்கப்போகும் மழை – வானிலை மையம் எச்சரிக்கை!