இந்தியாவில் சர்க்கரை விலையைக் கட்டுப்படுத்தவும், உள்நாட்டில் தட்டுப்பாடின்றி சர்க்கரை கிடைப்பதை உறுதி செய்யவும், ஏற்றுமதிக்கு விதிக்கப்பட்ட தடையைச் செப்டம்பர் 30-ஆம் தேதி வரை நீட்டித்து மத்திய அரசு அதிரடி உத்தரவு பிறப்பித்துள்ளது.
உள்நாட்டுச் சந்தையில் சர்க்கரையின் விலை உயருவதைத் தவிர்க்கவும், போதுமான இருப்பு இருப்பதை உறுதி செய்யவும் இந்த முடிவு எடுக்கப்பட்டுள்ளதாக மத்திய அரசு விளக்கம் அளித்துள்ளது. வரும் செப்டம்பர் 30-ஆம் தேதி வரை இந்தியாவிலிருந்து வெளிநாடுகளுக்குச் சர்க்கரை ஏற்றுமதி செய்யத் தடை விதிக்கப்பட்டுள்ளது.
இந்தப் பொதுவான ஏற்றுமதித் தடையிலிருந்து அமெரிக்கா (USA) மற்றும் ஐக்கிய இராச்சியம் (UK) ஆகிய இரு நாடுகளுக்கு மட்டும் விலக்கு அளிக்கப்பட்டுள்ளது. இந்த நாடுகளுக்கு மட்டும் குறிப்பிட்ட அளவிலான சர்க்கரை ஏற்றுமதி தொடரும் எனத் தெரிவிக்கப்பட்டுள்ளது.
இதையும் படிங்க: மருத்துவ மாணவர் சேர்க்கையில் மாநிலங்களின் உரிமை: நீட் தேர்வை ரத்து செய்ய முதல்வர் விஜய் அதிரடி வலியுறுத்தல்!
சமீபகாலமாக உணவுப் பொருட்களின் விலை ஏற்றம் குறித்த கவலைகள் நிலவி வரும் சூழலில், சாமானிய மக்களுக்குப் பாதிப்பு ஏற்படாத வகையில் சர்க்கரை விலையைச் சீராக வைத்திருக்க இந்தத் தடை உதவும் என எதிர்பார்க்கப்படுகிறது. முன்னதாகவே நடைமுறையில் இருந்த இந்தத் தடையானது, தற்போது நிலவும் சூழலைக் கருத்தில் கொண்டு செப்டம்பர் இறுதி வரை நீட்டிக்கப்பட்டுள்ளது.
சர்வதேச சந்தையில் சர்க்கரையின் தேவை அதிகரித்துள்ள போதிலும், இந்திய மக்களின் நலன் மற்றும் உள்நாட்டுத் தேவையைப் பூர்த்தி செய்வதற்கே முன்னுரிமை அளிக்கப்படும் என்று மத்திய அரசு தெளிவுபடுத்தியுள்ளது.
இதையும் படிங்க: தங்கம், வெள்ளி மீதான இறக்குமதி வரி திடீர் உயர்வு..!! அதிரடி காட்டிய மத்திய அரசு..!!