நாம் தமிழர் கட்சியின் தாராபுரம் சட்டமன்ற இடைத்தேர்தல் வேட்பாளராகப் போட்டியிட்ட மாநில மகளிர் பாசறைப் பொறுப்பாளர் கார்த்திகாவை காவல்துறை கைது செய்துள்ளது. இந்த நடவடிக்கை அரசியல் வட்டாரங்களில் பெரும் பரபரப்பையும் கண்டனத்தையும் ஏற்படுத்தியுள்ளது. தாராபுரம் தொகுதியில் சமீபத்தில் நடைபெற்ற இடைத்தேர்தல் தொடர்பான வழக்குகளின் அடிப்படையில் அதிகாலை நேரத்தில் கோவையில் உள்ள அவரது இல்லத்திற்குச் சென்று காவல்துறையினர் அவரைக் கைது செய்தனர்.

அவரது கணவர் முருகசந்திரகுமார் உள்ளிட்ட பல நாம் தமிழர் கட்சி நிர்வாகிகளும் ஒரே நேரத்தில் கைது செய்யப்பட்டனர்.தாராபுரம் இடைத்தேர்தல் பிரச்சார காலத்தில் முதலமைச்சர் விஜய்யின் ரோடு ஷோ நடைபெற்ற பாதையில் சாலை மறியல் போராட்டம் நடத்தியது, காவல் நிலையத்தை முற்றுகையிட்டது, தேர்தல் பிரச்சாரத்திற்கு அனுமதி மறுக்கப்பட்டதை எதிர்த்து போராடியது போன்ற புகார்களின் பேரில் கார்த்திகா உள்ளிட்டோர் மீது பல பிரிவுகளில் வழக்குகள் பதிவு செய்யப்பட்டிருந்தன. தேர்தல் முடிவுகள் வெளியாகி சில நாட்கள் கழித்து இந்த வழக்குகளை முன்னிட்டு கைது நடவடிக்கை மேற்கொள்ளப்பட்டது.

கைது செய்யப்பட்டவர்கள் நீதிமன்றத்தில் ஆஜர்படுத்தப்பட்டு 15 நாட்கள் நீதிமன்றக் காவல் விதிக்கப்பட்டுள்ளனர்.கைது செய்யப்பட்டபோது கார்த்திகா ஆவேசமாகப் பேசிய காட்சிகள் வெளியாகின. அதிகாலை ஐந்து மணிக்கு தூங்கிக்கொண்டிருக்கும்போது வீட்டிற்குள் புகுந்து கைது செய்ததாகவும், இரவு உடையில் இருந்த தனக்கு உடை மாற்றக்கூட அனுமதிக்கவில்லை என்றும் அவர் குற்றம்சாட்டினார். “நாங்கள் என்ன போதைப்பொருள் கடத்தினோம்? எந்தத் தவறும் செய்யவில்லை. முதலமைச்சருக்கு மட்டும்தான் வாக்கு சேகரிக்க உரிமையா?” என்று கேள்வி எழுப்பினார். திமுக துணைப் பொதுச் செயலாளரும் நாடாளுமன்ற உறுப்பினருமான கனிமொழி சென்னை அண்ணா அறிவாலயத்தில் பேட்டி அளித்து இதை முழுமையான அத்துமீறல் என்று விமர்சித்தார்.

இதையும் படிங்க: திமுக முடிக்காத 40% பணி! 4 மாதங்களில் முடித்த தவெக! சென்னை மழைநீர் வடிகால் பணிகள் - செங்கோட்டையன் குற்றச்சாட்டு!

“முதலமைச்சரின் மனம் கோணும்படி யாராவது பேசினால் உடனடியாகக் கைது செய்கிறார்கள். ஆனால் நேரடியாக விமர்சிக்கும் பாஜக மாநிலத் தலைவர் நயினார் நாகேந்திரன் மீது எந்த நடவடிக்கையும் இல்லை” என்று அவர் சுட்டிக்காட்டினார். வேண்டுமென்றே காழ்ப்புணர்ச்சியில் செய்யப்பட்ட அத்துமீறல் என்றும், ஒரு பெண்ணை உடை மாற்றக்கூட அனுமதிக்காமல் கைது செய்திருப்பது பாதுகாப்பா என்றும் கேள்வி எழுப்பினார். எதிர்க்கட்சிகளின் பெண் தலைவர்களுக்கு எதிராக காவல்துறையைப் பயன்படுத்துவதாகவும், விமர்சிப்பவர்களை அடக்குவதாகவும் அவர் குற்றம்சாட்டினார். மக்கள் சட்டம் ஒழுங்கு சீர்கேடு, மின்வெட்டு, விலைவாசி உயர்வு போன்ற பிரச்சினைகளால் அவதிப்படும்போது எதிர்க்கட்சியினரை ஒடுக்குவதில் கவனம் செலுத்தாமல் நிர்வாகத்தைச் சரியாக நடத்த வேண்டும் என்றும் வலியுறுத்தினார்.

இதையும் படிங்க: அரசியலில் பழக்கடை மூர்த்தி Sweet Uncle தான்: திமுக தலைமையை வறுத்தெடுத்த தவெக ஐடி விங்!