சென்னை உயர் நீதிமன்றத்தில் கூடுதல் நீதிபதிகளாகத் தர்மலிங்கம் லிங்கேஸ்வரன் (Dharmalingam Lingeswaran) மற்றும் பாலதண்டாயுதம் கார்த்திகேயன் (Balathandayutham Karthikeyan) ஆகிய இருவரை நியமித்து இந்தியக் குடியரசுத் தலைவர் திரௌபதி முர்மு உத்தரவிட்டுள்ளார்; இதனைத் தொடர்ந்து ஒன்றிய அரசின் சட்ட மற்றும் நீதித்துறை அமைச்சகம் (Department of Justice) இதற்கான அதிகாரப்பூர்வ அரசாணை மற்றும் அறிவிக்கையை வெளியிட்டுள்ளது.

ஒன்றிய சட்ட அமைச்சகத்தின் இணைச் செயலாளர் ஜெகந்நாத் சீனிவாசன் (Jagannath Srinivasan) வெளியிட்டுள்ள அறிக்கையில் தெரிவிக்கப்பட்டுள்ளதாவது:

"இந்திய அரசியல் சாசனத்தின் உறுப்பு 224-ன் பிரிவு (1)-ல் [Article 224(1)] வழங்கப்பட்டுள்ள சிறப்பு அதிகாரத்தைப் பயன்படுத்தி, திருவாளர்கள் (1) தர்மலிங்கம் லிங்கேஸ்வரன் மற்றும் (2) பாலதண்டாயுதம் கார்த்திகேயன் ஆகிய இருவரையும் சென்னை உயர் நீதிமன்றத்தின் கூடுதல் நீதிபதிகளாக, அவர்கள் தங்களது பொறுப்புகளை ஏற்கும் நாளிலிருந்து இரண்டு ஆண்டுகள் காலத்திற்கு நியமிக்கக் குடியரசுத் தலைவர் இசைவு தெரிவித்துள்ளார்" என்று குறிப்பிடப்பட்டுள்ளது.

இதையும் படிங்க: அதிமுக MLA-க்கள் ராஜினாமா வழக்கு..!! ஆப்சென்ட்டான நீதிபதி..!! இன்று தீர்ப்பு இல்லை..!!

சென்னை உயர் நீதிமன்றத்தின் அனுமதிக்கப்பட்ட மொத்த நீதிபதிகளின் பணியிடங்களின் எண்ணிக்கை 75 ஆகும். தற்போது இந்த இரண்டு புதிய கூடுதல் நீதிபதிகளின் நியமனத்தைத் தொடர்ந்து, சென்னை உயர் நீதிமன்றத்தில் பணியாற்றும் நீதிபதிகளின் மொத்த எண்ணிக்கை 68 ஆக உயர்ந்துள்ளது.

நீண்ட நாட்களாக நிலுவையில் உள்ள வழக்குகளை விரைந்து விசாரித்துத் தீர்ப்பு வழங்க ஏதுவாக நீதிபதிகள் எண்ணிக்கை கணிசமாக உயர்ந்து வருவது, வழக்கறிஞர்கள் மற்றும் பொதுமக்கள் மத்தியில் பெரும் வரவேற்பைப் பெற்றுள்ளது. புதிய கூடுதல் நீதிபதிகளாக நியமிக்கப்பட்டுள்ள தர்மலிங்கம் லிங்கேஸ்வரன் மற்றும் பாலதண்டாயுதம் கார்த்திகேயன் ஆகியோர் சென்னை உயர் நீதிமன்ற தலைமை நீதிபதி முன்னிலையில் விரைவில் பதவியேற்றுக் கொள்ள உள்ளனர்.

இதையும் படிங்க: நீர் பற்றாக்குறை இருந்தாலும் தமிழகத்திற்கு நீர் தருவோம்: ஆந்திர முதல்வர் சந்திரபாபு நாயுடு உறுதி!