அனைத்திந்திய அண்ணா திராவிட முன்னேற்றக் கழகத்தைச் சேர்ந்த 6 சட்டமன்ற உறுப்பினர்களின் ராஜினாமாவைத் தமிழ்நாடு சட்டப்பேரவைத் தலைவர் ஏற்றுக்கொண்டு பிறப்பித்த உத்தரவை ரத்து செய்யக் கோரி அதிமுக தரப்பில் தொடரப்பட்ட வழக்குகளில் சென்னை உயர்நீதிமன்றம் நாளை (அக்டோபர் 13) தீர்ப்பளிக்கவுள்ளது.

தமிழக சட்டமன்றப் பொதுத்தேர்தல் முடிந்து சில மாதங்களிலேயே, அதிமுகவைச் சேர்ந்த சட்டமன்ற உறுப்பினர்கள் சிலர் கட்சி மாறி ஆளுங்கட்சியான தமிழக வெற்றிக் கழகத்திற்கு ஆதரவு தெரிவித்ததாகக் குற்றச்சாட்டுகள் எழுந்தன. இதனைத் தொடர்ந்து, கட்சித் தாவல் தடைச் சட்டத்தின் கீழ் சம்பந்தப்பட்ட சட்டமன்ற உறுப்பினர்களைத் தகுதி நீக்கம் செய்ய வேண்டும் என்று அதிமுக கொறடா அக்ரி கிருஷ்ணமூர்த்தி பேரவைத் தலைவரிடம் முறைப்படி புகார் மனு அளித்திருந்தார்.

இந்த நிலையில், அவர்கள் மீதான தகுதி நீக்கப் புகார் நிலுவையில் இருந்த காலகட்டத்திலேயே, அதிமுக எம்.எல்.ஏ-க்கள் 6 பேர் தங்களது சட்டமன்ற உறுப்பினர் பதவிகளை ராஜினாமா செய்தனர். அவர்களின் ராஜினாமாக் கடிதங்களை உடனடியாகப் பரிசீலித்த சட்டப்பேரவைத் தலைவர், 6 பேரின் ராஜினாமாவையும் ஏற்றுக்கொண்டதாக அதிகாரப்பூர்வமாக அறிவித்தார்.

இதையும் படிங்க: "இன்றே தீர்ப்பு"..! இடைத்தேர்தல் முடிவும்... தகுதி நீக்க வழக்கும்.! பரபரப்பு அரசியல் களம்..!!

பேரவைத் தலைவரின் இந்த அதிரடி நடவடிக்கைக்கு அதிமுக தரப்பில் கடும் எதிர்ப்பு தெரிவிக்கப்பட்டது. சட்டமன்ற உறுப்பினர்கள் மீது தகுதி நீக்க நடவடிக்கை நிலுவையில் இருக்கும்போது, அவர்களின் ராஜினாமாவை ஏற்றுக் கொண்டது சட்டவிரோதமானது; உள்நோக்கம் கொண்ட இந்த உத்தரவை ரத்து செய்து, அவர்களைக் கட்சித் தாவல் தடைச் சட்டத்தின் கீழ் தகுதி நீக்கம் செய்ய வேண்டும் என வலியுறுத்தி அதிமுக கொறடா அக்ரி கிருஷ்ணமூர்த்தி உள்ளிட்டோர் சென்னை உயர்நீதிமன்றத்தில் வழக்குத் தொடர்ந்தனர்.

இந்த வழக்கின் அனைத்துத் தரப்பு வாதங்களும் ஏற்கனவே விரிவாகக் கேட்கப்பட்டு நிறைவடைந்த நிலையில், வழக்கின் மீதான தீர்ப்பை உயர்நீதிமன்றம் ஒத்திவைத்திருந்தது. இந்நிலையில், சபாநாயகரின் உத்தரவை எதிர்த்துத் தொடரப்பட்ட இந்த முக்கிய வழக்கில் சென்னை உயர்நீதிமன்றம் நாளை இறுதித் தீர்ப்பு வழங்கவுள்ளது. ஏற்கனவே உச்சநீதிமன்றத்தில் வழக்குகள் தொடர்பான விவாதங்கள் நிலவி வரும் சூழலில், உயர்நீதிமன்றம் நாளை வழங்கவுள்ள தீர்ப்பு தமிழக சட்டப்பேரவை மற்றும் அரசியல் வட்டாரத்தில் மிகப்பெரிய திருப்புமுனையாக அமையும் என எதிர்பார்க்கப்படுகிறது.

இதையும் படிங்க: தாமிரபரணி பாலத்தில் முறைகேடு குற்றச்சாட்டு... நீதிமன்றத்தில் சூடுபிடித்த வழக்கு!