உலகப் புகழ்பெற்ற மதுரை மீனாட்சி அம்மன் கோவில் குடமுழுக்கு விழாவின் போது, தமிழ் மொழிக்குக் கூடுதல் முக்கியத்துவம் அளிக்க வேண்டும் எனச் சென்னை உயர்நீதிமன்ற மதுரை அமர்வு இன்று அதிரடி உத்தரவு பிறப்பித்துள்ளது. சங்கம் வைத்துத் தமிழ் வளர்த்த மதுரையின் பெருமையை மீட்டெடுக்கும் வகையில் இந்தத் தீர்ப்பு அமைந்துள்ளது.

மதுரை மீனாட்சி அம்மன் கோவில் குடமுழுக்கு விழாவில் தமிழ் முறைப்படி வழிபாடுகள் நடத்தப்பட வேண்டும் எனத் தொடரப்பட்ட வழக்கை விசாரித்த உயர்நீதிமன்ற மதுரை அமர்வு. குடமுழுக்கு நிகழ்வின் போது சமஸ்கிருத மந்திரங்களுக்கு இணையாகத் தமிழ் திருமுறைகள், பன்னிரு திருமுறைகள் மற்றும் தேவாரம், திருவாசகம் ஆகியவற்றுக்குக் கூடுதல் முக்கியத்துவம் அளிக்க வேண்டும். மதுரை என்பது வெறும் நகரம் அல்ல; அது சங்கம் வைத்துத் தமிழ் வளர்த்த புண்ணிய பூமி. எனவே, இங்கு நடைபெறும் விழாக்களில் தமிழுக்கு முதலிடம் அளிப்பது மிக அவசியம் என நீதிபதி தனது உத்தரவில் சுட்டிக்காட்டினார்.

குடமுழுக்கு ஏற்பாடுகளைச் செய்து வரும் இந்து சமய அறநிலையத் துறைக்கு நீதிமன்றம் சில வழிகாட்டுதல்களை வழங்கியுள்ளது. குடமுழுக்கிற்காக அமைக்கப்படும் யாகசாலைகளில் தமிழ் ஓதுவார்களைக் கொண்டு தமிழ் மறைகளை முழங்கச் செய்ய வேண்டும். பக்தர்களுக்கு வழங்கப்படும் அழைப்பிதழ்கள் மற்றும் அறிவிப்புகளில் தமிழுக்கு உரிய அங்கீகாரம் வழங்கப்பட வேண்டும்.

இதையும் படிங்க: 8 பெண்களை விடுதலை செய்யுங்கள்! ஈரானுக்கு அதிபர் டிரம்ப் வலியுறுத்தல்!

மீனாட்சி அம்மன் கோவில் குடமுழுக்கு விழாவிற்கான பணிகள் தற்போது முழு வீச்சில் நடைபெற்று வருகின்றன. இந்நிலையில், தமிழுக்குக் கூடுதல் முக்கியத்துவம் அளிக்க வேண்டும் என்ற நீதிமன்றத்தின் உத்தரவு தமிழ் ஆர்வலர்கள் மற்றும் பக்தர்கள் மத்தியில் பெரும் வரவேற்பைப் பெற்றுள்ளது.

சுமார் 100 கோடி ரூபாய் மதிப்பீட்டில் கோவிலின் கோபுரங்கள் மற்றும் சிற்பங்கள் புனரமைக்கப்பட்டு வரும் நிலையில், குடமுழுக்கு தேதியை அறநிலையத் துறை விரைவில் அறிவிக்கவுள்ளது. நீதிமன்ற உத்தரவின்படி, இந்த விழா முழுக்க முழுக்கத் தமிழ் மணக்கும் விழாவாக அமையும் என எதிர்பார்க்கப்படுகிறது.

இதையும் படிங்க: ஆப்பிள் சிஇஓ பதவியிலிருந்து டிம் குக் விலகல்! புதிய தலைவராக ஜான் டெர்னஸ் நியமனம்!