தமிழகச் சட்டமன்றத் தேர்தல் 2026 நெருங்கி வரும் வேளையில், மக்கள் நீதி மய்யம் (மநீம) தனது தேர்தல் பணிகளை முடுக்கிவிட்டுள்ளது. கட்சியின் தலைவரும், மாநிலங்களவை உறுப்பினருமான திரு. கமல் ஹாசன் தலைமையில் இன்று ஆழ்வார்பேட்டையில் உள்ள கட்சித் தலைமை நிலையத்தில் நிர்வாகக்குழு மற்றும் செயற்குழுவின் அவசரக் கூட்டம் நடைபெற்றது.

சட்டமன்றத் தேர்தலில் மநீம போட்டியிடவுள்ள தொகுதிகளின் எண்ணிக்கை, உத்தேச வேட்பாளர் பட்டியல் மற்றும் கூட்டணி விவகாரங்கள் குறித்து இந்தக் கூட்டத்தில் விரிவாக விவாதிக்கப்பட்டது.

இதையும் படிங்க: அதிமுக மாவட்ட செயலாளர்கள் கூட்டம்! தம்பிதுரைக்கு மீண்டும் ராஜ்யசபா சீட்? இபிஎஸ் தலைமையில் ஆலோசனை!

இத்தேர்தலில் மக்கள் நீதி மய்யத்திற்கு மீண்டும் 'டார்ச் லைட்' (Battery Torch) சின்னத்தை இந்தியத் தேர்தல் ஆணையம் ஒதுக்கியுள்ளது. இந்தச் சின்னத்தைப் பயன்படுத்தித் தீவிரப் பிரச்சாரத்தை முன்னெடுப்பது குறித்து ஆலோசிக்கப்பட்டது.

திமுக தலைமையிலான கூட்டணியில் நீடிக்கும் மநீம, நகர்ப்புறங்களை உள்ளடக்கிய சுமார் 10 தொகுதிகளை ஒதுக்குமாறு கோரிக்கை விடுத்துள்ளது. இது தொடர்பான இறுதி முடிவுகள் விரைவில் எட்டப்படும் என எதிர்பார்க்கப்படுகிறது.

இந்த அவசரக் கூட்டத்தில் துணைத் தலைவர்கள் ஏ.ஜி. மௌரியா, ஆர். தங்கவேலு, பொதுச் செயலாளர் ஆ. அருணாச்சலம் மற்றும் பொருளாளர் சந்திரசேகர் உள்ளிட்ட மாநில அளவிலான நிர்வாகிகள் அனைவரும் பங்கேற்றனர்.

கூட்டத்தின் முடிவில் செய்தியாளர்களைச் சந்தித்த பொதுச் செயலாளர் ஆ. அருணாச்சலம், கட்சித் தொண்டர்கள் மற்றும் தேர்தல் பணிக் குழுவினருக்குத் தேவையான ஆலோசனைகளைத் தலைவர் வழங்கியதாகத் தெரிவித்தார்.

இதையும் படிங்க: தேமுதிகவிற்கு மாநிலங்களவையில் ஒரு இடம் ஒதுக்கீடு! மு.க. ஸ்டாலின் - எல்.கே. சுதீஷ் ஒப்பந்தம்!