திருவள்ளூர் மாவட்டம், திருவள்ளூர் நகராட்சியின் 6-வது வார்டு கவுன்சிலராக பதவி வகிப்பவர் பிரபாகரன். திமுகவைச் சேர்ந்த பிரபாகரன், இண்டிகோ விமானத்தில் பயணம் செய்துள்ளார். விமானத்தில் பயணித்தபோது குடிபோதையில் விமானப் பணிப்பெண்ணிடம் பாலியல் ரீதியான அத்துமீறலில் ஈடுபட்டதாக குற்றச்சாட்டு எழுந்துள்ளது. சென்னையிலிருந்து டெல்லி செல்லும் இண்டிகோ விமானத்தில் பயணித்தபோது விமான பணி பெண்ணிடம் எந்த ஊர் என்று கேட்டு அத்துமீறியதாக புகார் எழுந்தது.

புகாரின் அடிப்படையில் திமுக கவுன்சிலர் பிரபாகரன் மற்றும் அவரது நண்பர் தியாகு ஆகிய இருவரும் கைது செய்யப்பட்டுள்ளனர். இந்த சம்பவம் தமிழக அரசியல் வட்டாரத்தில் பெரும் பேசப்பொருளாக மாறி இருக்கிறது. எதிர்க்கட்சியினர் கடும் கண்டனங்களை தெரிவித்து வருகின்றனர். அதன் அடிப்படையில் தமிழகத்தையே திமுக அரசு தலைகுனிய வைத்து விட்டதாக தமிழக பாஜக தலைவர் நயினார் நாகேந்திரன் கடும் கண்டனம் தெரிவித்தார்.

கடந்த சில தினங்களுக்கு முன்பு திமுக நிர்வாகியின் பாலியல் இச்சைக்கு இரண்டு வயது மழலை பலியான பெருந்துயரத்தின் சுவடு மறையும் முன்னரே, சென்னையில் இருந்து டெல்லி சென்ற இண்டிகோ விமானத்தில் இருந்த பணிப் பெண்ணிடம், திமுக கவுன்சிலர் பிரபாகரன் என்பவர் பாலியல் சீண்டலில் ஈடுபட்டதாக வெளியாகியுள்ள செய்தி கடும் அதிர்ச்சியளிக்கிறது என்று தெரிவித்தார். பெண்களை வெறும் சதைப் பிண்டங்களாக மட்டுமே பார்க்கும் ஒரு கேவலமான மனநிலை திமுகவினருக்கு எங்கிருந்து வந்தது என்று தெரியவில்லை என கூறினார்.

இதையும் படிங்க: எல்லாத்தையும் கொன்னுட்டு... "வெல்வோம் ஒன்றாக" வேற..! முதல்வரை கிழித்து தொங்கவிட்ட நயினார்..!!

தமிழகப் பெண்களுக்கு மட்டுமல்லாமல் நாட்டிலுள்ள எந்தப் பெண்களுக்கும் பாதுகாப்பில்லாத அபாயகரமான சூழ்நிலையை உருவாக்கிக் கொண்டிருக்கும் உடன்பிறப்புகளை முதலமைச்சர் ஸ்டாலின் கட்டுப்படுத்தாமல் வேடிக்கை பார்ப்பது ஏன் எனக்கு கேள்வி எழுப்பியுள்ளார். அனைத்து அரசுத் துறைகளிலும் ஊழல், சட்டம் ஒழுங்கு சீர்குலைவு, விலைவாசி உயர்வு, பெண்களின் பாதுகாப்பு கேள்விக்குறி, மாணவர்களின் எதிர்காலம் சிதைவு எனத் தொடர் நிர்வாகத் தோல்விகளால் தமிழக மக்களையே தினந்தினம் ஆட்டிப்படைக்கும் “திராவிட மாடல்” தமிழக வரலாற்றின் அவமான அடையாளம் என்று சாடினார். 

இதையும் படிங்க: பிரதமரின் பொம்மையை தூக்கில் தொங்கவிட்ட காங்கிரசார்..!! நயினார் கண்டனம்..!!