ஆவடி இணையவழி குற்றப்பிரிவு போலீசார் சமீபத்தில் மேற்கொண்ட நடவடிக்கையில், திருவேற்காட்டைச் சேர்ந்த மூன்று இளைஞர்கள் கைது செய்யப்பட்டுள்ளனர். ஆன்லைன் டிரேடிங் மூலம் லட்சக்கணக்கில் லாபம் ஈட்டலாம் என்ற கவர்ச்சிகரமான விளம்பரங்களை இன்ஸ்டாகிராம் ரீல்ஸ் வாயிலாக வெளியிட்டு, பயிற்சி வகுப்புகள் நடத்துவதாகக் கூறி பொதுமக்களிடம் இருந்து ரூ.6 கோடிக்கு மேல் பணத்தை மோசடி செய்ததாக இவர்கள் மீது குற்றச்சாட்டு எழுந்துள்ளது.கைது செய்யப்பட்டவர்கள் கவின் பிரசாத், கீர்த்திவாசன் மற்றும் பார்த்திபன் ஆகியோர் மூவரும் 24 வயதுடையவர்கள்.

பள்ளிப்பருவம் முதல் எம்.பி.ஏ. வரை ஒன்றாகப் படித்த நெருங்கிய நண்பர்கள் இவர்கள். 2022 ஆம் ஆண்டில் திருவேற்காட்டில் ஒரு வீட்டை வாடகைக்கு எடுத்து டிரேடிங் தொடர்பான வகுப்புகளை நடத்தத் தொடங்கியதாகத் தெரிகிறது. பின்னர் இன்ஸ்டாகிராம் சமூக வலைதளத்தில் ரீல்ஸ் மூலம் விளம்பரங்களை வெளியிட்டனர். ஆன்லைன் டிரேடிங்கில் ஈடுபட்டால் எளிதில் அதிக லாபம் ஈட்டலாம் என்றும், அதற்கான பயிற்சியைத் தாங்கள் அளிப்பதாகவும் ஆசைகாட்டினர். ஒருவருக்கு 40 ஆயிரம் ரூபாய் கட்டணம் வசூலித்து மாணவர்களைச் சேர்த்தனர்.ஒவ்வொரு பேட்ச்சிலும் 40 முதல் 50 பேர் வரை சேர்க்கப்பட்டனர். கோவளம், முட்டுக்காடு, கொடைக்கானல், புதுச்சேரி உள்ளிட்ட இடங்களில் ரிசார்ட்டுகளை ஏழு நாட்களுக்கு வாடகைக்கு எடுத்து, ஒரு அறையில் பத்து பேர் வீதம் தங்க வைத்து பயிற்சி அளித்தனர்.

ஆர்.பி.ஐ.யால் தடை செய்யப்பட்ட கிரிப்டோ கரன்சிகளில் முதலீடு செய்யும்படி மாணவர்களைத் தூண்டியதாகவும் குற்றஞ்சாட்டப்படுகிறது. ஒரு பேட்ச்சிற்கு சுமார் 16 லட்சம் ரூபாய் வசூலிக்கப்பட்டு, மொத்தம் 36 பேட்ச்சுகள் நடத்தப்பட்டு ரூ.6 கோடி பணம் திரட்டப்பட்டதாக விசாரணையில் தெரியவந்துள்ளது. இந்தப் பணத்தைச் சட்டவிரோதமான முதலீடுகளில் ஈடுபடுத்தி மேலும் பல கோடிகள் சம்பாதித்ததாகவும் கூறப்படுகிறது.பயிற்சிக்கு வந்த மாணவர்களில் சிலரை அதிக லாபம் அடைந்தது போல் நடிக்க வைத்து வீடியோக்கள் எடுத்து, அவற்றை மீண்டும் விளம்பரங்களாகப் பயன்படுத்தி மேலும் பலரை ஏமாற்றியதாகவும் போலீசார் தெரிவிக்கின்றனர். இவ்வாறு தொடர்ந்து நடந்து வந்த மோசடி குறித்து புகார்கள் பெருகியதையடுத்து ஆவடி இணையவழி குற்றப்பிரிவு போலீசார் விசாரணையைத் தீவிரப்படுத்தினர். விசாரணையின் இறுதியில் இந்த மூவரையும் கைது செய்துள்ளனர்.

இதையும் படிங்க: அத்துமீறல்..! வெடிக்கும் டெல்லி போராட்டம்.. CJP தலைவர்களுக்கு 5 நாட்கள் நீதிமன்ற காவல்..!

இந்தச் சம்பவம் சமூக வலைதளங்களில் வெளியாகும் கவர்ச்சிகரமான டிரேடிங் விளம்பரங்களின் ஆபத்தை மீண்டும் உணர்த்துகிறது. போலீசார் பொதுமக்களுக்கு எச்சரிக்கை விடுத்துள்ளனர். சமூக வலைதளங்களில் வெளியாகும் இதுபோன்ற விளம்பரங்களை நம்பி பணம் முதலீடு செய்ய வேண்டாம் என்றும், உண்மையான வருமான வாய்ப்புகள் என்று தோன்றினாலும் அவற்றைச் சரிபார்த்து, அதிகாரப்பூர்வமான நிறுவனங்கள் மூலமே முதலீடு செய்ய வேண்டும் என்றும் அறிவுறுத்தியுள்ளனர்.

இணையவழி மோசடிகளில் சிக்கினால் உடனடியாக அருகிலுள்ள காவல் நிலையத்திலோ அல்லது இணையவழி குற்றப்பிரிவிலோ புகார் அளிக்க வேண்டும் என்றும் அவர்கள் தெரிவித்துள்ளனர்.இளைஞர்கள் கல்வி மற்றும் தொழில் வாய்ப்புகளைத் தேடி அலையும் இக்காலத்தில், எளிதான பணம் என்ற மாயையால் ஏமாறுவது அதிகரித்து வருகிறது. இந்த மோசடி வழக்கு, அத்தகைய ஆசைகளைப் பயன்படுத்தி பலரையும் வஞ்சிக்கும் முயற்சிகளுக்கு எதிரான எச்சரிக்கையாக அமைந்துள்ளது. போலீசாரின் தொடர் விசாரணை நடைபெற்று வருகிறது.

இதையும் படிங்க: அடங்கவே மாட்டீங்களா?... தவெக அரசுக்கு ஷாக் கொடுத்த ஆம்னி பேருந்துகள்... கட்டணக் கொள்ளையால் கலங்கும் மக்கள்...!